Faasoaina Atu o le Talalelei mai le Loto i le Loto

Saunia e Peresitene Henry B. Eyring

Fesoasoani Muamua i le Au Peresitene Sili

O le a tuu e le Atua ia tagata ua saunia e talia le talalelei i le ala o Ana auauna ua saunia e faasoa atu le talalelei. Sa tupu lena mea i lou lava olaga. O le faatele ona tupu e fuafua lea i sauniuniga o lou mafaufau ma lou loto.

E i ai sa’u uo e tatalo i aso uma ina ia feiloai i se tagata ua saunia e talia le talalelei. Na te tauaveina se kopi o le Tusi a Mamona. O le po a o lei alu i se malaga puupuu, sa ia filifili ai e na te le aveina se kopi ae nai lo lena sa ia aveina se kata fepasiai. Peitai a o ia sauni e malaga ese atu, sa oo mai ia te ia se musumusuga faaleagaga. “Alu ma ave se Tusi a Mamona.” Sa ia tuuina se tusi se tasi i lana ato.

Ina ua saofai se tamaitai la te masani i ona autafa i le taimi o le faigamalaga, sa ia mafaufau, “O le tagata ea lea?” Sa la toe o faatasi foi ina ua la toe foi. Sa ia mafaufau, “E faapefea ona ou amataina se ma talanoaga e uiga i le talalelei?”

Ae, sa ia fai mai ia te ia, “E totogi a outou sefuluai i la outou ekalesia, a ea?” Sa ia fai atu ioe. Sa ia fai mai sa tatau ona ia totogi le sefuluai i lana lotu, peitai e na te lei faia. Ona ia fesili mai lea, “O le a se mea e mafai ona e tau mai ia te au e uiga i le Tusi a Mamona?”

Sa ia faamatala atu o le tusi o se tusi paia, o se isi molimau ia Iesu Keriso, na faaliliuina e le Perofeta o Iosefa Samita. Sa foliga mai sa ia fia iloa, o lea sa ia aapa ai i totonu o lana ato ma fai atu, “Sa musuia lava au ou te aumaia le tusi lenei. Ou te manatu e mo oe.”

Sa amata ona ia faitauina. Ina ua la faamavae, sa ia fai mai, “O le a tele nisi a ta talanoaga e uiga i lenei mea.”

O le mea e lei mafai ona iloa e la’u uo—ae o le mea sa silafia e le Atua—o lea sa saili e le tamaitai lea se ekalesia. Sa silafia e le Atua sa matauina e lenei tamaitai la’u uo ma mafaufau pe aisea na matuai fiafia ai o ia i lana lotu. Sa silafia e le Atua o le a ia fesili e uiga i le Tusi a Mamona ma o le a malie o ia e aoaoina e faifeautalai. Sa saunia o ia. Faapea foi la’u uo. E mafai foi e oe ma a’u ona saunia.

O le sauniuniga tatou te manaomia o loo o i ai i totonu o o tatou mafaufau ma o tatou loto. Sa faalogo le tamaitai ma manatuaina ni upu e faatatau i le Tusi a Mamona, le Ekalesia toefuataiina a le Alii, ma le poloaiga e totogi le sefuluai i le Atua. Ma sa ia lagonaina le amataga o le molimau mai o le upumoni i totonu o lona loto.

Sa fetalai mai le Alii o le a Ia faaalia mai le upu moni i o tatou mafaufau ma o tatou loto e ala i le Agaga Paia (tagai i le MF&F 8:2). O le toatele o tagata o le a e feiloai i ai sa i ai i le amataga o lena sauniuniga. Sa latou faalogo pe na faitau foi e uiga i le Atua ma Lana afioga. Afai e lava le faamaluluina o o latou loto, ua latou lagonaina se faamautinoaga o le upumoni, e tusa lava pe itiiti.

Sa saunia le tamaitai. Faapea foi la’u uo, o le tagata o le Au Paia o Aso e Gata Ai lea sa suesue i le Tusi a Mamona. Sa ia lagonaina se molimau e moni, ma sa ia iloaina le taitaiga mai le Agaga e alu ma ave se kopi. Sa saunia o ia i lona mafaufau ma lona loto.

O loo saunia e le Atua ia tagata e talia lau molimau e uiga i le upumoni toefuataiina. E manaomia e Ia lou faatuatua ona sosoo ai lea ma lau faatinoga e faasoa atu ma le le fefe ia i latou o e e te alofa i ai mea ua matuai taua lava ia te oe.

Sauni e faasoa atu e ala i le faatumuina o lou mafaufau i aso uma i upumoni o le talalelei. A o e tausia ia poloaiga ma faamamaluina au feagaiga, o le a e lagona le molimau mai o le Agaga ma le alofa atili mai o le Faaola ia te oe faapea ma i latou e te feiloai i ai.

Afai e te faia lau vaega, o le a faateleina ona e maua le aafiaga fiafia o le feiloai atu i tagata o e ua saunia e faalogo i lau molimau o le upumoni—e ofoina atu mai lou loto i o latou loto.

Aoao Atu mai Lenei Savali

Mafaufau e faitau faatasi ma le aiga le savali ma talanoa i le parakalafa e sosoo ma le parakalafa mulimuli, lea e talanoaina ai e Peresitene Eyring ia auala e faamalosia ai se molimau a se tasi. Talatalanoa ma le aiga e uiga i le taua o le tuuina atu o se molimau pe a fefaasoaai e uiga i le talalelei. Atonu o le a iloa ai e tamaiti o le aiga le aoga pe a fai se faatinoga o le auala e tuuina atu ai se molimau i uo.

Ata na tusia e Dan Burr