Ia roaa te hi‘oraa atea no te rave
Mai te mea e hinaaro tatou ia haere i mua eiaha râ ia pohe, e ti‘a ia tatou ia hi‘o ia tatou iho mai ta te Faaora e hi‘o nei ia tatou.
Mai te mau metua maitai atoa, ua hinaaro to’u na metua i te oraraa maitai no ta raua mau tamarii a muri a‘e. E ere to’u metua tane i te melo no te Ekalesia, e no te huru taa ê o te oraraa i taua taime ra, ua faaoti a‘era to’u na metua ia faaru‘e to’u mau taea‘e e to’u mau tuahine e o vau nei i to matou fenua ai‘a o Hamoa Marite i Patifita Apatoa, e ia reva’tu i te mau Hau Amui no Marite no te haere i te haapiiraa.
Ua riro te faaotiraa ia faataa ê raua ia matou ei mea teimaha roa no to’u na metua, no to’u ihoa râ metua vahine. Ua ite raua e, te vai ra te mau titauraa ite-ore-hia i te mea e, e parahi matou i roto i te hoê vahi apî. Tera râ, ma te faaroo e te hinaaro mau, ua haere papû raua i mua i roto i ta raua opuaraa.
No te mea ua paari oia i roto i te Ekalesia, ua mataro maitai to’u metua vahine i te mau parau tumu o te haapaeraa maa e te pure, e ua feruri to’u na metua toopiti e, e titau raua i te mau haamaitairaa no te ra‘i no te tauturu i ta raua mau tamarii. E no reira, ua haamata raua e faataa i te hoê mahana i te mau hepetoma atoa no te haapae i te maa e no te pure no matou. Ta raua hi‘oraa atea o te faaineineraa ïa i ta raua mau tamarii no te hoê oraraa maitai a muri a‘e. Ua rave raua i taua hi‘oraa atea ra, e ua faaohipa raua i to raua faaroo na roto i te imiraa i te mau haamaitairaa a te Fatu. Na roto i te haapaeraa maa e te pure, ua farii raua i te haapapûraa, te mahanahana e te hau e, e maitai te mau mea atoa.
I roto i te mau titauraa fifi o te oraraa nei, nahea e roaa ai ia tatou te hi‘oraa atea maitai no te rave i te mau mea e haafatata roa ia tatou i te Faaora? No ni‘a i te parau no te hi‘oraa atea, te haapii mai nei te buka a Maseli ia tatou i teie parau mau: « Aore e parau i faaitehia mai e taiata te taata i reira » (Maseli 29:18). Mai te mea e hinaaro tatou ia haere i mua eiaha râ ia pohe, e ti‘a ia tatou ia hi‘o ia tatou iho mai ta te Faaora e hi‘o nei ia tatou.
E puai rahi ta te Faaora i ite atu i roto i taua feia ravaai haehaa ra i ta ratou iho i ite i roto ia ratou iho, e o Ta’na i pii atu ia pee mai Ia’na; Ua farii Oia i te hoê hi‘oraa atea no te taata ta ratou e riro mai. Ua ite Oia i to ratou maitai e to ratou puai, e ua pii Oia ia ratou. Aita ratou i aravihi i te omuaraa, tera râ, a pee ai ratou, a ite ai ratou i To’na hi‘oraa, ua farii i Ta’na mau haapiiraa, e ua riro mai ei mau pĭpĭ Na’na. I te hoê taime ua faaru‘e mai te hoê pae o Ta’na mau pĭpĭ Ia’na no te etaeta o te tahi mau mea ta ratou i faaroo. No To’na ite e, e nehenehene atoa te tahi atu mau pĭpĭ e faaru‘e atoa mai Ia’na, ua parau maira Iesu i te Ahuru Ma Piti ra, « E haere atoa anei outou? » (Ioane 6:67). Ua riro te pahonoraa a Petero ei faaiteraa i te huru o to’na tauiraa, e ua roaa to’na hi‘oraa atea e, o vai mau te Faaora. Ua parau atura oia e, « E haere ti‘a matou ia vai ra? Tei ia oe hoi te parau o te ora mure ore ra » (Ioane 6:68).
I roto i taua hi‘oraa atea ra, ua ti‘a i teie mau pĭpĭ faaroo e te itoito ia rave i te mau mea teimaha a ratere haere ai ratou no te poro i te evanelia e no te faati‘a i te Ekalesia i muri a‘e i to te Faaora revaraa. I te pae hopea, ua faatusia te tahi pae o ratou i to ratou ora no to ratou iteraa papû.
Te vai ra te tahi atu mau hi‘oraa i roto i te mau papa‘iraa mo‘a no te feia tei farii atoa i te hi‘oraa atea no te evanelia e i muri iho, ua haere e ua faaohipa i taua hi‘oraa atea ra. Ua roaa i te peropheta Alama to’na hi‘oraa atea a faaroo ai oia ia Abinadi i te haapiiraa e i te faaite-papû-raa ma te mata‘u ore i mua i te Arii Noa. Ua faaohipa Alama i te mau haapiiraa a Abinadi e ua haere e haapii i te mau mea ta’na i apo mai, ma te bapetizoraa e rave rahi tei ti‘aturi i ta’na parau (a hi‘o Mosia 17:1–4; 18:1–16). A hamani ino ai oia i te Feia Mo‘a i tahito ra, ua faafariuhia te Aposetolo Paulo i ni‘a i te e‘a no Damaseko e i muri iho ua faaohipa na roto i te haapiiraa e i te faaite-papû-raa no ni‘a i te Mesia (a hi‘o Te Ohipa 9:1–6, 20–22, 29).
I to tatou nei anotau, e rave rahi feia apî tamaroa e tamahine, te mau tuahine, e te mau taata faaipoipohia tei pahono i te piiraa a te hoê peropheta a te Atua ia tavini i te hoê misioni. Ma te faaroo e ma te itoito ua faaru‘e ratou i to ratou utuafare e i te mau mea atoa i matarohia e ratou no to ratou ti‘aturi i te maitai rahi o ta ratou e nehenehe e rave ei mau misionare. A faaohipa ai ratou i ta ratou hi‘oraa atea no te tavini atu, e haamaitai ratou i te oraraa o te mau taata e rave rahi, e na roto i te reira, e taui to ratou iho oraraa. I roto i te amuiraa rahi i ma‘iri a‘e nei, ua haamauruuru mai te peresideni Thomas S. Monson ia tatou no te taviniraa ta tatou i rave i te tahi e te tahi, e ua faahaamana‘o mai ia tatou i ta tatou hopoi‘a ia riro ei rima no te Atua no te haamaitai i Ta’na mau tamarii i ni‘a i te fenua nei (a hi‘o « E tae noa’tu i te taime e farerei faahou ai tatou », Liahona, Novema 2011, 108). Ua riro te faaotiraa o taua ohipa ra ei mea mahanahana no te aau, ei melo no te Ekalesia te faaohipa nei i taua hi‘oraa atea ra.
Hou te revaraa o te Faaora, i te iteraa e hinaaro tatou i te tauturu, ua parau Oia, « Eita vau e vaiiho otare noa ia outou » (Ioane 14:18). Ua haapii Oia i Ta’na mau pĭpĭ, « Na te Faaa‘o râ, na te Varua Maitai ra, o ta te Metua e tono mai ma to’u nei i‘oa ra, na’na e haapii mai ia outou i te mau mea atoa; e e faaite faahou mai hoi ia outou i te mau parau atoa ta’u i parau atu ia outou na » (Ioane 14:26). Teie atoa te Varua Maitai o te horo‘a mai i te puai ia tatou e o te faaitoito mai ia tatou ia rave i te mau mea ta te Faaora e ta to tatou mau peropheta no teie anotau e haapii nei.
Ia faaohipa ana‘e tatou i te mau haapiiraa a to tatou mau ti‘a faatere, e roaa ia tatou te iteraa hohonu a‘e no te hi‘oraa atea a to tatou Faaora no tatou. I roto i te roaraa o teie amuiraa, ua farii tatou i te parau a‘o faaûruhia mai roto mai i te mau peropheta e i te mau aposetolo. A tuatapapa i ta ratou mau haapiiraa e a feruri te reira i roto i to outou aau ma te imi i te Varua Maitai no te tauturu ia outou ia apo mai te hi‘oraa atea no taua mau haapiiraa ra i roto i to outou oraraa. Na roto i taua hi‘oraa atea ra, a faaohipa i to outou faaroo no te faaohipa i ta ratou a‘o.
A imi e a tuatapapa i te mau papa‘iraa mo‘a i roto i te hoê varua farii i te tahi atu â maramarama e te ite i ta ratou parau poro‘i no outou. A feruri te reira i roto i to outou aau e a vaiiho i te reira ia faaûru ia outou. E i muri iho, a faaohipa i ta outou faaûruraa.
Mai ta tatou i haapii i roto i to tatou utuafare, e faaohipa tatou ia haapae ana‘e tatou i te maa e ia pure. Ua parau o Alama no ni‘a i te haapaeraa maa e te pure, ei rave‘a no te farii i te parururaa, a parau ai oia e, « I haapae a‘enei au i te maa, e i pure a‘enei hoi au i na mahana e rave rahi, ia itea taua mau mea nei ia‘u iho » (Alama 5:46). E ite-atoa-hia ia tatou nahea ia arai i te mau titauraa o to tatou oraraa na roto i te haapaeraa maa e te pure.
Te farerei nei tatou i te fifi i roto i to tatou oraraa o te nehenehe i te tahi taime e faaiti mai i to tatou hi‘oraa atea e to tatou faaroo no te rave i te mau mea i titauhia ia tatou. No te rahi o ta tatou ohipa, e mea pinepine tatou i te teimaha roa eita e maraa faahou ia rave. Noa’tu e, e mea taa ê tatou te tahi e te tahi, te parau atu nei au ma te haehaa e, e mea ti‘a ia tatou ia rotahi i ta tatou hi‘oraa atea i ni‘a i te Faaora e i Ta’na mau haapiiraa. Eaha te mea Ta’na i ite i roto ia Petero, ia Iakobo e ia Ioane e i te tahi atu mau Aposetolo tei tura‘i Ia’na ia ani ia ratou ia pee atu Ia’na? Mai Ta’na hi‘oraa atea ia ratou, e hi‘oraa atea rahi to te Faaora no ni‘a i te taata ta tatou e riro mai. E titau-atoa-hia te faaroo e te itoito mai to te mau Aposetolo matamua, ia ti‘a hoi ia tatou ia rotahi faahou i ni‘a i te mau mea faufaa a‘e i roto i te faatupuraa i te oaoa e te poupou rahi hope ore.
Ia tuatapapa ana‘e tatou i te oraraa o to tatou Faaora e Ta’na mau haapiiraa, te ite nei tatou Ia’na i rotopu i te taata te haapii ra, te pure ra, te faateitei ra e te faaora ra. Ia pee ana‘e tatou i To’na hi‘oraa maitai e e rave i te mau mea ta tatou i ite Ia’na i te raveraa, e haamata ïa tatou i te farii i te hoê hi‘oraa atea no te taata ta tatou e nehenehe e riro mai. E farii outou i te haamaitairaa o te ite na roto i te tauturu a te Varua Maitai no te rave i te maitai hau atu. Ei reira te tauiraa e haamata ai i te tae mai, ei reira ho‘i outou e horo‘a ai i te hoê tereraa taa ê atu i to outou oraraa o te haamaitai ia outou e i to outou utuafare. A haa ai Oia i rotopu i te Ati Nephi, ua ui te Faaora e, « Eaha to outou huru e au ai ? » Ua pahono mai oia e, « Mai to’u nei ïa » (3 Nephi 27:27). E hinaaro tatou i Ta’na tauturu no te riro mai Ia’na te huru, e ua faaite mai Oia ia tatou i te rave‘a: « E ani, e horo‘ahia mai ta outou; e patoto atu, e iritihia mai te opani ia outou; o te ani hoi, o te roaa ïa ta’na ra; e o te patoto atu, o te iritihia te opani ia’na » (3 Nephi 27:29).
Ua ite au e, mai te mea e, e noaa ia tatou te hoê hi‘oraa atea no tatou iho mai ta te Faaora e hi‘o mai nei ia tatou, e mai te mea e, e faaohipa tatou i te reira hi‘oraa atea, e haamaitaihia to tatou oraraa i te mau maitai e rave rahi. Aua‘e te hi‘oraa atea a to’u na metua, aita te reira i haamaitai noa i to’u oraraa i te fariiraa i te ite haapiiraa, ua tuu-atoa-hia râ vau i roto i te hoê oraraa i reira hoi au i ite ai e i farii ai i te evanelia. Te vahi faufaa roa’tu, ua apo mai au i te auraa o te metua maitai e te faaroo.
Mai te hi‘oraa atea i arata‘i i to’u na metua ia haapae i te maa e ia pure no te oraraa maitai o ta raua mau tamarii e mai te hi‘oraa atea a te mau Aposetolo i tahito ra i arata‘i ia ratou ia pee i te Faaora, e roaa taua hi‘oraa atea ra no te faaûru e e tauturu ia tatou ia haa. E te mau taea‘e e te mau tuahine, e nunaa taata tatou e te hoê aamu no te hi‘oraa atea e no te faaroo e no te itoito ia faaohipa. A hi‘o i to tatou huru i teie nei e i te mau haamaitairaa ta tatou i farii! A ti‘aturi e, e nehenehe Ta’na e haamaitai ia tatou ma te horo‘a mai i te hi‘oraa atea i roto i to tatou oraraa e i te itoito no te haa.
Te faaite nei au i to’u iteraa papû no ni‘a i te Faaora e To’na hinaaro ia ho‘i tatou Ia’na ra. No te rave i te reira, e mea ti‘a ia vai te faaroo i roto ia tatou no te rave—no te pee Ia’na e ia riro mai Ia’na te huru. I roto i tera e tera taime o to tatou oraraa, te faatoro mai nei Oia i To’na rima e te ani mai nei ia tatou:
« A rave mai i tau zugo i ni‘a ia outou, e ia haapiihia outou e au, te marû nei hoi au e te haehaa o te aau: e e noaa hoi te ora i to outou varua.
« Te marû nei ho ta’u zugo e te mama nei ta’u hopoi‘a » (Mataio 11:29–30).
Mai te Faaora i ite i te puai rahi i roto i Ta’na mau pĭpĭ i tahito ra, te ite atoa nei Oia i te reira i roto ia tatou. E mata na tatou i te hi‘o ia tatou mai ta te Faaora e hi‘o nei ia tatou. Te pure nei au ia roaa ia tatou taua hi‘oraa atea ra ma te faaroo e te itoito no te rave, na roto i te i‘oa o Iesu Mesia ra, amene.