ʻOku Fie Maʻu Ke u Foki

Nesitā Kuewlalesi, Potukali

ʻI ha pō ʻe taha, lolotonga ʻeku hoko ko ha taki lakanga fakataulaʻeiki ʻi Lōlei ʻi Potukalí, naʻá ku fakafoki ai ha niʻihi ʻo e toʻu tupú ki honau ʻapí, ʻi he ʻosi ʻo ha ʻekitivitī fakasiteiki. Naʻe fuʻu fuoloa ʻa e poʻulí, pea ʻi heʻeku lele atu ki hoku ʻapí he hili ʻeku tuku kinautolú, naʻá ku afe atu ai ʻi ha hala fakapoʻuli ʻi ha feituʻu ʻi ʻuta naʻe siʻi ai e ngaahi meʻalelé. Naʻá ku fou atu heni ʻi ha kiʻi hala fakakavakava ʻo mamata ki ha maama ʻoku takemokemo mei he tafaʻaki toʻomataʻú ʻi he veʻe vaitafé, ʻo hangē naʻe ʻi ai ha velá.

Naʻá ku fakakaukau, tuʻunga ʻi he hauhau e ʻea poʻulí, kapau naʻe ʻi ai ha vela, ʻe vave pē haʻane mate ʻi he hauhau ʻo e ʻeá, pea foki leva ʻeku tokangá ʻaʻaku ki he halá.

Neongo ia, ne ʻosi pē ha ngaahi mita siʻi ʻo ʻeku lelé, kuó u ongoʻi ha leʻo ʻoku pehē, “Tuʻu!” Naʻá ku ʻohovale koeʻuhí he ko au toko taha pē he meʻalelé, ka naʻá ku tukunoaʻi pē kae hoko atu ʻeku lelé. Ne ongo mai leva ha leʻo lahi, “Tuʻu peá ke foki!” Naʻá ku fakatafoki leva ʻa e meʻalelé ʻo foki atu. Naʻá ku ʻeke ki he Tamai Hēvaní ʻi heʻeku fokí, “ʻEiki, ko e hā e meʻa ʻoku hokó?” ʻI he taimi pē naʻá ku aʻu atu ai ki he hala fakakavakavá, naʻá ku hū leva ki tuʻa mei he meʻalelé, pea mahino e tali ʻa e ʻEikí, he naʻá ku lava ʻo fanongo ki he kaila hake mei lalo, “Kātaki, tokoni mai!”

Naʻe ʻikai ke ʻi ai ha maama feʻunga, pea naʻe ʻikai ke u lava ʻo sio ki ha meʻa tuku kehe pē ʻa e kiʻi takemokemo lanu moli hake mei laló. Naʻe ʻikai ke u ʻiloʻi pe te u tokoni fēfē, he naʻe loloto ʻaupito e ʻutu he lalo hala fakakavakavá, pea ʻikai feʻunga e māmá. Naʻá ku telefoni fakavavevave leva ki he fika telefoni ʻi he fakatuʻutāmakí, pea ʻikai fuoloa kuo ʻi ai ʻa e kau fakahaofi moʻuí ke tokoni.

Ko e kiʻi māmá mei ha kā naʻe ʻi ai ha kakai ʻe toko nima, naʻe sīfā mei he halá. Ko ha toko ua naʻe siʻi mole ʻena moʻuí, ka naʻe mei kovi ange ʻo kapau naʻe ʻikai ke u tokanga ki he leʻo ʻo e Laumālie Māʻoniʻoní.

ʻOku ou fakamoʻoni ʻoku folofola mai e ʻEikí kiate kitautolu ʻi he Laumālié, ʻo tatau ai pē pe ʻoku fai ʻaki ia ha kiʻi leʻo vaivai pe fai ʻaki ha leʻo lahi. ʻOku ou fakamālō ʻi heʻeku fanongo ki ai ʻi he pō ko iá. ʻOku ou ʻilo ʻoku moʻui ʻa e ʻEikí, ʻokú Ne ʻofa ʻiate kitautolu, pea ʻoku fetuʻutaki mo kitautolu ʻa e Laumālie Māʻoniʻoní. Ko e meʻa pē ʻoku fie maʻú ke tau tokanga ki Hono leʻó.