Ko ha Kaungāmeʻa Moʻoni
“ʻOku piki kiate koe ʻa ho ngaahi kaumeʻá” (T&F 121:9).
Naʻe hiki ʻa e kiʻi tohí ʻi ha laʻipepa lanu pulú pea naʻe tā ha ngaahi fakaʻilonga pikopiko he ngaahi tulikí pea neongo ne ʻoange ia ʻe Selemaia, ka naʻe ʻiloʻi ʻe Melanī ne ʻomi e kiʻi tohí meia Lesieli. Ne sio takai ʻa Melanī. Kuo kamata ke fakamāʻopoʻopo ʻe he kalasí ʻenau ʻū tohí, he kuo ʻosi e taimi laukongá.
Naʻe ʻosi ʻilo pē ʻe Melanī ʻa e meʻa ʻe kamata ʻaki ʻe he kiʻi tohí: “Siʻi Kaungāmeʻa Mamae.” Naʻá ne mamali loto pē. Ko e talu ʻeni ʻene kaungāmeʻa mo Lesieli mei heʻena kei kalasi uá. Naʻe fakakaukau ʻa Melanī ʻi heʻene folahi hake ʻa e tohí “ʻOkú ta kei kaungāmeʻa lelei pē, neongo ʻokú ta fuʻu faikehekehe.”
Siʻi Kaungāmeʻa Mamae,
ʻOkú ke ifi?
—Lesieli
Naʻe ʻohovale ʻa Melanī. Naʻá ne fakakaukau, “ʻOku ou feohi mo Lesieli ʻi he taimi kotoa. Meʻa nī ʻoku ʻikai te ne ʻilo ʻoku ʻikai ke u ifi?”
Naʻá ne tohi ʻi he tafaʻaki ki lalo ʻo e laʻi pepá.
ʻIkai. ʻOku ou palakūʻia ai. Ko e hā ʻoku fie maʻu ai ke ke ʻiló?
—Melanī
Naʻe fakafoki atu ʻe Melanī ʻa e kiʻi tohí kia Selemī. Taimi siʻi kuó ne toe fakafoki mai ia. Naʻe lau ia ʻe Melanī:
Naʻá ku fūfuuʻi mai ha puha sikaleti mei he ʻapi hoku mehikitangá. Te ke fie ʻahiʻahiʻi ia mo au he tuku ʻa e akó?
—Lesieli
Ne sio fakamamaʻu ʻa Melanī ki he kiʻi tohí. Naʻá ne tohi:
Lesieli! Ko e hā ʻokú ke fie ifi aí? ʻOku kovi ia kiate koe! ʻOku ou ʻiloʻi ʻokú ke fie ʻahiʻahiʻi ha meʻa foʻou, ka ʻoku ʻikai ke u fie sio ʻokú ke loto mamahi.
—Melanī
Naʻe tohi fakafoki mai ʻa Lesieli:
He ʻikai ha meʻa ʻe hoko kapau te u ʻahiʻahiʻi ha ngaahi foʻi sikaleti. Mahalo he ʻikai te u ifi kotoa e puhá.
—Lesieli
Naʻe ongoʻi ʻe Melanī ʻe tangi. Naʻá ne tohi ʻo pehē:
Ko hoku kaungāmeʻa koe pea ʻoku ou ʻofa ʻiate koe. ʻOua te ke ifi.
—Melanī
Naʻe fakasio atu ʻa Melanī hono lau ʻe Lesieli e kiʻi tohí. Naʻe hangē ka tangi ʻa Lesielí. Naʻá ne puke fuoloa ʻa e kiʻi tohí. Naʻá ne toe tohi fakafoki mai. ʻI he maʻu ʻe Melanī ʻa e kiʻi tohí, naʻá ne lau:
Mālō. ʻOku ou ʻofa atu foki. He ʻikai te u ifi ʻa e sikaletí.
Naʻe fakamālō ʻa Melanī ko ʻene fili ko ia ke hoko ko ha faʻifaʻitakiʻangá. Naʻá ne ongoʻi fiemālie ʻi heʻene ʻilo naʻe fai ʻe Lesieli ʻa e fili ʻoku tonú.
Tā fakatātaaʻi ʻe Matt Smith