Parau apî na te mau taata aravihi haapa‘o i te feia huma tei tuuhia i ni‘a i te LDS.org
No Julie Brink no Indiana, i te mau Hau Amui no Marite, ua atuatu oia i te hoê tamahine taria turi e ua tavini atoa ei taata auvaha na te mau vava reo marite i roto i to’na tĭtĭ. No Elaine Allison no Arizona, i te mau Hau Amui no Marite, ua haa maoro oia ei orometua haapii, i reira ua matau oia i te tahi mau piahi huma. Hoê o ta’na tamaiti fetii tei roohia i te ma‘i toromotoma hau (trisomie) e te tahi atoa o to’na mau hoa tei roohia i te « sclérose » e te « SLA », e aore râ te ma‘i Lou Gehrig (te tahi ma‘i haaparuparu).
Aita te tuahine Brink na reira atoa te tuahine Allison e faariro nei ia raua ei « taata ite hope » i te mau humaraa atoa, atira noa’tu, ua tavini raua ei taata aravihi haapa‘o i te feia huma, te hoê piiraa tei amuihia i roto i te tuhaa « Servir dans l’Eglise » no te LDS.org na roto i na 10 reo. (Te vai ra paha teie piiraa i te faito o te tĭtĭ e aore râ o te paroisa e aore râ, e mea titau ana‘e, no na faito toopiti.)
Noa’tu e, e mea poto noa te parau no te taata aravihi haapa‘o i te feia huma, no te paroisa anei e aore râ no te tĭtĭ, i roto i te Manuel 2: Administration de l’Eglise, te uiui nei te tahi feia faatere i te huru mau o tera piiraa.
« Te vai ra te taime eita te feia faatere o te paroisa e ite mai i te hinaaro e aore râ te mea e rave no te pahono i te taua mau aniraa taa ê ia itehia mai », te parau nei Christopher Phillips, ti‘a faatere no te pû haapa‘o i te feia huma a te Ekalesia. « Te vai ra te tahi mau ohipa e riro te hoê taata aravihi haapa‘o i te feia huma i te tauturu rahi mai, aita râ te mau taata e ite nei te vai ra teie piiraa.
« Aita teie tuhaa itenati apî i i raro a‘e i te « Servir dans l’Eglise » e faataa nei i te mau ohipa atoa ta te hoê taata e rave atu, e horo‘a râ te reira i te tahi mau mana‘o e te tahi mau tauturu e nehenehe ai te taata e tavini ra i taua ti‘araa ra e tauturu i te feia faatere, te mau orometua, e te mau utuafare e tafifi ra e te taata huma ».
Te mau parau i tuuhia i ni‘a i te LDS.org i roto i na 10 reo, te faatumu ra ïa i ni‘a i te mau rave‘a ta te taata aravihi e nehenehe e faaohipa no te tauturu i te feia faatere o te paroisa e o te tĭtĭ:
-
Faataa mai e haamatau i te feia huma e to ratou utuafare i roto i te paroisa e te tĭtĭ.
-
Faaô i te mau melo huma i roto i te mau apooraa e te mau faaoaoaraa.
-
Pahono i te mau aniraa e te mau mana‘ona‘oraa e au i te humaraa a te mau metua anei, te feia faatere, te tahi atu taata.
-
Faataa i te mau rave‘a no te mau melo huma ia tavini.
-
Faataa i te mau hinaaro o te mau utuafare (mai te aupururaa atoa) e, ua tano anei, faataa i te mau tauturu e itehia i te mau pû o te hau, i roto i te paroisa, e i roto atoa i te tĭtĭ no te tauturu ia ratou i roto i te fifi.
E mea faufaa roa ia parauhia e, eita na te taata aravihi haapa‘o i te feia huma ana‘e te hopoi‘a ia rave i te reira mau mea. Teie râ ta’na hopoi‘a, ia tauturu i te feia faatere ia maramarama a‘e e ia tavini i te feia huma. E teie atoa te tahi ohipa ta te taata aravihi haapa‘o i te feia huma e ti‘a e rave, oia ho‘i « e tauturu i te taata atoa e te mau metua e faaruru nei i te humaraa e faaite mai i te mea ta ratou i ite i te mau melo o te paroisa na reira atoa i te feia faatere ».
E tauturu te mau parau apî na roto i na 10 reo tei tuuhia i ni‘a i te LDS.org i te feia tei piihia ei taata aravihi haapa‘o i te feia huma ia haapuai i te mau melo o te Ekalesia e faaruru nei i te humaraa.