Elder Richard J. Maynes
No te peresideniraa no te Hitu Ahuru
« E tamarii na te Atua te mau taata atoa na te ao nei, e ua here aifaito Oia i Ta’na mau tamarii atoa », te na ô ra Elder Richard John Maynes, tei pii-apî-hia i roto i te peresideniraa no te Hitu Ahuru. Tera mau, te na ô ra oia, te parau tumu matamua roa e tae mai i to’na mana‘o a feruri ai oia i ta’na mau taviniraa na te ara, i te mau fenua Uruguay, Paraguay, Mexico, Ecuador, Peru, e Philippines.
« Te mau haamaitairaa mure ore e tae mai na roto i te fariiraa e i reira, te oraraa i te mau parau tumu ta Iesu Mesia i haapii, e riro ïa te reira i te faatae roa i te faateiteiraa o te mau tamarii atoa a te Metua i te Ao ra, noa’tu te vahi e ora ra ratou e te mau tamataraa e faaruru ra ratou i roto i teie ao tamataraa », ua na ô faahou mai oia.
Fanauhia Elder Maynes i te ava‘e atopa 1950 i Berkeley, i California, i te mau Hau Amui no Marite, e Stan raua Betty Maynes, ua haamata ta’na taviniraa na te ara i te matahiti 1969 a tavini ai oia ei misionare rave tamau i te mau fenua Paraguay e Uruguay e tae roa’tu i te matahiti 1971.
Ua faaipoipo oia ia Nancy Purrington, ta’na i matau i te hoê vahi fariiraa ratere i Idaho, i te ava‘e atete 1974 i roto i te hiero no Manti Utah. E maha tamarii ta raua.
Ua farii Elder Maynes i ta’na parau tu‘ite i tera iho matahiti mai te hapiiraa tuatoru Brigham Young University, e parau tu‘ite no te faatereraa taiete, e i muri iho ua farii oia i te parau tu‘ite « MBA » mai te fare haapiiraa Thunderbird School of Global Management. Ua ohipa oia ei fatu taiete e ei upoo faatere rahi no te hoê taiete matau maitai i te hamaniraa i te mau matini ihotere.
Ua tavini Elder Maynes ei peresideni no te Misioni no Mexico Monterrey mai te matahiti 1989 i te matahiti 1992. Ua piihia oia ei Hui mana faatere i te matahiti 1997. Mai te reira â taime, ua tavini oia i roto i te mau peresideniraa o te mau area no te pae Apatoa no Marite Apatoeraa hiti‘a o te râ, no te pae Apatoa no Marite Too‘a o te râ, e no te fenua Philippines. Ua tavini atoa oia i roto i te apoora tomite faatere autahu‘araa ei tauturu upoo faatere i roto i te Tuhaa faatere misionare, e ei upoo faatere no te Tuhaa faatere no te Aamu utuafare.
Ua piihia oia i te 20 no tenuare 2012 ia tavini i roto i te peresideniraa no te Hitu Ahuru, no te mono ia Elder Steven E. Snow, tei piihia ei taata tuatapaparaa parau a te Ekalesia e ei papa‘i parau rahi atoa.