Tuku Atu ʻa e Uepisaiti ʻa e Siasí Maʻá e Kau Faingataʻaʻiá ʻi ha Toe Ngaahi Lea Fakafonua ʻe Hiva
ʻI he fuofua fokotuʻu ʻa e lds.org/disability ʻi he 2007 ʻi he lea faka-Pilitāniá, naʻá ne fakatahatahaʻi mai ha ngaahi fakamatala naʻe movetevete holo pē ʻi ha ngaahi tohi fakahinohino, tohi lēsoni, pea mo e ngaahi uepisaiti kehé, ʻo ne fakafaingamālieʻi ʻa e ngaahi tokoní mo e ngaahi fakakaukaú ke maʻu faingofua ange mei ha feituʻu pē ʻe taha.
ʻI he taimí ni, lolotonga ʻa e 2012, ʻoku ala maʻu atu ʻa e ngaahi maʻuʻanga tokoni ko iá (ʻa ia ʻoku kau ai ʻa e fakamatala fekauʻaki mo e ngaahi faʻahinga kehekehe ʻe 10 ʻo e faingataʻaʻiá pea mo ha ngaahi tokoni kehekehe) ʻi ha toe ngaahi lea fakafonua ʻe hiva: faka-Siaina, Falanisē, Siamane, ʻĪtali, Siapani, Kōlea, Pōtukali, Lūsia, pea mo faka-Sipeini.
ʻE tokoniʻi ʻe he fokotuʻu fakamuimui tahá ni ha ngaahi fāmili ʻo hangē ko e kau Vālini ʻo Pālesi, Falaniseé. Naʻe ʻosi ʻi ai ha foha ʻo Leimoni mo ʻIsapela Vālini ko Seilome, ʻi he taimi naʻe fāʻeleʻi ai hona foha hono uá, ko Selemī, kuó ne faingataʻaʻia ʻi he ʻikai ke lava ʻo ako ha meʻá (Down syndrome). Neongo naʻe fakaʻohovale ʻa e puke ʻa Selemií ki heʻene mātuʻá—he naʻe siʻisiʻi ʻaupito ʻena ʻilo ki he faʻahinga puke (Down syndrome) ko iá—ko e konga lahi ʻo e ngaahi aʻusia ʻo e fāmili Vāliní fekauʻaki mo e faingataʻaʻia ʻa Selemií kuo hoko pē ko ha lelei. Naʻe pehē ʻe Palata Vālini ʻoku tokolahi ʻa e kakai ʻoku nau ʻofa ʻia Selemií, ʻo tautautefito ki he kāingalotu ʻo e Siasí ʻi heʻenau matuʻaki angalelei ʻi heʻenau fakahā kiate ia ʻa e ʻofá mo e loto houngaʻiá.
ʻOkú ne tui ʻe tokoni e uepisaití ki hono pusiakiʻi e faʻahinga ʻulungāanga ko iá. Naʻá ne pehē, “Te ne lava ʻo tokoniʻi e kau taki e Siasí mo e kau faiakó ke mahino kiate kinautolu ʻa e ngaahi faingataʻaʻiá mo e founga ki hono fulihi ke feʻunga mo mapuleʻi ʻa e ngaahi tuʻunga ko iá.”
Naʻá ne pehē ka ʻoku toe mahuʻinga tatau pē ʻa e saití maʻá e kakai ʻoku faingataʻaʻiá mo honau ngaahi fāmilí—ʻo ʻikai ko ha maʻuʻanga fakamatala pē ka ko ha feituʻu ʻoku maʻu mei ai ha fakalotolahi.
Naʻá ne pehē, “ʻOku mahuʻinga ʻa e saiti ko ʻení maʻá e ngaahi fāmili ko ia ʻoku ʻi ai ha tokotaha faingataʻaʻiá, koeʻuhí ko e poupou ʻokú ne ʻomaí. ʻOkú ne ʻomai ʻa e tūkunga ʻo e meʻa naʻe aʻusiá mo e fakamoʻoni ʻa e niʻihi kehé, ʻa ia ʻokú ne fakafaingamālieʻi ha kahaʻu ʻoku lelei angé. Ki he ngaahi ʻuhinga kotoa ko ʻení ʻoku mahuʻinga ke ala maʻu atu ʻa e fakamatalá ni ʻi he ngaahi lea fakafonua kehekehe.”
ʻOku tui pehē mo ʻEletā Kifi R. ʻEtuate ʻo e Kau Fitungofulú, ʻa ia ʻokú ne faleʻi ʻa e Ngaahi Ngāue ʻa e Siasí Maʻá e Kau Faingataʻaʻiá.
Naʻe pehē ʻe ʻEletā ʻEtuate, “ʻE ʻiloʻi ʻe he kāingalotu ʻoku faingataʻaʻiá, honau ngaahi fāmilí, mo e kau tauhí ʻoku tau ngāue fakataha kotoa ki ha taumuʻa pē ʻe taha—‘ke fakahoko ʻa e moʻui taʻe-faʻa-mate mo e moʻui taʻengata ʻa e tangatá’—pea ʻoku fie maʻu ʻe he taumuʻa ko iá ke tau ‘loto-taha pē mo fakakaukau taha’” (vakai kia Mōsese 1:39; 7:18). “ʻE ʻiloʻi pea mahino ki he kakaí ʻa e feituʻu te nau ʻalu ke maʻu mei ai ha tokoní mo ʻiloʻi ʻi he taimi ʻoku ngāue totonu ai ʻa e Siasi ʻo e ʻEikí, ʻe ʻikai te nau fuesia toko taha pē ʻenau faingataʻaʻiá.”
Naʻe ʻiloʻi ʻe Fatima ʻAlavesi ʻo Potukalí, ʻa ia ʻokú ne moʻua ʻi ha fokoutua ʻo e hui-tuʻá, ʻa e tokoniʻi ia ʻe he uepisaití ke ne ʻiloʻi tonu ʻeni: ʻoku ʻikai ke ne toko taha pē.
Naʻá ne pehē, “ʻOku mahuʻinga kiate au ʻa e ʻi ai ha uepisaiti ʻa e Siasí ke tokoni ki he kakai ʻoku ʻi ai honau ngaahi faingataʻaʻiá koeʻuhí ke tau ongoʻi fāitaha ko e kāingalotu ʻo e Siasí. ʻOku tokoni ia ke tau ʻilo ʻoku tokanga ʻa e Siasí pea ʻokú ne fie tokoniʻi mo poupouʻi e kakai ʻoku ʻi ha tuʻunga makehe ʻenau moʻuí.”
Naʻe pehē ʻe ʻEletā ʻEtuate, ko hono tuku atu ʻo e saití ko e taha ia ʻo e ngaahi feinga ʻa e Siasí ke aʻu ki he mēmipa kotoa peé.
Naʻe pehē ʻe ʻEletā ʻEtuate, “Ko e konga ʻo ʻetau ‘fekau’ mei he ʻEikí ko hono ʻave ʻa e ongoongoleleí ki he tokotaha kotoa pē ʻi ha founga ʻe lava ai ke mahino kiate kinautolu mo fakaʻaongaʻi kakato ia. ʻOku tau tokanga ke ʻoua naʻa liʻaki ha konga ʻo e fānau ʻa e ʻEikí ʻi hono ʻoange ha ngaahi faingamālie ʻi he ongoongoleleí ʻoku ʻuhingamālié.”
Naʻá ne hoko atu, “ʻOku ʻikai ngata pē hono tokoniʻi ʻe he uepisaití ʻa e fakafoʻituituí ka ʻoku fokotuʻutuʻu ia ke tokoniʻi ʻa e kau takí ke nau ʻiloʻi ʻa e founga ke tokoni aí pe ko e feituʻu ʻe lava ke maʻu mei ai ha tokoni ʻi hono tauhi ʻo e kau mēmipa oku faingataʻaʻiá.”
Kae kehe, ʻoku ʻikai ʻuhinga ʻa e uepisaití ke ne fetongi ʻa e fengāueʻaki fakafoʻituitui mo fakatāutaha ʻi he kau mēmipa ʻo e Siasí.
Naʻe pehē ʻe ʻEletā ʻEtuate, “ʻI he ngaahi taʻu mai ko ʻení kuo mau maʻu ha ngaahi ola kehekehe fekauʻaki mo e ngaahi fie maʻu makehe ʻi he Siasí. ʻOku maʻu ʻa e ola leleí ʻi he taimi ʻoku fakapapauʻi ai ʻe he fakafoʻituituí ʻiate ia pē ke ne fakatupu ha liliu. Ko e kī ki hono tokoniʻi ʻa e tokotaha kotoa peé—ʻo tatau ai pē pe ʻoku nau faingataʻaʻia pe ʻikai—ko hono ʻofaʻi kinautolu mo fekumi ki he fakahinohino mei he Laumālié ʻi heʻetau kakapa atu mo tokoní.
“Kuo fekauʻi kitautolu hono kotoa pē ke tau ʻofa ʻi hotau kaungāʻapí ʻo hangē pē ko kitautolú (vakai kia Mātiu 19:19). ʻOku ʻomai ʻe he Siasí ha toe founga ʻe taha ke tokoniʻi kitautolu ke mahino pea mo ʻikunaʻi ʻetau holi ke tokoni ʻi he ngāue ʻa e ʻEikí.”
ʻE ala maʻu atu ʻi he 2012 e Saiti ʻa e Siasí ki he Kau Faingataʻaʻiá ʻi ha ngaahi lea fakafonua ʻe 10: faka-Siaina, Pilitānia, Falanisē, Siamane, ʻĪtali, Siapani, Kōlea (ʻoku hā heni), Potukali, Lūsia, mo faka-Sipeini.