Ko e Ngaahi Tāpuaki ʻo e Ngāue Mālohí
“Ke tau fai ʻi he loto-fiefia ʻa e ngaahi meʻa kotoa pē ʻoku tau maʻu ʻa e mālohi ke faí” (T&F 123:17).
ʻI heʻeku kei tamasiʻí ʻi Suēteni, naʻe hoko ʻeku tangataʻeikí ko ha tokoni ki ha kau palesiteni misiona. Naʻe fie maʻu ʻi hono uiuiʻí ke ne fefolauʻaki tuʻo lahi ʻi ha ngaahi fakaʻosinga ʻo e uiké. Ko ha faʻifaʻitakiʻanga lelei ia ki heʻemau fānau pea mo au foki ʻi he mahuʻinga ʻo e ngāue maʻá e ʻEikí, neongo kuo pau ke tau fai ha ngaahi feilaulau.
Naʻá ku toe ako foki ʻi heʻeku kei siʻí ʻa e mahuʻinga ʻo e ngāué. Lolotonga e ngaahi faʻahitaʻu māfaná, naʻá ku faʻa heka ʻi heʻeku pasikalá ki ha faama situloapeli ʻa ia ne lau maile hono mamaʻó. Naʻá ku toli e situloapelí ʻi ha ngaahi houa lahi he ʻaho takitaha ke maʻu mai ha paʻanga.
Naʻe ʻi ai ha kiʻi fale homau fāmilí ʻi ha faama ki he faʻahitaʻu māfaná. Naʻe ʻikai ke ʻi ai ha ʻuhila pe taki ha vai ki fale. Ko ia ne pau ke mau tā e fefié pea tou mai e vaí mei ha vaikeli. Naʻe falala mai ʻa e tokotaha fāmá ke u taki ʻa e fanga pulú ki he fale taukaú ʻi he pongipongi ʻe niʻihi pea toki tukuange mai kinautolu ki tuʻa. Naʻa mau tā mai ʻa e mohukú ʻo fetuku mai ia ki he fale tānakiʻanga mohukú.
Naʻe tokoni ʻa ʻeku taukei ko ia ʻi he ngāue fakatuʻasinó pea mo e tā sipinga ʻa ʻeku tangataʻeikí ʻi heʻene ngāue māteaki maʻá e ʻEikí ki heʻeku fuofua ʻalu ʻo ngāue fakafaifekaú. ʻI hoku taʻu 16, naʻe ui ai au ke u hoko ko ha taha tō piliki he ngaahi falelotu ʻa e Siasí ʻi Suēteni, Finilani Siamane, pea mo Netaleni. Naʻá ku maʻu ha ongo fakalaumālie lolotonga ʻeku ngāué. Naʻá ku ako ko e ngāue fakatuʻasinó ko e taha ia ʻo e ngaahi founga ki hono fai ʻa ia ʻoku totonú, pea ʻoku tau faaitaha ai mo e ʻOtuá.
Ko ha lāngilangi ke maʻu ha uiuiʻi pea lipooti naʻá ke fakahoko ho lelei tahá ke fakakakato ia. ʻI he taimi ʻoku tau tali ai ʻa e ngāué pea fakaʻaongaʻi hotau taimí mo e ngaahi talēnití ki hono langa ʻo e puleʻanga ʻo e ʻEikí, te tau aʻusia pea mamata ai ki he ngaahi tāpuaki kuo tokonaki ʻe he Tamai Hēvaní maʻatautolú.
Tā fakatātaaʻi ʻe Dan Burr