Ko e Lēsoni mei he Liiki maʻá e Fānau Īkí
Ko e fāmilí ke taʻe ngata. ʻOku faka-ʻOtua. Pea te mau fakataha mo kinautolu ʻo fiefiá’ (Tohi Hiva ʻa e Fānaú, 98).
Naʻe ʻeke taʻefiemālie ʻe Linisī, “Ko e hā ʻoku fie maʻu ai ke u ʻi hení?”
Naʻe tali ange ʻe he Fineʻeikí, “ʻOku fie maʻu ke ke poupou ki ho tuongaʻané,”
Naʻe pehē ange ʻe Linisī, “Ka ʻoku fuʻu taʻeoli, ʻoku lahi ange taimi ia ʻoku ʻikai te u sio ai ki aí.”
Ko Maikoló, ko e tuongaʻane siʻisiʻi ia ʻo Linisī, ʻokú ne kau ki he timi peisipolo Liiki maʻá e Fānau Īkí, pea ʻave maʻu pē heʻena faʻeé ʻa Linisī ki he ngaahi ako vaʻinga mo e tau kotoa. Naʻe taʻeoliʻia ʻa Linisī he taimi kotoa. Lolotonga e fiu feinga ʻa Maikolo ke tā ʻa e pulú, kuo fanongo hiva, lau tohi, mo tā fakatātā ʻa Linisī ia ke ʻoange ki hono tehiná.
Naʻe māpuhoi pē ʻa Linisī mo sio atu ki hono tuongaʻané ʻoku tuʻu ʻi he malaʻé mo hono kaungā vaʻingá. Naʻá ne sio atu ki heʻene lele ke hapo e pulú, hapo toó, peá ne toe lī ia ki ha tokotaha hala.
“ Mālie Maikolo!” Ko e ui atu ia e Fineʻeikí. “ʻOkú ke tōtōatu!”
Naʻe pehē atu ʻa Linisī, “Ka ʻe Fineʻeiki, ʻoku ʻikai ke sai.”
Naʻe talaange ʻe Mami, “Ko e ʻuhinga ia ʻokú ta ʻi heni aí. Ke poupou kia Maikolo, tautautefito ki he taimi ʻoku fehālaaki aí. Kapau naʻe ʻikai ke ta ʻi heni pea ongoʻi ʻe Maikolo ʻoku ʻikai ke ne lava ʻo fai ha meʻa, mahalo ʻe tuku ʻene feingá. ʻOku ou fie maʻu ke ne feinga maʻu pē. ʻOku tatau tofu pē mo ʻeku fie maʻu koe ke ke feinga ʻi hoʻo ʻātí.”
Naʻe talaange ʻe Linisī, “ʻOku ʻikai fakakaekae mai ha taha ia kiate au he kalasi ʻātí. ʻIkai foki haʻu ʻa Maikolo ia mo au ke kaila ʻTōtōatu!’ ʻi he taimi ʻoku tonu ai ʻeku huʻi e ngaahi lanú.”
Naʻe pehēange ʻa e Fineʻeikí, “Ikai, ka ʻokú ne fakahikihikiʻi hoʻo ʻaātí ʻi hoʻo fakaʻaliʻali mai ia kiate kimautolú.”
Naʻe fakakaukau ki ai ʻa Linisī. Naʻá ne manatuʻi e faʻa fakaʻuli ʻa e Fineʻeikí ʻo ʻave ia ki he kalasi ʻātí mo e taimi ʻe niʻihi ne pau ke heka ai mo Maikolo ʻi he kaá, neongo naʻá ne fie vaʻinga mo hono ngaahi kaungāmeʻá. Naʻá ne siofi leva ʻa Maikolo ʻi he tapaʻi malaʻé. Naʻe taaʻi ʻe he timi ʻe tahá ʻa e foʻi pulú. Naʻe ʻalu hangatonu atu ia ki ai!
Naʻe kaila fiefia atu ʻa Linisī, “Mālie Maikolo! Hapoʻi ia!”
Naʻe lele atu ʻa Maikolo mo hono kofu nima peisipoló. Naʻá ne hapo e pulú!
Naʻe tuʻu fakataha hake ʻa Linisī mo e Fineʻeikí ʻo kaikaila fiefia. “Mālie Maikolo! Ko hoku tuongaʻane tōtōatu tahá koe!”
Naʻe malimali lahi ʻaupito ʻa Maikolo mo kaila atu “Ko au pē ho tuongaʻane!”
Naʻe tangutu hifo ʻa Linisī mo malimali katakata fiefia.
Naʻe fakakaukau hifo ʻa Linisī, “Mahalo ʻoku tonu ke u tokanga ʻo poupouʻi ʻa Maikolo. Ko e meʻa fakafiefia taha kuo hoko ʻi he ʻaho ní ko ʻeku sio ko ia ki heʻene hapo ʻo e foʻi pulú. Naʻe hangē naʻá ne tokanga ki heʻeku siofi iá. ʻOku ou laukau ʻaki ia.”
“Fineʻeiki, ʻoku ou fakakaukau ʻokú ke moʻoni. ʻOku totonu ke ta poupouʻi ʻa Maikolo.”
Naʻe malimali pē Fineʻeikí, “ʻOku ou fiefia he liliu hoʻo fakakaukaú.”
Naʻe talaange ʻe Linisī “Ta toe kaikaila ke lahi ange!”
Naʻe kaikaila atu ʻa Linisī mo e Fineʻeikí, “Ko ia Maikolo! ʻAi foki!”
Tā fakatātaaʻi ʻe Shawna J. C. Tenney