Ko ha Sīpinga Lelei Ange
ʻOku ou fakaʻamu pehēange mai ne lava ke mau fakafanongo ki he ngaahi fakahinohino ʻa hotau kau takí, ka naʻe ʻikai ke mau fakakaukau ne ʻuhinga ia kiate kimautolu.
Naʻe pehē ʻe heʻemau kau taki ʻi he Kau Finemuí ʻe hoko ha fononga he poʻulí ko hano teuteuʻi ia ʻo kimautolu ki he kemí. Naʻa nau fili ʻa e kauvai ko ia ʻi he Vaitafe Seni Peteloó ʻi he fakatonga ʻo ʻAlesoná, ʻi he USA, ke fokotuʻu ki ai ʻemau kemi fakaangaangá.
Hili hono fola e ngaahi moheʻangá, naʻá ku fie ʻalu mo ha tamaiki fefine kehe ke vakaiʻi mo kaukau he ano vaí. Naʻe fakakaukau ʻa e kau takí ʻoku totonu ke mau tomuʻa talanoaʻi e malú mo e ʻuluaki tokoní. Ko ia ne mau nofo ai ʻi ha kiʻi konga malumalu ofi ki he veʻe vaitafé ke fai ʻemau lēsoní.
Naʻe ʻikai faingofua ke mau tokanga he naʻa mau sio atu ki he ngingila mai ʻa e vaitafé ʻi he laʻaá. Naʻe havilivili mai e ʻuluʻakaú lolotonga e lea ʻa Sisitā Palauní (kuo liliu e ngaahi hingoá). Kuo mau ʻosi fanongo kotoa pē ʻi he lēsoni ko ʻení kimuʻa, pea ʻikai mahino kiate au pe ko e hā ʻoku toe fie maʻu ai ke fai ʻi he taimi ní. Naʻa mau ʻilo kotoa pē ʻo kau ki hano lolomi ʻo ha mataʻi lavea ke taʻofi e fānoa ʻa e totó, ka ko ʻena ʻokú ne toe fai mai pē.
Kimuʻa pea tuku ʻe he kau takí ke mau ʻalú, naʻa nau toutou fakamanatu mai ke ʻoua naʻa mau ʻalu taʻesū ki he vaitafé. “ʻOku ʻikai te ke ʻilo pe ko e hā e meʻa aí, pea kuo pau ke ke maluʻi ho vaʻé.”
ʻI heʻeku aʻu atu ki he veʻe vaitafé, ne ʻosi ʻi ai ha tamaiki fefine ia ne nau vaʻinga ʻi he loto vaí. Kuo lanu melomelo e vaí ʻi he pelepelá. Naʻe siʻi hifo ʻi he fute ʻe tahá ʻa hono lolotó takai, pea naʻe ʻikai ke u tui ʻoku fakatuʻutāmaki.
Naʻá ku pehē ke vete hoku suú. Ko e sū pē foki ʻe taha naʻá ku haʻu mo iá, pea naʻe ʻikai te u fie maʻu ke viviku mo ngaʻungaʻu ia he toenga e ʻahó. Ne fakamanatu mai ʻe hoku ongo kaungāmeʻa mamaé, ʻa Maʻata mo ʻElisapeti, ʻa e meʻa ne talamai ʻe he kau takí. Naʻá ku toʻo pē ʻe au hoku suú mo talaange hono ʻuhingá. Naʻe toʻo ʻe Maʻata mo hono suú. Naʻe momou ʻa ʻElisapeti. Naʻá ku aʻa atu ʻi he vaí mou ui mai ʻi ha leʻo manuki ʻo pehē, “Tui pē ā kapau ko ho lotó ia.”
Naʻá ne tangutu hifo, vete hono suú, ʻo lele mai ki he loto vaí. Hili haʻane foʻi manga nai ʻe nima nai, naʻá ne tuʻu, liliu hono fōtunga ʻo tea, pea lea loto fiemālie mai, “ʻOiauē.” ʻI heʻene hikiʻi hake hono vaʻé mei he vaí, naʻá ku sio atu ki he tafe ʻa e totó mei ha mataʻilavea. Naʻá ne tuʻu ʻi ha ngeʻesi hina.
Ne u moʻusioa au heʻeku sio ki he totó. Neongo naʻá ku toki fanongo ki ha lēsoni fekauʻaki mo e ʻuluaki tokoní, ka naʻe ʻikai ke u ʻilo pe ko e hā te u faí. Naʻá ku fakakaukau ke u lele ʻo kumi tokoni. Naʻe haʻu ha toko ua ʻo tokoni ke ʻomai ia mei he vaí.
Naʻá ku maʻu ʻa Sisitā Palauni ʻo talaange ki ai e meʻa kuo hokó. Naʻá ne pehē ko ʻeku fakaoli pē. Ka ʻi heʻene sio atu kia ʻElisapeti ʻoku tangutu mai he kiʻi halá mo e fānoa ʻa e totó mei hono vaʻé, naʻá ne lele hangatonu atu mo kaila, “Lolomi ʻa e mataʻilaveá!”
Ne kamata ke fokifoki mai ʻa e lēsoni he miniti ʻe 10 kimuʻá. Ne hanga ʻe he tamaiki fefine naʻe tuʻu takai ʻo siofi e fetotoʻi e vaʻe ʻo ʻElisapetí, ʻo langolango hono vaʻé pea lolomi ʻa e mataʻilaveá.
Naʻe ʻave ʻa ʻElisapeti ki falemahaki, pea nau talaange ki ai ne mei tuʻu ua mālie ʻa hono vaʻé. Naʻe fie maʻu ai ke fai ha ngaahi tuitui lahi pea ʻe fuoloa pea toki sai. Naʻá ne fakaʻaongaʻi ha tokotoko ʻi heʻeku toe fetaulaki hoko mo iá.
Naʻe ʻikai haʻaku fakakaukau te u lava ke fakalotoa ʻa hoku kaungāmeʻa mamaé ke ne fai ha meʻa ʻe mamahi lahi ai. Naʻe teʻeki ke u fakakaukau ko ha ivi tākiekina kovi au.
ʻOku ou feinga ʻi he taimí ni ke u hoko ko ha sīpinga lelei ange ki hoku ngaahi kaungāmeʻá, pea ʻoku ou loto lelei ange ke fanongo ki hoku kau takí. ʻOku nau ʻiloʻi ʻenau meʻa ʻoku nau lea ʻakí.
Tā fakatātaaʻi ʻe Dilleen Marsh