ʻE Iku Nai Ki Fē ʻEku Ngaahi Filí?
ʻE lava nai ʻa Kalina ʻo liliu hono halá ʻaki ha liliu ʻene ngaahi filí?
Naʻe ʻikai toe malimali ʻa Kalina. Naʻe kamata ke ne tautaʻa—ʻo ʻikai koeʻuhí ko e faikehe ange e ʻafu ʻa e ʻeá he uike ko iá. Naʻá ne sio takai ki ha tokoni. Neongo e fuʻu tokolahi ʻa e kakai ʻi he ʻoupeni hausí ka naʻe hangē ne ʻikai mei fakatokangaʻi ʻe ha taha ʻene tuʻu toko taha mo e faiongoongó mo ʻene ngaahi fehuʻí.
Naʻe fiefia ʻa Kalina taʻu 17 ke ne ngāue tokoni ʻi he ʻopeni hausi ʻo e Temipale Kievi ʻIukuleiní ʻo aʻu mai ki he momeniti ko iá. Naʻe tatali ʻa e faiongoongo nusipepá ki ha taliange ʻene fehuʻí, ka ne hangē naʻe maʻu hono ʻeleló ʻoʻona.
Naʻe manavasiʻi ʻa Kalina he ʻikai ke teitei faitokonia ia ʻe he ʻOtuá koeʻuhí ko ha ngaahi fehālaaki he kuohilí ʻokú ne feinga ke ikunaʻi.
Feituʻu ʻOku Iku Ki Ai e Muimui ki he Kakaí
ʻI he tupu hake ʻa Kalina ʻi he Siasí, naʻá ne fakaʻamua ke mali ʻi he temipalé. Kae hangē ko e toʻu tupu tokolahi, naʻá ne fakaʻamu ke tali lelei ia ʻe he kakaí.
Naʻá ne fie maʻu ke ne talavou pea manakoa ʻo hangē ko hono taʻoketé. Naʻá ne fakaʻamu ke fakatokangaʻi pea tokaʻi, ka naʻá ne manavasiʻi ke ʻasi pea telia naʻa lumaʻi ia. Naʻe toe hoko foki ʻene fie molomolo muivaʻe ʻi heʻene tamaí ki he akoʻanga polisí, ko ha meʻa ke toe fakalahi mai ki heʻene mafasiá. ʻI he fānau ako ko ia ʻe toko 2,000, ko ha toko 70 pē ai ko ha kakai fefine. Naʻá ne fiefia ʻi hono fakatokangaʻi iá peá ne toe manavasiʻi foki ai.
ʻI heʻene holi ko ia ke tali iá, naʻá ne fai ha ngaahi fili taʻefakapotopoto. Naʻá ne pehē, “Naʻe fuʻu mālohi e fusi ʻa e māmāní. Naʻe ifi mo inu e kakai ne mau feohí. Naʻe fai pē ʻenau teké, peá u tukulolo. Naʻá ku fiefia ʻi heʻeku kau ʻi ha kulupu naʻe ongoʻi tauʻatāina pehē.
Naʻá ne ʻiloʻi naʻe hala ʻa e meʻa naʻá ne faí, ka naʻe ʻikai ke ne fakakaukau ki he ikuʻanga ʻo ʻene ngaahi filí ʻi heʻene muimui ko ia ʻi ha kakai ʻo mavahe atu mei he ʻOtuá (vakai, Mātiu 7:13–14).
ʻOku ʻUhinga ʻa e Fili ke Liliú ke Liliu Hoʻo Ngaahi Filí
ʻI he ʻaho ʻe taha, naʻe talaange ʻe ha talavou naʻe saiʻia ai ʻokú ne fakaʻapaʻapaʻi ʻa ʻene ngaahi tui fakalotú.
ʻI heʻene mā ko ia ʻi he ʻikai ke ne moʻui ʻaki e ngaahi tui ko iá, ne faifai pea tuʻu hifo ʻa Kalina ke fakakaukau ki he hala ʻoku ʻi aí (vakai Hakeai 1:5–7). Naʻá ne fakatokangaʻi naʻe taki ia ʻe heʻene ngaahi filí ke ne mamaʻo meí he ʻOtuá, takaua ʻo e Laumālie Māʻoniʻoní, pea mo ʻene fakaʻamua ko ia ha fāmili taʻengatá.
Ko e founga pē ʻe liliu ai e hala ʻokú ne fou aí ko hono liliu e ngaahi fili ʻokú ne fai he ʻaho taki taha.1 Ka naʻá ne fakakaukau pe kuo fuʻu mamaʻo ʻene fononga atu he hala taʻetotonú. Kuo fuʻu tōmui nai ke liliu?
Naʻe fakakaukau leva ʻa Kalina ke kamata liliu ʻaki haʻane lotu mo lau fakaʻaho ʻa e folofolá. Naʻá ne kamata hiki ʻene tohinoá, ʻa ia naʻe tokoni ke ne fakatokangaʻi ai e tokoni ʻa e Tamai Hēvaní ʻi he ʻaho kotoa. Naʻá ne liliu ʻa e talanoá kapau ko ha talanoa kovi.
Ko ʻene fili faingataʻa tahá ko haʻane fili ke ʻoua naʻa ʻi ai hano kaungāmeʻa, ʻo laka ange ia ʻi haʻane fili ha ngaahi kaungāmeʻa ʻoku nau tākiekina hala. Naʻá ne kamata kumi ha ngaahi kaungāmeʻa ʻoku māʻolunga ange honau tuʻunga ʻulungāangá.
Ko e Mahuʻinga ʻo e ʻAmanaki Leleí
ʻI he ngaahi mahina ne hokó, naʻe hanga ʻe he filí ʻo ngaohi ia ke ne veiveiua mo manavasiʻi ʻi he fili kotoa naʻá ne faí. Taimi ʻe niʻihi naʻá ne pehē pe ʻoku ʻi ai koā hano ʻaonga ʻo e feinga ko ʻeni ke muimui ʻi he Fakamoʻuí. Hangē ne taumamaʻo ʻene hoko ko e tokotaha naʻá ne fakaʻamuá.
Ka ʻi heʻene sio ki he anga e moʻui ʻa ʻene ongomātuʻá mo kinautolu ʻoku mālohi ʻenau fakamoʻoní, naʻá ne ʻilo ʻoku ʻi ai ʻa e meʻa ia ʻoku toe mālohi ange ʻi he veiveiuá mo e manavasiʻí—naʻá ne toki ʻilo hoko mai e ʻamanaki leleí tuʻunga ʻi he fakatomalá.
Naʻá ne pehē, “Naʻá ku vakai ta ʻoku faingofua pē ke u moʻui ʻi he founga ʻoku totonú. ʻOku ʻikai fakamalaʻiaʻi kitautolu ʻe heʻetau fehālākí. Kuo tuku mai ʻe he Tamai Hēvaní ʻa e faingamālie ke fakatomala pea liliu ʻa hotau halá.”
Kuo akoʻi ia heʻene tafoki mei heʻene ngaahi fili ki muʻá pea feinga ke muimui ʻi he Fakamoʻuí ʻi he ʻaho kotoa pē ʻo ne ʻilo ʻoku faʻa kātaki ʻa e Tamai Hēvaní. Naʻá ne pehē, “Kuó Ne toutou tuku mai ha ngaahi faingamālie ke u liliu ai pea hoko ko ha tokotaha lelei ange. Kuó Ne tokoniʻi au ʻi he ngaahi taimi faingataʻá.”
ʻOku ʻi ai e Tokoni ʻo Kapau Te Tau Fili ke Muimui
Naʻe tuʻu hangatonu hake ʻa Kalina peá ne tafoki atu ki he faiongoongó. Naʻá ne malimali fiefia. Kuo lahi ha ngaahi meʻa kuo fai ʻe he Tamai Hēvaní maʻana pea naʻá ne ʻilo ʻe tokoniʻi ia he taimí ni.
Hili e fakafehuʻi ʻa e faiongoongó, naʻe malimali ʻa Kalina peá ne taʻataʻalo. Naʻe malimali atu ʻa e faiongoongó peá ne mavahe atu. Naʻe ʻikai manatuʻi kotoa ʻe Kalina ʻa e meʻa naʻá ne lea ʻakí, ka te ne manatuʻi fuoloa ʻa e ongo naʻá ne maʻu ʻi heʻene ʻilo ʻoku ofi mai maʻu pē ʻa e Tamai Hēvaní kiate kinautolu ʻoku fili ke muimui kiate Iá.
Faitā ʻa Adam C. Olson