ʻI he Uepí

Tokoni ʻa Hono Fakaleleiʻi ʻo e Saití ke Fakakakato ʻe he Kau Talavoú ʻa Honau Fatongia ki he ʻOtuá

Kuo fakafoʻou ʻa e uepisaiti Fatongia ki he ʻOtuá (DutytoGod.lds.org) pea kuo hoko ia ko ha meʻangāue fengāueʻaki ʻi he ʻinitanetí ke ne tokoniʻi lahi ange ʻa e kau talavoú ke nau fokotuʻu, muimuiʻi, mo tauhi ʻenau fakalakalaká ʻi he polokalama fakakomipiuta ʻo e Fatongia ki he ʻOtuá.

ʻE lava he taimí ni ke vakaiʻi fakakātoa ʻe he kau tīkoní, faiakó, mo e taulaʻeikí ʻa e kiʻi tohi ko e Ko Hono Fakakakato Hoku Fatongia ki he ʻOtuá: Maʻá e Kau Maʻu Lakanga Taulaʻeiki Faka-ʻĒloné ʻi he ʻinitanetí ʻi ha ngaahi lea fakafonua ʻe 50, pea ʻi heʻenau hū ki he polokalamá ʻaki ʻenau ʻAkauni LDS, ʻe lava ke nau fakahū ki heʻenau tohinoá ha ngaahi fakamatala fakahokohoko ki heʻenau fakalakalaka ʻi he polokalamá. ʻOku toe fakakau foki ʻi he kiʻi tohi ʻi he ʻinitanetí ʻa e ngaahi ʻekitivitī ako kotoa pē mo e ngaahi fehokotakiʻanga ki he folofolá mo e ngaahi maʻuʻanga tokoni kehé.

Saiti ʻa e Toʻu Tupú ke Fakalahi ʻa e Hiva Taʻetotongi ʻoku Foakí

ʻOku fakalahi ʻa e konga ʻo e hiva ʻa e youth.lds.org ki he ngaahi hiva ʻoku foaki taʻetotongí, mo hiki mei he ʻinitanetí ʻaki e ngaahi hiva mei he kau hiva lolotongá mei he ngaahi mītia Especially for Youth (EFY). Naʻe kamata ʻa e fakalahí ʻi Fēpueli, pea ʻe tānaki ha ngaahi hiva ʻe 30 ʻaki hono tuku mai e hiva ʻe taha ʻi he uike.

ʻOku ala maʻu ʻa e saití ʻi he lea faka-Pilitāniá, Potukalí, mo faka-Sipeiní, pea ʻoku lolotonga palani ʻa e ngāue ke fakalahi mai e ngaahi hivá ʻi he lea faka-Potukalí mo faka-Sipeiní. ʻOku lolotonga maʻu atu ʻi he saití ha foʻi hiva ʻe taha—ko e hiva ʻa Seni Filipe ko e “Strong and Courageous”—ʻa ia ʻoku ala maʻu ʻi he lea faka-Potukalí mo faka-Sipeiní.