Pagdala sa Primary ngadto sa Panimalay

Si Jesukristo Mao ang Atong Manluluwas

Pagkat-on og dugang mahitungod sa tema sa Primary karong bulana!

Usa ka 12 anyos nga batang babaye naghigda sa higdaanan, nag-anam ka grabe ang sakit. Ang iyang mga ginikanan nagtan-aw nga walay mahimo. Wala silay mahimo sa pagluwas kaniya.

Dayon nahinumdom sila sa talagsaong mga istorya nga ilang nadunggan kabahin sa usa ka tawo nga nagpuyo taliwala kanila nga ginganlan og Jesus. Ang mga tawo miingon nga Siya makaayo sa masakiton ug makahimo sa buta nga mga tawo nga makakita. Tingali Siya makaluwas sa kinabuhi sa ilang anak nga babaye!

Ang amahan sa babaye, si Jairo, midagan aron sa pagpangita kang Jesus. Nangamuyo siya kang Jesus sa pag-ayo sa iyang anak nga babaye. Dayon usa ka sinugo miabut uban sa makalilisang nga mga balita. Ulahi na kaayo. Ang batang babaye namatay na. “Ayaw kahadlok”, si Jesus miingon kang Jairo, “sumalig ka lamang” (Marcos 5:36).

Sa dihang si Jesus ug si Jairo miabut sa balay ni Jairo, miadto sila sa kwarto diin ang batang babaye naghigda. Gigunitan ni Jesus ang batang babaye sa kamot ug misulti kaniya sa pagtindog. Sa dihang siya mitindog, ang iyang mga ginikanan nahingangha. Gibuhi ni Jesus ang ilang anak nga babaye!

Nianang adlawa gipakita ni Jesus kon unsa ka dako ang Iyang pagpakabana alang sa batang babaye ug sa iyang pamilya pinaagi sa pagpangalagad kanila. Gipakita ni Jesus unsa ka dako ang Iyang pagpakabana kanato sa daghang talagsaon ug kahibulongang mga paagi:

• Mitabang Siya sa paglalang sa maanindot nga kalibutan ug sa tanan nga mga binuhat niini.

• Miboluntaryo Siya nga moanhi sa yuta aron mahimo natong Manluluwas, bisan Siya nasayud nga kini lisud kaayo.

• Iyang gigahin ang Iyang kinabuhi dinhi sa yuta sa pagpanalangin, pag-ayo, ug pagtudlo sa uban.

• Nagpuyo siya og usa ka perpekto nga kinabuhi.

• Andam Siyang nag-antus alang sa atong mga sala sa Tanaman sa Getsemani ug namatay sa krus aron kita mabanhaw ug makabalik ngadto sa langit.

Kanta ug Kasulatan

• “I Stand All Amazed” (Hymns, no. 193)

• 1 Juan 4:14

Mga Ideya alang sa Panag-istorya sa Pamilya

Mahimo kamong mag-uban sa pagbasa sa istorya sa anak nga babaye ni Jairo (tan-awa sa Lucas 8:41–42, 49–56). Dayon mahimo ninyong ipakita ang litrato sa Manluluwas sa sunod nga pahina ug modapit sa mga sakop sa pamilya sa pagsulti unsay ilang gibati mahitungod sa pipila ka talagsaon ug kahibulongang mga paagi nga Siya mipakita sa Iyang gugma kanato. Ang mga sakop sa pamilya mahimo usab nga magpuli-puli sa pagbasa sa usa sa mga bersikulo sa “I Stand All Amazed.” Human sa matag bersikulo, dapita ang pamilya sa pag-apil sa pagpanganta sa koros. Dayon hisguti o pag-drawing og litrato sa mga paagi nga ang inyong pamilya makapakita og gugma alang sa Manluluwas.