Mei he Malaʻe Ngāue Fakafaifekaú
Ko e Mana ʻo e Fakamoʻui Fakalaumālié
Naʻá ku ʻaʻahi atu mo hoku hoá ki ha tokotaha naʻe toki ului mai ʻi Kolomipou ʻi Palāsila, ka naʻe fonu mai ʻa e falé ʻi he kau mēmipa hono fāmilí. Naʻe tokolahi ʻaupito, ka naʻa nau kei fakaafeʻi kimaua ke ma hū ange ʻo vahevahe ha pōpōaki. ʻI he ʻamanaki ke ma kamatá ne toe hū mai mo e tuongaʻane ʻo e tokotaha papi uluí. Naʻe ʻikai ko ha mēmipa ia ʻo e Siasí pea naʻe ʻikai te ne fuʻu fiefia ʻi heʻema ʻaʻahi atú. Naʻá ne feinga ʻi ha tafaʻaki pē ke fakafepakiʻi kimaua.
Naʻe ʻi ai haʻane kiʻi tohi naʻe hiki ai e kau memipa kotoa ʻo hono siasí mo e ngaahi mahaki ne nau puke aí. Naʻá ne ʻeke mai pe ʻokú ma tui ki he meʻafoaki ko ia ʻo e fai fakamoʻuí. Naʻá ma tali ange, “ʻIo ʻoku ma tui ki ai.” Naʻá ne hoko atu ʻo pehē, “Sai, kuó u fakamoʻui kotoa ʻa e kakai ko ʻeni ʻi he kiʻi tohí ni. Ko e toko fiha ʻeni kuó mo fakamoʻuí?”
Naʻá ma feinga ke fakamatalaʻi ange ʻa e lakanga fakataulaʻeikí, tuí, pea mo e founga ʻoku hoko ai ha meʻa ʻo fakatatau ki he finangalo ʻo e ʻOtuá, ka naʻe hili ha taimi siʻi, naʻá ma ongoʻi hangē kuo ʻikai ke ma kei lava ʻo fai ha talí.
Pea “ʻi he momeniti ko ia” (T&F 100:6) naʻá ma fuʻu fie maʻu aí, naʻe fanafana mai ʻe he Laumālié ʻa e meʻa ke ma lea ʻakí. Naʻá ku fakamatala ʻoku tau tui ki he fai fakamoʻuí, ko ʻema ngāué ʻi heʻema hoko ko e ongo faifekau ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní ko hono ʻomi e fakamoʻui fakalaumālié kiate kinautolu ʻokú ma akoʻí, ko ha fakamoʻui ʻoku toki lava pē ke maʻu ʻi hono tali e Fakalelei ʻa Sīsū Kalaisí ʻi he tui, fakatomala, papitaiso ʻi he fakaukú, maʻu ʻa e meʻafoaki ʻo e Laumālie Māʻoniʻoní, pea kātaki ki he ngataʻangá.
Neongo ʻema tui ko ia ki he fakamoʻui fakaesinó, naʻá ma fakamatala ange, ka ko e fakamoʻui mahuʻinga tahá ʻa e fakamoʻui fakalaumālié. Pea ko e faʻahinga fakamoʻui ia ʻokú ma siomata ai ʻi he ʻaho kotoa pē. ʻOku ʻikai fuʻu mahuʻinga ia pe ʻe fakamoʻui fakaesino ʻa e kakaí kapau he ʻikai ke nau fakatomala pea liliu ʻenau moʻuí ke muimui ʻia Kalaisi.
ʻI hono fakahinohinoʻi kimaua ʻe he Laumālié ke ma tali ʻi ha founga fiemālié, naʻe mavahe atu ʻa e hohaʻá mei he lokí, ne tuku leva e feinga fakakikihi ʻa e tuongaʻané, pea lava ke ma vahevahe ʻema pōpōakí.
Hili ha ngaahi māhina mei ai ʻi he ʻosi ʻeku ngāue fakafaifekaú, naʻá ku lau ai ʻa e fakamatala ko ʻeni ʻi he Liahoná mei he tohinoa ngāue fakafaifekau ʻa Sione Tená: “Ko e uluí ʻa e mana maʻongoʻonga tahá. ʻOku toe fakaofo ange ia ʻi he fakamoʻui ʻo e mahakí pe fokotuʻu hake ʻo e maté. He ko e tokotaha ʻoku fakamoʻuí ʻe toe puke pē pea iku ʻo ne mate, ka ʻe tolonga ʻa e mana ʻo e fakauluí ʻo laui kuonga pea ʻe aʻu ia ki he taʻengatá maʻá e tokotaha uluí pea pehē foki ki hono hakó. ʻOku fakamoʻui mo huhuʻi ha ngaahi toʻu tangata kakato mei he maté ʻi he mana ʻo e fakauluí.”1
ʻOku ou houngaʻiá ʻi hono ueʻi ʻe he Laumālié ha ongo faifekau ne hangē kuó na puputuʻú, ke na manatuʻi ko ʻetau taumuʻá ke fakahaofi ʻa e ngaahi laumālié.
Tā fakatātaaʻi ʻe Bryan Beach