ʻOku Fakahā ʻi he Prophets.LDS.org ʻa e Ngaahi Piokālafi Foʻou ʻo e Kau ʻAposetolo Moʻuí

Kuo kamata hono pulusi ʻi Fēpueli ʻa e ngaahi piokālafi foʻou ʻa e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he prophets.lds.org, ʻi he konga ʻoku fakataumuʻa ko e “Meet todayʻs prophets and apostles” [“Feʻiloaki mo e kau palōfita mo e kau ʻaposetolo ʻo e ʻaho ní”]. Kuo ala maʻu atu ʻa e ngaahi piokālafi ʻo e kau mēmipa ʻo e Kau Palesitenisī ʻUluakí ʻi he saití talu mei ʻOkatopa 2011. ʻE liliu ʻa e ngaahi piokālafí ki ha ngaahi lea fakafonua kehekehe lolotonga ʻa e taʻú ʻo fakatatau mo e ngaahi maʻuʻanga tokoni ʻoku maʻú. Naʻe pulusi atu ʻa e konga lahi taha ʻo e ngaahi fakamatalá ʻi he Liahoná ʻi he ngaahi lea fakafonua kehekehe.

Naʻe pehē ʻe ʻEletā Paula B. Paipa ʻo e Kau Fitungofulú, “ʻE tokoni ke tau vakai ki he toʻukupu ʻo e ʻEikí ʻi heʻenau moʻuí mo hoko ko ha toe fakamoʻoni makehe ki he founga ʻokú Ne ui mo fakamāʻoniʻoniʻi ʻa e kau tangata mo e kau fafine ke ngāue ʻi Hono puleʻangá, ʻi heʻetau ako fekauʻaki mo ʻenau tupu haké, ngaahi taʻu akó, moʻui fakafāmilí, mo e ngaahi ngāueʻanga kimuʻa pea uiuiʻi kinautolu ki he ngaahi fatongia fakaeʻaposetoló.” ʻE fakakau ʻi he ngaahi piokālafí ha fakamatala mo e ngaahi talanoa ki he moʻui ʻa e takimuʻa takitaha, kae mahulu haké, ʻe fakahā ai e founga ʻoku teuteuʻi ai kinautolu ʻe he ʻEikí ke nau ngāué.