Te no te aha o te taviniraa autahu‘araa
Te taa-maitai-raa i te no te aha o te evanelia e te no te aha o te autahu‘araa, na te reira e tauturu ia tatou ia ite i te hanahana o te opuaraa no teie mau mea atoa
E mea poihere na’u teie taime faahiahia e farerei ai au i te mau taea‘e o te autahu‘araa e a oaoa ai e o outou i roto i te maere e i te nehenehe o te evanelia a Iesu Mesia. Te haapoupou nei au ia outou no to outou faaroo, ta outou mau ohipa maitai, e no to outou maitai tamau.
Hoê â to tatou taamuraa i te mea ta tatou paatoa i farii te faatoro‘araa i roto i te autahu‘araa a te Atua na roto mai i te feia tei ti‘aturi i te mana mo‘a e te puai o te autahu‘araa. E haamaitairaa rahi te reira. E hopoi‘a mo‘a te reira.
Te puai o te no te aha
Aita i maoro a‘enei ua feruri au no ni‘a i na piiraa e piti faufaa roa ta’u i farii mai te taime a mau ai au i te autahu‘araa i roto i te Ekalesia.
Te matamua o te reira na piiraa ua tae mai ïa i te taime a diakono ai au. Te haere ra vau e to’u utuafare i te amaa a te Ekalesia i Frankfurt, Helemani. Ua fana‘o matou i te mea e, e rave rahi mau taata maitai i roto i ta matou amaa na‘ina‘i. Te hoê o to matou ïa peresideni amaa, te taea‘e Landschulz. Faahiahia roa vau ia’na, noa’tu e e hi‘oraa haapa‘o maitai to’na i te mau taime atoa, e te tura, e e ahu pinepine oia i te pereue ereere. Te haamana‘o ra vau i to’u apîraa ia faaooo matou to’u mau hoa i te huru peu tahito a to matou peresideni amaa.
E ata vau ia feruri ana‘e au i te reira i teie nei no te mea, e mea papû roa e, te hi‘o atoa mai ra te feia apî o te Ekalesia i teie anotau ia’u mai teie te huru.
I te hoê Sabati, ua ani mai te peresideni Landshulz e, e nehenehe anei ta’na e paraparau ia’u. Teie to’u feruriraa matamua, « Eaha te hape ta’u i rave? » Ua feruri ‘oi‘oi au i te mau mea e rave rahi ta’u i rave e tei faatupu mai i teie aparauraa peresideni amaa e te diakono.
Ua arata‘i te peresideni Landschulz ia’u i roto i te hoê piha na‘ina‘i—aita e piha ohiparaa na te peresideni amaa i roto i ta matou fare pureraa—e i reira, ua faaite mai ra oia i te hoê piiraa no’u ia tavini ei peresideni no te pŭpŭ diakono.
Na ô mai ra oia e, « E ti‘araa faufaa roa teie », e i muri iho, ua rave oia i te taime no te faataa mai e, no te aha. Ua faataa mai Oia e, eaha ta’na e ta te Fatu e hinaaro nei ia’u, e e nahea vau e farii ai te tauturu.
Aita vau e haamana‘o nei i te rahiraa o te mea ta’na i parau mai, te haamana‘o maitai nei râ vau i te mea ta’u i farii. Ua î to’u aau i te Varua hanahana a paraparau mai ai oia ia’u. Ua ti‘a ia’u ia ite i roto i to’u aau e, teie te Ekalesia a te Faaora. E ua ite au e, te piiraa ta’na i tuu mai i ni‘a ia’u e mea faaûruhia ïa e te Varua Maitai. Te haamana‘o nei au i to’u haereraa i rapae i taua piha na‘ina‘i ra e au ra e, ua rahi rii a‘e au i taua taime ra.
Mai taua mahana ra, fatata e 60 matahiti i teie nei, te tape‘a maite nei au i teie mau mana‘o ti‘aturi e te here.
A feruri ai au i te reira ohipa tei tupu, ua tamata vau i te haamana‘o e hia râ diakono i roto i ta matou amaa i taua taime ra. Hape’tu ai au, te mana‘o nei au e, e piti diakono. Teie râ, ua rahi roa paha teie numera.
E ere râ te reira i te mea faufaa, hoê anei diakono e aore râ, hoê ahuru ma piti anei. Ua tupu te mana‘o tura i roto ia’u, e ua hinaaro vau ia tavini ma to’u aravihi atoa, e eiaha e faatupu i te mauruuru ore i roto i to’u peresideni amaa e aore râ, i te Fatu.
Te ite nei au i teie nei e, a pii ai te peresideni amaa ia’u i roto i teie ti‘araa, e nehenehe ta’na e faaohie noa i te rave i te reira. E nehenehe ta’na e parau noa mai ia’u i roto i te aroa e aore râ, i roto i ta matou pureraa autahu‘araa e, o vau te peresideni apî no te pŭpŭ diakono.
Aita râ, ua rave oia i te taime no te parahi i piha‘i iho ia’u e no te tauturu ia’u ia maramarama e, eiaha noa te eaha o teie piiraa e tei hopoi‘a apî to’u, hau atu râ i te faufaa rahi o te no te aha.
Te mea teie e ore roa e mo‘ehia ia’u.
Te mana‘o tumu o teie aamu e ere ïa no te faataa noa i te huru no te horo‘araa i te mau piiraa i roto i te Ekalesia (noa’tu e, ua riro teie ei hoho‘a maitai roa no’u no ni‘a i te huru ti‘a no te raveraa i te reira ohipa). Ua riro râ teie ei haapiiraa no ni‘a i te puai faaitoito o te faatereraa autahu‘araa ia faaara i te varua e ia faaûru i te ohipa e rave.
E mea ti‘a ia faahaamana‘o-tamau-hia tatou i te mau tumu mure ore e vai ra i muri mai i te mau mea i faauehia ia tatou ia rave. E mea ti‘a i te mau parau tumu niu o te evanelia ia riro ei tuhaa papû i roto i to tatou oraraa, noa’tu e, e titauhia ia tatou ia haapii e ia na ni‘a iho noa i te haapii i te reira. Eiaha râ te reira raveraa ia riro ei ohipa mataro-noa-hia e aore râ, ei ohipa taahoa. Area râ, ia haapii ana‘e tatou i te mau parau tumu niu i roto anei i to tatou utuafare e aore râ, i te fare pureraa, na te mana‘o anaanatae i te ora i te evanelia e na te hoê iteraa papû puai e horo‘a mai i te ite, te hau e te oaoa i roto i te aau o te mau taata ta tatou e haapii.
Mai te diakono apî roa a‘e tei faatoro‘ahia e tae roa’tu i te tahu‘a rahi tahito roa a‘e, e tapura ohipa ana‘e ta tatou paatoa no te faaiteraa e, eaha te ti‘a ia tatou ia rave, e ta tatou e rave i roto i ta tatou mau hopoi‘a no te autahu‘araa. E mea faufaa te eaha i roto i ta tatou ohipa, e e mea ti‘a ia tatou ia haapa‘o i te reira. Tera râ, i roto i te no te aha o te taviniraa autahu‘araa o ta tatou e ite te anaanatae, te hiaai, e te puai o te autahu‘araa.
Te haapii nei te eaha o te taviniraa autahu‘araa i te ohipa e ti‘a ia rave. Te faaûru nei te no te aha i te mau aau.
Na te eaha e faaite, are‘a râ na te no te aha e faatupu i te tauiraa.
Te auhuneraa o te mau mea « maitai » e rave
Te tahi atoa piiraa autahu‘araa ta’u i mana‘o na, ua horo‘ahia mai ïa ia’u e rave rahi matahiti, a farii ai au i to’u iho utuafare. Ua ho‘i mai matou i Frankfurt, Helemani, e no farii noa mai ra vau i te hoê nuuraa i mua i roto i ta’u ohipa o te titau papû i to’u taime e i to’u feruriraa atoa. I roto i taua tau ohipa roa ra o to’u oraraa, ua pii mai o Elder Joseph B. Wirthlin ia’u ia tavini ei peresideni tĭtĭ.
I roto i ta’u aparauraa ia’na, e rave rahi mau mana‘o tei tupu mai i roto i to’u feruriraa, e te hoê o te reira, e ere ïa i te mea iti a‘e, oia hoi, te haape‘ape‘araa o te ore to’u e taime no teie piiraa. Noa’tu ua putapu vau e te haapeu no te piiraa, ua uiui poto noa vau i roto ia’u, e farii anei au i te reira. Tera râ, no te tahi noa taime iti, no te mea, ua ite au e, na te Atua i pii ia Elder Wirthlin e te rave ra oia i te ohipa a te Fatu. Eaha ta’u e rave taa ê atu te fariiraa?
Te vai ra te mau taime a titauhia ai ia tatou ia taahi i roto i te pouri ma te faaroo, te ti‘aturi e, e tuu te Atua i te repo paari i raro a‘e i to tatou avae i te taime e taahi ai tatou. No reira, ua farii au ma te oaoa, ma te ite e, na te Atua e horo‘a mai.
I te mau mahana matamua o teie piiraa, ua fana‘o to matou tĭtĭ i te fariiraa i te haapiipiiraa mai roto mai i te tahi mau orometua e mau ti‘a faatere faahiahia roa a‘e i roto i te Ekalesia—te mau taata mai ia Elder Russell M. Nelson e te peresideni Thomas S. Monson tei tae mai i to matou mau pae fenua. E au ta ratou mau haapiiraa mai te hupe no te ra‘i, mai te huru e e faaûruraa ia matou. Te vai nei â ta’u mau nota i tapa‘opa‘o i roto i taua mau haapiipiiraa ra. Ua horo‘a mai teie mau taea‘e i te hi‘oraa atea e, eaha te auraa ia faati‘a i te basileia o te Atua na roto i te paturaa i te mau iteraa papû o te taata iho e te haapuairaa i te mau utuafare. Ua tauturu ratou ia matou ia ite e, nahea ia faaohipa i te evanelia mau e te mau parau tumu i to matou huru taa ê e i to matou anotau taa ê ra. E nehenehe atoa e parau e, ua tauturu mai te mau ti‘a faatere faaûruhia ia matou ia ite i te no te aha o te evanelia, e i reira ua ti‘a ia matou ia tufetu i to matou ahu rima e ia haere i te ohipa.
Aita i maoro roa, ua ite a‘era matou e, e rave rahi mau ohipa e nehenehe te hoê peresideniraa tĭtĭ e tamata i te rave—e no te rahi o te reira mau ohipa, mai te mea e, aita matou e faataa, na roto i te faaûruraa, e riro i te mo‘ehia ia matou i te rave i te mau mea faufaa roa. Haamata maira te mau ohipa matamua i te hiti mai, ma te faahuri ê i ta matou faatumuraa i ni‘a i te iteraa tei horo‘ahia mai e te mau taea‘e. E mea rahi te mau ohipa « maitai » no te rave, tera râ, e ere te taatoaraa o te reira i riro ei mea faufaa.
Ua apo mai matou i te hoê haapiiraa faufaa roa: Noa’tu e, e mea maitai te hoê ohipa, e ere râ te reira i te tumu papû i te mau taime atoa no te horo‘a i to tatou taime e ta tatou mau rave‘a tauturu. E mea ti‘a i ta tatou mau ohiparaa, mau mana‘o, e mau faanahoraa ia faaûruhia na roto e ia faatumuhia i ni‘a te no te aha ta tatou ohipa taviniraa autahu‘araa, eiaha ra na roto te mana‘o e ia itehia mai e te mata taata e aore râ mea faati‘a ture noa. Aita ana‘e, e nehenehe te reira e faaturori i ta tatou mau tautooraa, e faatarapape i to tatou puai, e e arata‘i ia tatou i roto i te haapa‘oraa i to tatou iho huru pae varua e aore râ pae tino, e ere ho‘i no roto i te parau no te aupĭpĭraa.
Te mau taea‘e, ua ite tatou paatoa e titauhia te haapa‘o maitai no te rotahi maite i ni‘a i te mau ohipa tei mau i te puai rahi a‘e no te faarahi i to tatou here i te Atua e i te mau taata tupu, te aupururaa i te mau faaipoiporaa, te haapuairaa i te mau utuafare e te paturaa i te basileia o te Atua i ni‘a i te fenua nei. Mai te au i te hoê raau hotu e rave rahi mau amaa e te raore, e mea ti‘a i to tatou oraraa ia topetope-tamau-hia no te haapapû e, te faaohipa ra tatou i to tatou puai e to tatou taime no te faaoti i ta tatou opuaraa mau—ei mau taea‘e no te autahu‘araa—ia « faahotu mai i te huero maitai! »1
E ere o outou ana‘e
No reira, nahea tatou e ite ai e, eaha te ma‘iti? Ua farii tatou tata‘itahi i te hopoi‘a no te faaoti i te reira no tatou iho. Tera râ, ua faauehia ia tatou ia tai‘o i te mau papa‘iraa mo‘a ma te itoito, ia faaroo i te mau parau a te mau peropheta, e ia tuatapapa te reira na roto i te pure faaroo, e te feruri hohonu e te mana‘o papû.
Te mau taea‘e, e haapa‘o te Atua i Ta’na fafauraa. Na roto i te Varua Mo‘a, e parau mai Oia i to tatou varua e to tatou aau no ni‘a i te e‘a ta tatou e pee atu i te roaraa o te tuhaa o to tatou oraraa.
Mai te mea e, e aau viivii ore to tatou—mai te mea e, eita tatou e imi i to tatou iho hanahana, e imi râ i te hanahana o te Atua Mana Hope, mai te mea e, e imi tatou i To’na hinaaro, mai te mea e hinaaro tatou e haamaitai i te mau oraraa o to tatou utuafare e te taata tupu—eita tatou e vaiiho otare-noa-hia. Mai ta te peresideni Monson i faahaamana‘o pinepine mai ia tatou, « Mai te mea e, tei roto tatou i te ohipa a te Fatu, e ti‘a ia tatou ia farii i te tauturu a te Fatu ».2
E haere to outou Metua i te Ao ra « na mua i to outou mata. E vai hoi [Oia] i to outou pae atau e i to outou pae aui, e ei roto hoi [To’na] Varua i to outou mau aau, e [Ta’na] mau melahi hoi e ati noa‘e ia outou na, ia haamaraa mai ia outou i ni‘a ».3
Te puai no te raveraa
To’u mau taea‘e here e, e matara te mau haamaitairaa hanahana no te taviniraa autahu‘araa na roto i ta tatou ohipa itoito, to tatou hinaaro ia faatusia, e to tatou hiaai ia rave i te mea maitai. E mata tatou ia riro ei feia e haa, eiaha râ ia haapa‘ohia. E mea maitai te haapii, tera râ, te parau a‘o o te ore e faatupu i te ohipa, e au ïa mai te auahi ve‘ave‘a ore, e aore râ, mai te pape e ore e haamaha i te poihâ
Tei te faaohiparaa i te haapiiraa tumu taua auahi tamâ ra o te evanelia e tupu ai i te rahi e te mana o te autahu‘araa e faaahu ai i to tatou varua.
O Thomas Edison, te taata hamani tei turama i te ao nei i te mori anaana uira, tei parau e, « Te faufaa o te hoê mana‘o tei te huru ïa o te faaohiparaahia te reira ».4 Oia atoa te haapiiraa tumu o te evanelia, e rahi atu to’na faufaa ia faaohipa-ana‘e-hia te reira.
Eiaha tatou e faati‘a i te mau haapiiraa tumu o te autahu‘araa ia taoto noa i roto i to tatou aau e ma te faaohipa-ore-hia i roto i to tatou oraraa. Mai te mea te vai ra te hoê faaipoiporaa e aore hoê utuafare e hinaaro ra i te tauturu—penei a‘e to tatou iho—eiaha e tia‘i noa e e hi‘o noa. E haamauruuru ana‘e na i te Atua no te opuaraa oaoa o te ô atoa mai te faaroo, te tatarahapa, te faaoreraa hara, e te mau haamataraa apî. Te faaohiparaa i te haapiiraa tumu o te autahu‘araa e faataa te reira ia tatou ei mau tane faaipoipo, ei mau metua tane, e ei mau tamaiti o tei taa maitai i te no te aha o te autahu‘araa e to’na mana no te farii-faahou-raa e te parururaa i te nehenehe e te mo‘araa o te mau utuafare mure ore.
Ua riro te amuiraa rahi ei taime maitai no te faaroo e no te rave. E no reira e mata na tatou i te riro « Ei feia rave… i te parau nei, eiaha ei feia faaroo noa ».5 Te mau taea‘e, te ani nei au ia outou ia feruri i te mau parau i parauhia mai e te mau tavini no te Atua i teie hopea hepetoma. I muri iho, a tuturi i raro e a ani i te Atua, to tatou Metua i te Ao ra, ia haamaramarama i to outou feruriraa e ia haaputaputu i to outou aau. A ani i te Atua i te tauturu i roto i to outou oraraa i te mau mahana atoa e i roto i ta outou mau hopoi‘a i roto i te Ekalesia, e i roto atoa i ta outou mau tamataraa i teie mau taime. A pee i te muhumuhu a te Varua—eiaha e haamarirau. Mai te mea rave tatou i teie mau mea atoa, te fafau atu nei au ia outou e, eita te Fatu e vaiiho ia outou ia haere otare noa.
A tamau noa i te faaoroma‘i
Ua ite tatou e, noa’tu to tatou mau mana‘o maitai roa, eita te ohipa e tere tamau noa mai ta tatou i faanaho. E hape tatou i roto i te oraraa nei e i roto i ta tatou ohipa taviniraa autahu‘araa. I te tahi taime, e hahape to tatou avae e e topa’tu i raro.
A a‘o mai ai te Fatu ia tatou ia « tamau noa i te faaoroma‘i e tae noa’tu i te taime [tatou] e maitai roa‘i ra »,6 te faaite mai nei Oia e, e titauhia te taime roa e te rohi-tamau-raa. Te taa-maitai-raa i te no te aha o te evanelia e te no te aha o te autahu‘araa, na te reira e tauturu ia tatou ia ite i te hanahana o te opuaraa no teie mau mea atoa. E horo‘a mai te reira ia tatou i te anaanatae rahi e te puai no te rave i te mau mea maitai, noa’tu e mea etaeta te reira. Te faatumuraa i ni‘a i te mau parau tumu niu o te oraraa evanelia, e haamaitai ia tatou i roto te maramarama, te paari e te arata‘iraa.
« E ere anei i te mea ti‘a ia tatou ia haere â i roto i te hoê ohipa rahi roa mai teie te huru? »7 Oia, e te mau taea‘e, e haere tatou!
Ma te arata‘ihia e te Varua Mo‘a, e roaa te ite ia tatou i roto i to tatou mau hape. Mai te mea e, e hahape to tatou avae, e ti‘a faahou tatou i ni‘a. Mai te mea e, eita tatou e manuïa, ia rave tamau noa tatou. Eita roa’tu tatou e aueue; eita roa’tu tatou e faaru‘e.
Tatou te hoê aupŭpŭ puai o te autahu‘araa mure ore a te Atua, e ti‘a amui tatou, tapono e tapono, ma te mata rotahi i ni‘a i te mau parau tumu o te evanelia a Iesu Mesia i faaho‘ihia mai, e te mauruuru i te taviniraa i to tatou Atua e te taata tupu ma te hinaaro mau e te here.
Te ora nei te Atua!
E au mau taea‘e here, te faaite papû nei au ia outou i teie mahana e, te ora nei te Atua te Metua e Ta’na Tamaiti o Iesu Mesia. Te vai mau nei Raua! Tei ô nei Raua!
Aita outou i vai noa o outou ana‘e. Te poihere mai nei to outou Metua i te Ao ra ia outou e te hinaaro nei Oia e haamaitai ia outou e e paruru ia outou i roto i te parau ti‘a.
Ia papû maitai teie ia outou e, te paraparau mai nei te Atua i te taata i to tatou nei anotau. E paraparau Oia ia outou!
Ua ite te peropheta Iosepha Semita i te mea ta’na i parau e ua ite oia. Ua faaho‘i-faahou-hia mai te Ekalesia a Iesu Mesia i te Feia Mo‘a i te mau Mahana Hopea nei na roto i te puai e i te mana o te Atua Manahope.
Te pure nei au no tatou tei mau i To’na autahu‘araa, ia tamau noa tatou i te ohipa mai te au i te no te aha o te taviniraa autahu‘araa, e ia faaohipa i te mau parau tumu o te evanelia i faaho‘i-faahou-hia mai, no te taui i to tatou oraraa e i te oraraa o te mau taata ta tatou e tavini atu.
Mai te mea e, e na reira tatou, na te puai hopea ore o te Taraehara e tamâ, e horoi, e e faanehenehe i to tatou varua e to tatou huru, a riro roa mai ai tatou mai te taata ta tatou i hinaaro ia riro mai. Te faaite papû nei au i teie mau mea na roto i te i‘oa mo‘a o Iesu Mesia, amene.