Dalhin sa Tahanan ang Turo sa Primary

Si Jesucristo ang Anak ng Diyos

Magagamit ninyo ang aralin at aktibidad na ito para matutuhan pa ang iba tungkol sa tema ng Primary sa buwang ito.

Kunwari’y naglalakbay ka patawid ng disyerto. Matagal ang biyahe, matagtag ang daan habang nakasakay ka sa kamelyo, at ni wala kang mapa na sinusundan! Sa halip, isang bituin ang iyong sinusundan. Ano kaya ang mararamdaman mo? Magkakaroon ka ba ng pananampalatayang magpatuloy?

Dalawang libong taon na ang nakalilipas, ganyan mismo ang ginawa ng mga Pantas na Lalake. Nakakita sila ng maningning na bituin sa silangan at naglakbay papuntang Betlehem para magbigay parangal sa batang Cristo dala ang magagandang regalo. At hindi lamang ang mga Pantas na Lalake ang nagmasid sa bituin. Sa kabila ng karagatan, sa kontinente ng Amerika, nakita ng mga Nephita ang bituin at nalaman nilang si Jesucristo, ang Anak ng Diyos, ay isinilang.

Ngayon, ang pag-iisip sa bituing iyon ay nagpapaalala sa atin sa Tagapagligtas. Nagliwanag ito sa kadiliman at itinuro nito sa mga Pantas na Lalake ang daan, tulad ni Jesus na nagpakita sa atin kung paano mamuhay. Ang bituin ay hindi rin nagbago, tulad ng pagmamahal sa atin ng Tagapagligtas. Sa susunod na titingin ka sa mga bituin, alalahanin na si Jesucristo ang Anak ng Diyos at ang Ilaw ng Sanglibutan!

Awitin at Banal na Kasulatan

• “Awit ng Kapanganakan,” Aklat ng mga Awit Pambata, 32

• Doktrina at mga Tipan 11:28

CTR Activity: Mga Simbolo ng Tagapagligtas

Ikinumpara ni Jesucristo ang Kanyang sarili sa maraming bagay. Sa pag-aaral sa mga pagkukumparang ito, marami pa tayong nalalaman tungkol sa Kanya. Basahin ang mga banal na kasulatang ito bilang isang pamilya at pag-usapan kung ano ang sinasabi ng mga simbolong ito sa atin tungkol sa Tagapagligtas.

Pastol (tingnan sa Mga Awit 23:1)

Cordero (tingnan sa Juan 1:29)

Tubig (tingnan sa Juan 4:14)

Tinapay (tingnan sa Juan 6:51)

Bato (tingnan sa 2 Nephi 8:1)

Ikaw Lang

Gumawa ng mga palamuti o dekorasyon sa Pasko para maalaala kung paano pinagpala ng Tagapagligtas ang iyong buhay. Gupitin ang mga bituin at idikit ang mga ito sa makapal na papel o karton. Sa likod ng mga palamuti, idikit ang iyong retrato o retrato ng iyong pamilya at isulat ang gusto mong gawin para sundin si Jesucristo, ang Ilaw ng Sanglibutan. Gupitin ang mga butas sa itaas at lagyan ng tali ang mga butas para matapos ang mga palamuti.

Kaliwa: mga paglalarawan ni Adam Koford; kanan: mga paglalarawan ni Thomas S. Child, iStockphoto.com, at iStockphoto.com/Adyna