Naʻá ke ʻIlo Fēfē ke ke Haʻu?
Selí H. Sileti, ʻIutā, USA
ʻI hoku taʻu 33, ne siʻi mālōlō ai hoku husepānití ko ha foʻi ngungu he ʻutó. Fakafokifā pē kuó u hoko ko ha mātuʻa taʻe-mali ʻo ohi tokotaha hake ha fānau ʻe toko tolu. Ko ha taimi faingataʻa ia ʻi heʻeku moʻuí, ka naʻe ʻomi ʻe he faleʻi ʻa e ʻEikí “ʻe foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe” (T&F 122:7) ha lotolahi ke u hoko atu.
Naʻá ku toe mali kimui mo hiki ki ha uooti foʻou, ʻo ui au ai ko e palesiteni ʻo e Fineʻofá. Lolotonga ʻeku fakamaau fale ʻi ha ʻaho ʻe taha, kuó u maʻu ha ongo makehe ke u ʻaʻahi ki ha fefine māmālohi naʻe toki mālōloó ni siʻono husepānití. Naʻá ku tekeʻi e fakakaukaú ni, ʻo fakakaukau ʻoku fie maʻu ke u fai ʻe au ha ngaahi meʻa kehe ʻi he ʻaho ko iá. ʻOku ou ongoʻi mā ke u pehē naʻá ku toe maʻu ʻa e ongo tatau pē ʻo tuʻo ua ki muʻa peá u toki fakahoko.
ʻI heʻeku aʻu atu ki he fale ʻo e fefiné he efiafi ko iá, naʻe fakapoʻuli. Naʻá ku lomiʻi ʻa e fafangu he matapaá mou tatali. Naʻá ku tukituki leʻo lahi mo toe tatali.
ʻI he taimi naʻá ku tafoki ai ke ʻalú, kuo ulo mai ʻa e maama he fakafaletoló, pea ava māmālie mai ʻa e matapaá. Naʻe hū māmālie mai ʻa e ʻulu ʻo e siʻi fefiné ni he matapaá. He ʻikai toe ngalo ʻiate au ʻa e meʻa naʻá ne ʻeke maí: “Naʻá ke ʻilo fēfē ke ke haʻú?” Naʻá ne talamai ko e ʻaho kakato ʻeni ʻene tangi mo ongoʻi he ʻikai toe lava ia ʻo hoko atu he mole hono husepānití.
Naʻá ma talanoa he pō ko iá ʻi ha houa ʻe ua. ʻOku ʻikai ke u manatuʻi fēfē ʻe au ʻa e ngaahi meʻa ʻo ʻema talanoá, ka ʻoku ou manatuʻi ʻeku talaange, “ʻOku mahino moʻoni kiate au ʻa e meʻa ʻokú ke fouá.” Naʻá ku talaange ʻi heʻeku hoko ko hono kaungāmeʻa ʻi he taimi ko iá ʻe tokangaʻi ia ʻe he ʻEikí. ʻI heʻema pōtalanoá, naʻá ku fakatokangaʻi kuo liliu siʻono fofonga loto mamahí ʻo fetongi ʻaki ha fofonga ʻoku nonga.
ʻI he ʻosi ʻo ʻema pōtalanoá, naʻá ku fekita mo ia ʻi he ʻofa. Naʻá ku ongoʻi houngaʻia ʻi hono ueʻi au ke u ʻaʻahi kiaí. Naʻá ku ʻilo naʻe tuku au heʻetau Tamai Hēvani ʻofá ke u tokoni ange kiate Ia ʻi hono tokoniʻi ʻo e fefine leleí ni ʻi he taimi ʻo siʻene fie maʻú.