Te mau haapiipiiraa pŭpŭ tauturu i ni‘a i te reni na roto i te reo peretane e te reo paniora
No te tauturu i te feia faatere ia haapii i ta ratou mau hopoi‘a e no te faaite ia ratou i te mau materia tauturu e nehenehe e faaohipa no te haapiipiiraa i te feia faatere autahu‘araa e te mau pŭpŭ tauturu, ua faatupu te mau peresideniraa rahi o na maha pŭpŭ tauturu o te Ekalesia i te tahi haapiipiiraa na te feia faaatere no te mau pŭpŭ tauturu o te tĭtĭ e o te paroisa i te hopea ava‘e mati. (E faatupuhia te haapiipiiraa na te feia faatere Feia Apî Tamaroa i te 10 no me). Te haaparareraa itenati, te mea ti‘a e te mea poro‘ihia, ua faahaerehia e aore râ e faahaerehia no na pŭpŭ tauturu e pae na roto i te reo peretane e te reo paniora. I muri nei te hoê haapotoraa no na tuhaa haapiipiiraa tei faatupuhia i te ava‘e mati no ratou aita e tomoraa.
Paraimere
Te fâ o te Paraimere, o te tautururaa ïa i te mau tamarii i ni‘a i te e‘a no te faafariuraa, te na ô ra Rosemary M. Wixom, te peresideni rahi no te Paraimere, i te haapiipiiraa pŭpŭ tauturu na te feia faatere no te Paraimere i te 28 e te 29 no mati.
« Ua hinaaro tatou [i te mau tamarii no te Paraimere] ia farii i to ratou aau, ia here, e ia rave », ua na ô mai oia. « Ua hinaaro tatou ia ratou ia farii i te hoê iteraa papû… Te iteraa papû, o te faahitiraa ïa. Ua hinaaro tatou ia faanuu atu â te taahiraa. Te faafariuraa, o te raveraa ïa. Ua hinaaro tatou i teie mau tamarii ia farii ia putapu i te mau huero no te faafariuraa i roto i to ratou oraraa ».
Te tuahine Wixom e to’na na tauturu, Jean A. Stevens e Cheryl A. Esplin, ua parau ratou i te feia faatere no te Paraimere i roto i te tĭtĭ e te paroisa e, ua nehenehe ia ratou ia tauturu i te mau metua ia tanu i te reira mau huero no te faafariuraa. Ua parau te tuahine Wixom e, e haamata te ohipa no te faafariuraa i te apîraa o te matahiti. « Te tereraa mau, e haamata te reira i te fare, i reira te mau metua e here nei i te Fatu ma to ratou aau atoa, ma to ratou varua atoa, e ma to ratou puai atoa. E na ratou e haapii i ta ratou mau tamarii ».
Ua parau mai oia e, e maramarama te mau tamarii i te auraa ia riro ei taata faafariuhia « mai te peu e rave tatou i te tahi taime no te haapii ia ratou ». E ua parau faahou mai, ia ore te mau metua e te Paraimere e haapii ia ratou, « na te ao ïa e haapii ia ratou ».
Ua horo‘a atoa te mau melo o te apooraa faatere rahi o te Paraimere i te tahi mau hi‘oraa no te faaohipa i te himene no te haapii i te mau parau tumu o te evanelia e no ni‘a atoa i te mau materia tauturu na te feia faatere o te Paraimere tei ni‘a i te LDS.org.
Sotaiete Tauturu
« Te arata‘i nei outou i te hoê ohipa rahi ! » Ta Julie B. Beck, tei haamauruuruhia ei peresideni rahi no te Sotaiete Tauturu i te tuhaa pureraa o te amuiraa rahi i te mahana maa avatea ra, i parau i te feia faatere no te Sotaiete Tauturu i te taime no te haapiipiiraa pŭpŭ tauturu i te 27 e te 28 no mati. « Na te Fatu teie ohipa… E hopoi‘a faufaa rahi ta tatou ».
Ua parau te tuahine Beck no te tahi mau tumu parau rau, mai te fâ o te Sotaiete Tauturu, te ti‘araa faufaa rahi o te mau vahine i roto i te utuafare, na reira atoa te haapiiraa (i te mau tuahine apî ihoa râ o te Ekalesia), te ohiparaa ei tomite, e te mau parau tumu no te faatereraa.
Ma te faatumu noa i te ni‘a i te papa o te mau tumu parau, ua na ô mai te tuahine Beck: « E ohipa ohie teie, e na te Fatu e faaite mai i te mau mana‘o tumu. Ia feruri tatou i te mea e ti‘a ia tatou ia rave, e tauturu mai Oia ia tatou faariro i te heheuraa ei ohipa. E farii tamau noa tatou i te heheuraa i te roaraa o te e‘a ».
I roto i ta ratou mau haapiiraa, ua faatumu te peresideniraa rahi e te apooraa faatere rahi o te Sotaiete Tauturu i ni‘a i te imiraa i te pahonoraa i roto i te Manuel 2: Administration de l’Eglise e i ni‘a atoa i te E mau Tamarii Tamahine i roto i To’u Basileia: Te aamu e te ohipa a te Sotaiete Tauturu.
Haapiiraa Sabati
Te « Bibliothèque pour la formation des dirigeants » (Vairaa materia no te haapiipiiraa i te feia faatere), o te hoê ïa materia apî i ni‘a i te LDS.org, o te reira ïa te onoonoraa i roto i te haapiipiiraa pŭpŭ tauturu a te Haapiiraa Sabati tei faatupuhia i te 28 no mati.
Maa tuhaa o te mau hoho‘a rau i roto i te vairaa materia tei faaitehia no te turu i te tau‘araa parau ta Russell T. Osguthorpe, peresideni rahi o te Haapiiraa Sabati, i faataa no na tumu parau rahi e maha o te haapiipiiraa:
-
Te hopoi‘a a te hoê taata faatere no te Haapiiraa Sabati paroisa e tĭtĭ.
-
Nahea e tauturu ia vetahi ê ia maramarama i te hopoi‘a a te peresideniraa Haapiiraa Sabati ia haamaitai i te haapiiraa i roto i te mau faanahoraa a te paroisa e a te tĭtĭ.
-
Nahea e apoo tahoê mai ei peresideniraa ia rahi faahou atu te manuiaraa.
-
Nahea e arata‘i i te mau orometua e e tuu atu i te materia tauturu maitai a‘e.
« Te vairaa materia no te haapiipiiraa i te feia faatere, e ite outou e, e riro te reira ei hoê o te mau tauihaa tauturu mau no te haapiipii i te mau melo o te tahi mau pŭpŭ tauturu e o te Haapiiraa Sabati i ta ratou hopoi‘a », ua na ô mai David M. McConkie, tauturu matamua i roto i te peresideniraa rahi o te Haapiiraa Sabati. « Na te mau pŭpŭ tauturu atoa i roto i te Ekalesia, te mau melo no te Hitu Ahuru, [e] te mau melo no te Pŭpŭ no te Tino Ahuru Ma Piti Aposetolo i faaineine i teie vairaa materia. E opuaraa teie tei titau e rave rahi roa matahiti, e ua purara roa na te mau fenua e rave rahi ».
E nehenehe e tomo i ni‘a i te vairaa materia i te LDS.org na roto i te pataraa i ni‘a i te Menu i te piaraa matamua e i reira e pata i ni‘a i te parau « Bibliothèque pour la formation des dirigeants » i raro a‘e te parau Service.
Feia Apî Tamahine
« Aita te mau faatureraa i taui, o te ao tei taui », ua parau mai Elaine S. Dalton, peresideni rahi o te Feia Apî Tamahine, i te haapiipiiraa pŭpŭ tauturu na te Feia Apî Tamahine i te 27 e te 28 no mati. Ua faaitoito oia i te feia faatere ia « taui i te ao » na roto i te faaiteraa i te hi‘oraa maitai o te hoê oraraa viivii ore.
« Aita to outou piiraa i te mea mana‘o-haere-noa-hia », te na ô ra oia. « Te huru o to outou hi‘oraa, to outou huru ahuraa, e to outou mata ataata, e ma‘iri te reira i ni‘a i teie na feia apî tamahine… ia ti‘a noa outou i rotopu ia ratou ma te haapii ia ratou i te popou ia riro ei hoê vahine e ia ora i te evanelia… E ti‘a ia tatou ia ahu i te ahu tano. E ti‘a ia tatou ia vai ara. E mea titau ia tatou ia haapii atu na roto i te hi‘oraa e te here rahi ».
Na tauturu i roto i te peresideniraa rahi o te Feia Apî Tamahine, Mary N. Cook e Ann M. Dibb, ua paraparau raua no te faufaa ia « tuu i te mau Tarona ia arata‘i ». Ua faaohipa na tauturu i te puhaparaa na te Feia Apî Tamahine—o te faahanahana nei i te 100raa o te matahiti i teie matahiti—ei hoê hi‘oraa no te tuu i te mau Tarona ia arata‘i, tera râ, ua parau atoa mai raua e, te vai nei te mau taime rahi no te feia faatere ia opere i te mau hopoi‘a, e na reira e faaohipa ai i te feia apî tamahine.
Ua faatumu atoa te mau taata a‘o i ni‘a i te mau materia e vai ra—te mau tahua itenati, te mau parau papa‘i, te mau hoho‘a, te mau buka arata‘i, e te buka iti No te Puai o te Feia Apî—tei faaineinehia no te feia faatere ia nehenehe ia ratou ia ite i te tahi mau mana‘o e tauturu.
Ua riro te « Bibliothèque pour la formation des dirigeants » (Vairaa materia no te haapiipiiraa i te feia faatere) ei hoê faatumuraa na te haapiipiiraa pŭpŭ tauturu a te Haapiiraa Sabati i te 28 no mati. Te faanahoraa no te Haapiiraa Sabati, no te Paraimere, no te Sotaiete Tauturu, e no te Feia Apî Tamahine, ua faatupu ratou tata‘itahi i te hoê haapiipiiraa i mua i te taata e na roto atoa i te Itenati na mua a‘e te amuiraa rahi no eperera. E faatupu te faanahoraa no te Feia Apî Tamaroa i ta ratou haapiipiiraa i te 10 no me.