E noaa te aroha i tei aroha ia vetahi ê ra
Ia î ana‘e to tatou mau aau i te here o te Atua, e « hamani maitai ïa tatou ia tatou iho, ma te aau mărû aroha noa, ma te faaore hoi i te hara [i te tahi e te tahi], mai ta te Atua i [faaore i ta tatou] i te Mesia ra ».
E au mau taea‘e e tuahine here, aita i maoro a‘enei ua farii au i te hoê rata na te hoê metua vahine mana‘o pe‘ape‘a tei taparu mai ia horo‘ahia te hoê a‘oraa i te amuiraa rahi no ni‘a i te hoê tumu parau o te haamaitai taa ê i ta’na na tamarii e piti. Ua tupu te hoê pe‘ape‘a i rotopu ia raua e aita raua e paraparau faahou te tahi i te tahi. Ua oto te metua vahine. Ua haapapû mai oia i roto i te rata e e faahau ïa te hoê poro‘i no te amuiraa rahi no ni‘a i teie tumu parau i ta’na na tamarii e e afaro ïa te mau mea atoa.
Te aniraa hohonu a teie tuahine maitai o te hoê ïa o te mau faaûruraa e rave rahi ta’u i farii i teie mau ava‘e i ma‘iri a‘enei e e ti‘a ia’u ia parau i teie mahana no ni‘a i te hoê tumu parau o te riro nei ei haape‘ape‘araa rahi—eiha noa no te hoê metua vahine mana‘o pe‘ape‘a, no te mau taata ra e rave rahi i roto i te Ekalesia, e oia mau, i roto i te ao nei.
Ua putapû to’u aau i te faaroo o teie metua vahine here e e nehenehe te hoê a‘oraa i te amuiraa rahi e tauturu i te haamaitai i te auraa i rotopu i ta’na na tamarii. Ua papû ia’u e to’na ti‘aturiraa e ere ïa tei ni‘a i te aravihi o te feia a‘o tei roto râ « i te mana rahi o te parau a te Atua » tei « hau i ni‘a i te aau o te taata… i te tahi mau mea atoa ».1 E te tuahine here e, te pure nei au ia haaputapû te Varua i te aau o ta oe na tamarii.
Ia ino ana‘e te mau auraa
Ua tupu noa na te mau auraa fifi e tei mutu a ora noa‘i te taata. O Kaina te taata matamua tei faati‘a i te inoino e te iria ia haaviivii i to’na aau. Ua tauturu oia i te mana‘o nounou e te au ore ia tupu i roto ia’na e ua vaiiho i teie mau mana‘o ia haapē roa e tae noa’tu ua rave oia i te mea mana‘o-ore-hia—te taparahiraa i to’na iho taea‘e e te riroraa te metua o te mau haavare a Satane.2
Mai taua mau mahana matamua mai â ua faatupu te mana‘o nounou e te au ore i te tahi o te mau aamu oto roa‘e i roto i te aai. Ua aro Saula ia Davida, te mau tamaiti a Iakobo i to ratou taea‘e o Iosepha, o Lamana e Lemuela ia Nephi, e Amalikia ia Moroni.
Te mana‘o nei au e ua roo-rii-hia te mau taata atoa i te fenua nei i teie mana‘o aro, te inoino e te tahoo. Peneia‘e te vai atoa ra te mau taime ua ite tatou i teie varua i roto ia tatou iho. Ia mauiui, ia riri aore râ ia nounou tatou, e mea ohie ïa ia haavâ i te tahi atu mau taata, e ia faaoti e mea ino ta ratou mau ohipa no te faati‘a i to tatou iho mau mana‘o inoino.
Te haapiiraa tumu
Oia mau, ua ite tatou e e mea hape te reira. E mea maramarama te haapiiraa tumu. Te ti‘aturi paatoa nei tatou i ni‘a i te Faaora; aore roa te hoê o tatou e nehenehe e faaorahia maori râ na roto Ia’na. E mea huru rahi e te mure ore te Taraehara a te Mesia. E tae mai te faaoreraa i ta tatou mau hara na roto i te tahi mau titauraa. E ti‘a ia tatou ia tatarahapa, e ti‘a ia tatou ia hinaaro i te faaore i te hapa a vetahi ê. Ua haapii Iesu e: « Ia faaore outou te tahi i ta te tahi ra hapa ; no te mea o oia o tei ore i faaore i te hapa… ua vai faahapahia oia i mua i te Fatu ; no te mea tei roto ia’na te hara rahi a‘e »3 e « E ao to tei aroha ia vetahi ê ra, e aroha-atoa-hia mai ratou ».4
Oia mau, e mea tano mau teie mau parau—ia faaohipahia i ni‘a i te tahi ê atu taata. E nehenehe ta tatou e ite maramarama e ma te ohie i te mau hotu ino e tae mai ia haavâ ana‘e e ia inoino ana‘e vetahi ê. E eita iho â tatou e au ia haavâ ana‘e te mau taata ia tatou.
Ia tae mai râ i to tatou iho mau mana‘o hape e to tatou mau inoino, e mea pinepine tatou i te faatano i to tatou riri e ta tatou faahaparaa. Noa’tu eita e nehenehe ia tatou ia hi‘o atu i roto i te aau o te tahi atu taata, e mana‘o râ tatou e ua ite tatou i te hoê tumu ino aore râ te hoê taata ino ia ite ana‘e tatou i te reira. E haapae tatou i te haavâ i to tatou iho inoino no te mea te mana‘o nei tatou e tei ia tatou ra te haamaramaramaraa atoa e hinaarohia e tatou no te haavahavaha i te tahi ê atu taata.
Ua parau te Aposetolo Paulo i roto i ta’na rata i to Roma e aita te mau taata o te faahapa ia vetahi ê e « faatiahia ». Te parau ra oia, e te taime e haavâ ai tatou i te tahi atu taata, te faahapa ra ïa tatou ia tatou iho, no te mea e feia hara ana‘e tatou.5 Te oreraa e faaore i ta vetahi ê hapa e hara rahi ïa—ta te Faaora ïa i faaara. Ua imi ta Iesu iho mau pĭpĭ i te pari [te tahi i te tahi] e aita hoi ratou i faaore i ta te tahi ra hara i roto i to ratou mau aau; e no taua ino ra ratou i roohia‘i i te ati e i faautu‘a-roa-hia‘i hoi ».6
Ua parau maramarama mai to tatou Faaora no ni‘a i teie tumu parau e aita ïa e tatararaa ê atu. Ua parau Oia, e « E faaore au, o te Fatu, i te hara a ratou ta’u i hinaaro i te faaore atu, ia outou râ ua titauhia’tu ra outou ia faaore i te hapa a te taata atoa ».7
E tuu vau i te tahi haamaramaramaraa i ǒ nei. Ia titau ana‘e te Fatu e ia faaore tatou i te hapa a te mau taata atoa, tei roto atoa ïa te faaoreraa i ta tatou iho hapa. I te tahi mau taime, te taata etaeta roa‘e i te faaore atu i te hapa—e penei a‘e te taata e hinaaro rahi nei i ta tatou faaoreraa hapa—o tatou iho ïa.
Te tufaa faufaa rahi
E nehenehe i teie tumu parau no te haavâraa ia vetahi ê e haapiihia i roto i te hoê a‘oraa e piti ta‘o parau. No ni‘a i te parau no te au ore, te afa‘ifa‘i parau, te tau‘a ore, te haavahavaha, te tape‘araa i te inoino, aore râ te hinaaroraa i te faatupu i te ino, a faaohipa i teie arata‘iraa:
A faaea !
Mea ohie roa. E ti‘a noa ia tatou ia faaea i te haavâ ia vetahi ê e ia mono i te mau mana‘o faahapa i te aau aroha rahi no te Atua e Ta’na mau tamarii. O te Atua to tatou Metua. E mau tamarii tatou Na’na. E mau taea‘e e mau tuahine paatoa tatou. Aita vau i ite maitai nahea râ i te faataa maramarama maitai atu i teie parau no te oreraa e haavâ ia vetahi ia nehenehe ia outou ia haamana‘o noa i te reira. E nehenehe ta’u e faahiti i te papa‘iraa mo‘a, e nehenehe ta’u e tamata i te hohora’tu i te haapiiraa tumu, e nehenehe atoa ta’u e faahiti i te hoê poro‘i tei tapirihia i ni‘a i te pereoo uira ta’u i ite iho nei. Ua tapirihia’tu te reira i muri i te hoê pereoo uira e e au ra e ere te taata faahoro i te huru maitai roa, area râ ua haapii mai te mau parau, tei tapirihia, i te hoê haapiiraa faufaa rahi. Te parau ra, « Eiaha e haavâ mai ia’u no te mea mea ê ta’u hara i ta oe ».
E ti‘a ia tatou ia ite e eita tatou paatoa i te mea maitai roa—e mau taata tao‘a ore ana‘e tatou i mua i te Atua. Aita anei tatou i haafatata’tu i te hoê taime ma te haehaa i te parahiraa aroha e i taparu ai no te farii i te aroha ? Aita anei tatou i hinaaro ma te puai o to tatou aau i te aroha—ia faaorehia te mau hape ta tatou i rave aore râ te mau hara ta tatou i rave ?
No te mea hoi e e te ti‘aturi paatoa nei tatou i te aroha o te Atua, nahea ïa e ti‘a‘i ia tatou ia faaere ia vetahi ê i te tahi faito no te maitai ta tatou e hinaaro rahi nei no tatou iho ? E au mau taea‘e e tuahine here, eita anei e ti‘a ia tatou ia faaore i ta vetahi ê hapa mai ta tatou e hinaaro e ia faaorehia ta tatou iho hapa ?
Te aroha o te Atua
Mea fifi anei ia na reira ?
E, oia mau.
E ere te faaoreraa i ta tatou iho hapa e ta vetahi ê i te mea ohie. No te rahiraa o tatou e titauhia ïa te hoê tauiraa rahi i roto i to tatou huru e to tatou feruriraa—e tae noa’tu i te hoê faahuru-ê-raa o te aau. Te vai ra râ te hoê parau oaoa. Teie « faahuru-ê-raa-rahi »8o te aau o te mea ihoâ ïa ta te evanelia a Iesu Mesia i faataahia i te hopoi mai i roto i to tatou oraraa.
Nahea te reira e ravehia‘i ? Na roto i te aroha o te Atua.
Ia î ana‘e to tatou mau aau i te aroha o te Atua, e tupu te tahi mea maitai e te mâ ia tatou. E « haapa‘o tatou i ta’na ra parau: e ere hoi ta’na parau i te mea teimaha. O ta te Atua hoi i fanau ra, te vi nei teie nei ao ia’na ».9
Ia rahi ana‘e ta tatou faati‘araa i te aroha o te Atua ia faatere i to tatou mau feruriraa e to tatou mau mana‘o—ia rahi ta tatou faati‘araa i to tatou aroha no to tatou Metua i te Ao ra ia tupu i roto i to tatou mau aau—e mea ohie ïa i te here ia vetahi ê i te aroha mau o te Mesia. Ia faati‘a ana‘e tatou i te Atua i faaî ia tatou i to’na aroha, e ore atu ïa to tatou mana‘o au ore e te nounou.
Ua riro te Mesia ei hi‘oraa maitai no tatou i te mau taime atoa. I roto i Ta’na mau haapiiraa e i roto i To’na iho oraraa, ua faaite mai Oia ia tatou te e‘a. Ua here e ua faaore oia i te hapa a te feia ino, te taata parau ino, e te feia atoa tei tutava i te hamani ino Ia’na.
Ua parau o Iesu e mea ohie ia here i te feia e here nei ia tatou, e nehenehe roa atoa i te taata ino ia na reira. Ua haapii râ o Iesu i te hoê ture teitei a‘e. Ua parau oia i teie mau parau i te mau tau i ma‘iri e no tatou atoa nei. Ua faataahia te reira mau parau no te taatoaraa e hinaaro ia riro ei pĭpĭ Na’na. Ua faataahia te reira no outou e no’u nei: « E aroha’tu i to outou mau enemi, e faaora’tu i tei tuhi mai ia outou, e hamani maitai atu i te feia i riri mai ia outou, e pure hoi i te feia i parau ino mai e tei hamani ino mai ia outou ».10
Ia î ana‘e to tatou mau aau i te here o te Atua, e « hamani maitai ïa tatou ia tatou iho, ma te aau mărû aroha noa, ma te faaore hoi i te hara [i te tahi e te tahi], mai ta te Atua i [faaore i ta tatou] i te Mesia ra ».11
E nehenehe te here mau o te Fatu e iriti ê i te mau mana‘o inoino e te iria, ma te faati‘a ia tatou ia hi‘o atu ia vetahi ê mai ta to tatou Metua i te Ao ra e hi‘o nei ia tatou: e mau taata hapa e te maitai ore tatou paatoa e e mana e e faufaa hoi to tatou eita e noaa ia tatou i te feruri. No te mea hoi ua here rahi te Atua ia tatou, e ti‘a atoa ïa ia tatou ia here e ia faaore i te hapa a te tahi e te tahi.
Te e‘a o te pĭpĭ
E to’u mau taea‘e e tuahine, a feruri na i teie mau uiraa ei tamataraa ia tatou iho:
Te tape‘a anei ra outou i te mana‘o inoino no te tahi ê atu taata ?
Te afa‘ifa‘i anei ra outou i te parau noa’tu e e parau mau paha ta outou e parau nei ?
Te ti‘avaru, te faatea ê anei ra outou ia outou aore râ te faautu‘a anei ra outou ia vetahi ê no te tahi mea ta ratou i rave ?
Te nounou huna anei ra outou i te tahi ê atu taata ?
Te hinaaro ra anei outou i te hamani ino i te tahi taata ?
Mai te mea ua pahono outou ē i te hoê o teie mau uiraa, e ti‘a paha ïa outou ia faaohipa i te a‘oraa e piti ta‘o parau tei faahitihia’tu: a faaea!
I roto i te hoê ao faahapa e te au ore, e mea ohie ïa ia imi i te mau tumu no te au ore e no te faatura ore ia vetahi ê. Hou râ tatou e na reira ai, e haamana‘o na tatou i te mau parau a te taata tei riro ei Fatu e ei hoho‘a no tatou: « Na te taata hara ore i rotopu ia outou na e taora’tu na i te ofai matamua ia’na ».12
Te mau taea‘e e te mau tuahine, e tuu na tatou i ta tatou mau ofa‘i i raro.
E hamani maitai na tatou i te taata.
E faaore na tatou i ta vetahi ê hapa.
E parau hau na tatou te tahi i te tahi.
E faaî na tatou i to tatou mau aau i te aroha o te Atua.
« E hamani maitai na tatou i te taata atoa ».13
Ua fafau te Faaora: « E horoa, e e noaa hoi ta outou; e î te faito, e neneihia, e ueuehia,e manii noa’tu, na te taata ninii i roto i to outou ahu. O taua faito hoi ta outou e [faaohipa atu], o te faito-faahou-hia mai ïa ta outou ».14
Eita anei teie fafauraa e nava‘i no te tura‘i ia tatou ia haapuai i ta tatou mau tautooraa i ni‘a i te mau ohipa maitai, te faaoreraa hara, e te aroha eiaha râ te peu ino ?
Ei mau pĭpĭ na Iesu Mesia, e hamani maitai na tatou i te taata noa’tu e aita tatou e hamani-maitai-hia mai.15 Eiaha na tatou e imi i te tahooraa aore râ e faati‘a i to tatou riri ia haavî ia tatou.
« Ua papaihia hoi e, Te parau maira Iehova, Ei ia’u te riri, na’u ïa e tahoo atu.
« E teie nei, te poia ra to enemi, faaamu atu ia’na ; e te poihâ ra, faainu atu ia’na…
« Eiaha ia pohe i te ino, ia pohe râ te ino ia oe i te maitai ».16
A haamana‘o: i te pae hope‘a, e noaa te aroha i tei aroha ia vetahi ê ra.17
Ei melo no Te Ekalesia a Iesu Mesia i te Feia Mo‘a i te mau Mahana Hopea Nei, noa’tu tei hea tatou, ia itehia tatou ei hoê nunaa « e aroha hoi to tatou ia tatou iho ».18
A here te tahi i te tahi.
Te mau taea‘e e te mau tuahine, ua nava‘i te mauiui e te oto i roto i teie oraraa ma te ore e faarahi atu i te reira na roto i to tatou iho etaeta, to tatou mana‘o iria e te inoino.
E ere tatou i te mea maitai roa.
E ere te mau taata e haati nei ia tatou i te mea maitai roa.19 Te rave nei te taata i te mau mea o te haape‘ape‘a, o te faaoto, e o te faariri. Mai te reira noa ihoâ te huru i roto i teie oraraa tahuti nei.
Noa’tu râ e ti‘a ia tatou ia vaiiho i to tatou inoino. Te tahi tumu no te oraraa tahuti nei o te haapiiraa ïa e nahea ia vaiiho i taua mau mea ra. O te e‘a ïa a te Fatu.
A haamana‘o, ua î te ra‘i i te mau taata e mau nei i teie na mea: Ua faaorehia ta ratou mau hara. E ua faaore ratou i ta vetahi ê hara.
E vaiiho na tatou i to tatou inoino i te avae o te Faaora. Eiaha e haavâ. A faati‘a i te Taraehara a te Mesia ia taui e ia faaora i to outou aau. A aroha te tahi i te tahi. A faaore i ta vetahi ê hapa.
E noaa ïa te aroha i tei aroha ia vetahi ê ra.
Te faaite papû atu nei au i te reira i te i‘oa o Tei here maitai e hope roa i horo‘a ai Oia i To’na ra ora no tatou—To’na mau hoa, i te i‘oa mo‘a o Iesu te Mesia, amene.