Naʻá ku Tō ha Ngaahi Tenga
ʻĒpeli Sāvesi, Siamane
ʻI ha kalasi ki he ʻulungāanga faitotonu ʻi he pisinisi ki heʻeku polokalama MA he ʻUnivēsiti Fakavahaʻa-puleʻanga Silá [Schiller International University] ʻi Heitolopeki ʻi Siamané, naʻe kole ai ki he fānau ako taki taha ke nau fakahoko ha fakamatala miniti ʻe 20 ʻi he fakaʻosinga ʻo e semesitaá. Naʻe kole mai ʻa e palōfesá pe ʻe lava ke u lea fekauʻaki mo e ngaahi tuʻunga ʻo e faitotonú mei he anga ʻa e vakai ʻa ha Kāingalotu ʻo e Siasí.
Naʻe papitaiso au ʻi hoku taʻu 18 pea ui ke u ngāue fakafaifekau ʻi Palāsila ʻi he ʻosi ha taʻu ʻe taha mei ai. Talu mei ai mo ʻeku kei hokohoko atu ai pē ʻi hono vahevahe ʻo e ongoongoleleí mo ha tokolahi.
Naʻá ku ʻilo ʻe faingataʻa ke fakamatalaʻi e ngaahi meʻa fakalotú ʻi he ʻātakai ʻo e ʻunivēsití, ka naʻá ku tali ʻa e kolé. Naʻá ku pehē leva ke u teuteu ha fakamatala ʻo kau ai e fakamatala mei he Mormon.org.
ʻOku ʻi hoku ʻunivēsití ha fānau ako mei he tapa kehekehe ʻo e māmaní kotoa. Naʻe fakafōtunga ʻe heʻeku kalasi ko ʻení ʻa e lahi ʻo e kehekehé, he naʻe ʻi ai ha fānau ako ʻe toko 18 mei ha ngaahi fonua kehekehe.
Naʻe kamataʻaki e ngaahi fakamatalá ha ongo tamaiki ako mei ʻInitia pea hoko ai ha taha mei Mianimā. Ko au naʻe fakamuimui taha ke fakamatalá. Naʻá ku fakamatala fekauʻaki mo e “Ko e Fāmilí: Ko ha Fanongonongo ki Māmaní,” mo e Ngaahi Tefito ʻo e Tuʻí, pea mo ha ngaahi tefito kehe ʻo e ongoongoleleí. Ko e fuofua taimi ʻeni ki ha tokolahi ʻo e fānau akó ke nau fanongo ai fekauʻaki mo e Siasí.
Naʻá ku fakaʻosi ʻaki ʻeku fakamoʻoni ki he ongoongoleleí pea mo hono mahuʻinga ʻo e fai ʻo e meʻa ʻoku totonú neongo e ivi fakahala ʻokú ne ʻākilotoa kitautolú. Fakaʻosí, naʻá ku tufa ki he tokotaha kotoa pē haʻanau Tohi ʻa Molomona ʻi heʻenau takitaha lea fakafonua. Naʻe lōmekina ʻaki au ha ngaahi fehuʻi kehekehe ʻi he ʻosi ʻeku fakamatalá. Naʻe aʻu ʻeku fakamatala miniti ʻe 20 ʻo houa ʻe taha.
ʻI he ʻaho ako hono hokó, naʻe talamai ai ʻe hoku kaungāmeʻa mei ʻInitiá naʻe mālieʻia ʻi heʻeku fakamatalá pea kuó ne ʻosi lau ha konga ʻo e Tohi ʻa Molomoná. Naʻe kole mai hono kaungāmeʻá, ʻoku haʻu foki mo ia mei ʻInitia, haʻane tohi. Naʻe talamai ki mui ai ʻe hoku kaungāmeʻa mei Mianimā naʻe fiefia ke fanongo ki he Siasí, tautautefito ki he ngaahi akonaki fekauʻaki mo e ngaahi fāmilí pea mo e fono ʻo e angamaʻá he ʻoku tui ki he ngaahi tefitoʻi moʻoni ko iá. Naʻe palōmesi mai te ne lau ʻa e Tohi ʻa Molomoná.
Naʻe fakamālō mai hoku ngaahi kaumeʻa mei Kaná ʻi heʻeku fakamatala ange hono Fakafoki mai ʻo e Ongoongoleleí, mo palōmesi mai te nau feinga ke sio ʻi he temipale ʻi ʻEkulaá. Naʻe talamai ʻe hoku kaumeʻa mei Laipīliá ne hoko ʻeku fakamatalá ko ha tataki fakalaumālie kiate ia pea ʻokú ne maʻu ai ha ʻamanaki lelei ki he kahaʻú.
Naʻá ku fiefia ʻi he fakamoʻoniʻi ʻe he Laumālie ʻo e ʻEikí ʻeku pōpoakí. Mahalo he ʻikai ke tau sio tonu maʻu pē he ʻaonga ʻo ʻetau leá, ka ʻoku ou ʻilo ʻe fua ʻi he kahaʻú ʻeku fakamatala he kalasí. ʻOku ou fakatauange ʻe ʻi ai ha niʻihi ʻi he kalasi ko iá te nau tali ʻi ha ʻaho ʻa e ongoongoleleí mo hoko ko ha ngaahi meʻangāue ʻi he toʻukupu ʻo e ʻEikí ke fakamafola ʻa e pōpoaki ʻo hono Fakafoki mai ʻo e Ongongoleleí ki he ngaahi puleʻanga, faʻahinga, lea, pea mo e kakai kotoa pē (vakai, T&F 133:37).