ʻOku fakamālohia Fakalaumālie mo Fakaetuʻasino Kitautolu ʻe he ʻAukaí

Kuo hoko maʻu pē ʻa e ʻaukaí ko e konga ʻo e ongoongolelei ʻo Sīsū Kalaisí talu mei he taimi ʻo e Fuakava Motuʻá (vakai, ki he sīpinga he Taniela 9:3; Sioeli 2:12). ʻOku fakamālohia fakalaumālie ʻe he ʻaukaí ʻa e kakaí mo fakaleleiʻi ʻa e ola ʻo ʻenau ngaahi lotú (vakai, ʻĪsaia 58:6–11). ʻOku ʻaukai he ʻahó ni ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo foaki ʻa e paʻanga naʻa nau mei fakamole ki he meʻakaí ki he Siasí ke tokoni ki he paeá mo e masivá.

“ʻOku vaheʻi ʻe he Siasí ha Sāpate ʻe taha ʻi he māhina kotoa pē, ʻa ia ʻoku meimei ko e Sāpate ʻuluakí, ko ha ʻaho ʻo e ʻaukai. ʻOku kau ʻi hono tauhi totonu ʻo e Sāpate ʻaukaí ʻa e ʻikai ke kai pe inu ʻi ha houakai hokohoko ʻe ua [ʻi ha vahaʻa taimi ʻo e houa ʻe 24], maʻu ʻo e houalotu ʻaukaí mo e fakamoʻoní, mo e fai ʻo ha foaki ʻaukai ke tokoni ʻi hono tauhi ʻo e kau paeá.

“Ko hoʻo foaki ʻaukaí ʻoku totonu ke tatau hono mahuʻingá mo e mahuʻinga ʻo e houakai ʻe ua naʻe ʻikai ke ke kai aí. Ka lava, fai ha foaki ʻofa pea foaki ʻo lahi ange ʻi he mahuʻinga ko ʻení.

“Makehe mei hono tauhi ʻo e ngaahi ʻaho ʻaukai kuo tuʻutuʻuni ʻe he kau taki ʻo e Siasí, te ke lava ʻo toe ʻaukai ʻi ha ʻaho kehe, ʻo fakatatau mo hoʻo fie maʻú pea mo e fie maʻu ʻa e niʻihi kehé. Neongo ia, ʻoku ʻikai totonu ke ke toutou ʻaukai tuʻo lahi pe ʻi ha vahaʻa taimi ʻoku fuʻu lōloa.”¹ Ko kinautolu ʻoku ʻi ai haʻanau palopalema fakaemoʻui ʻe iku toe kovi ange ʻi he ʻaukaí, ʻoku totonu ke nau fakapotopoto mo fulifulihi ʻenau foungá.

ʻOku ʻaukai ʻa e kāingalotu ʻo e Siasí ʻi ha ngaahi taumuʻa kehekehe. Hangē ko ʻení, te tau lava ʻo ʻaukai mo lotu maʻá ha mēmipa ʻo e fāmilí ʻoku puke. Te tau lava ʻo ʻaukai ke fakahaaʻi ʻetau houngaʻiá ki he ʻOtuá, ke maʻu ha loto fakatōkilalo lahi ange, ke ikunaʻi ha vaivai pe angahala, ke maʻu ha ueʻi fakalaumālie ki hotau ngaahi fatongia faka-Siasí, pea pehē atu ai pē. ʻOku tokoniʻi kitautolu ʻe he ʻaukaí ke tau ongoʻi ʻofa kiate kinautolu ʻoku nau fekuki maʻu pē mo e fiekaiá. ʻOku toe tokoni foki ʻa e ʻaukaí ki heʻetau ikunaʻi fakalaumālie ʻa e sinó.

ʻOku ʻuhinga ʻe ʻaukaí ke tau taʻe-kai pe inu loto fiemālie koeʻuhí ke tau ofi ange ai ki he ʻEikí mo kolea ʻEne ngaahi tāpuakí.
ʻOku poupouʻi kitautolu ke tau foaki lahi ʻi heʻetau foaki ʻaukaí: ʻoku fakaʻaongaʻi ʻe he Siasí ʻa e paʻangá ke tokoniʻi ʻa e paeá mo e masivá.
ʻOku kau ʻi he Sāpate ʻaukaí hono fai ʻo e fakamoʻoní ʻi he houalotu sākalamēnití.
ʻOku ola lelei ange ʻa e ʻaukaí he taimi ʻoku ʻalu fakataha ai mo e lotú.
Kuo fakahoko maʻu pē ʻa e ʻaukaí ʻe he kau tui moʻoní. Hangē ko e kau Siu ʻo e kuonga muʻá, ne nau ʻaukai maʻa ʻĒseta ka ne lava ʻo kole ki he tuʻí ke maluʻi ia mo hono kakaí (vakai, ʻĒseta 4:16).

Ngaahi tā fakatātaaʻi ʻo e ʻatá ne fai ʻe Talat Mehmood, John Luke, mo Welden C. Andersen; toʻo mei he Hā Taimi Hangē ko ʻEní, tā ʻe Elspeth Young