Sekswal nga Kaputli

Ang mga ginikanan usahay mobati nga dili sigurado kon moabut ang mga oportunidad alang kanila sa pagtudlo sa ilang mga anak kabahin sa sekswal nga kaputli. Hinoon, ang mga diskusyon niini nga hilisgutan makadapit sa Espiritu ug makatabang sa pag-andam sa mga bata sa paghimo ug pagtuman sa sagradong mga pakigsaad.

Sa mga pahina 50–51 niini nga isyu, si Neill F. Marriott, ikaduhang magtatambag sa kinatibuk-ang kapangulohan sa Young Women, nagsulat, “Ang Langitnong Amahan mihatag sa mga gahum sa paglalang sulod sa kaminyoon alang sa diosnon nga katuyoan lamang.” Atong nakat-unan gikan sa Handbook 2: Administering the Church nga kadtong mga katuyoan naglakip sa “pagpahayag sa gugma ug paglig-on sa emosyonal ug espiritwal nga relasyon tali sa bana ug asawa” ([2010], 21.4.4). Ang mga sugyot sa ubos makatabang kaninyo sa pagtudlo sa inyong mga anak kabahin sa sekswal nga kaputli. Maka-refer usab kamo sa “Pagtudlo sa Kaputli ug Hiyas” sa Oktubre 2012 nga Liahona alang sa dugang ideya kon unsaon pagtudlo niining hilisgutan.

Mga Sugyot sa Pagtudlo sa mga Batan-on

Ikonsiderar ang pagbasa uban sa inyong mga anak nga tin-edyer ang “Kita Nagtuo sa Pagkaputli” ni Elder David A. Bednar sa Korum sa Napulog Duha ka mga Apostoles sa Mayo 2013 nga Liahona. Dapita sila sa pagpangutana kabahin sa sekswal nga kaputli. Magamit usab ninyo ang “Personal Purity” ni Elder Jeffrey R. Holland sa Korum sa Napulog Duha ka mga Apostoles sa Oktubre 2000 nga Liahona aron makatubag sa ilang mga pangutana.
Ang hilisgutan sa kurikulum sa kabatan-onan para sa mga leksyon sa Dominggo karong bulana mao ang Pag-ula ni Jesukristo. Ikonsiderar sa paggamit sa mga materyal sa kurikulum aron sa pagtudlo sa inyong mga batan-on kabahin sa gikinahanglang paghinulsol sa sekswal nga sala (tan-awa sa lds.org/youth/learn). Mahimo usab ninyong basahon ug hisgutan ang “Ngano ug Unsay Angay Nakong Ikumpisal sa Akong Bishop? ni Elder C. Scott Grow sa Seventy niadtong Oktubre 2013 nga Liahona.
Kon duol ang templo, ikonsiderar ang pagbisita sa nataran sa templo uban sa inyong pamilya ug hisguti nganong kinahanglan natong magpabiling putli sa pagsulod sa templo. Mahimo ninyong ipakigbahin ngadto kanila ang mga panalangin nga inyong nadawat gumikan sa pagsimba sa templo. Mahimo usab mong magplano og panahon nga ang inyong pamilya maghimo og mga bunyag alang sa patay.
Mahimo nga magbasa mo uban sa inyong kabatan-onan sa “Sekswal nga Kaputli” sa Alang sa Kalig-on sa mga Kabatan-onan ([booklet, 2011], 35–37) ug i-highlight ang mga panalangin nga atong nadawat kon magpabiling putli. Makaawhag mo sa inyong mga anak sa pagsulat og mga tumong kabahin sa sekswal nga kaputli.

Mga Sugyot sa Pagtudlo sa mga Bata

Mahimo mo nga mag-family home evening nga inyong gamiton ang mga litrato sa templo aron sa paghisgot sa kaimportante ug kasagrado sa templo. Dayon inyong mapasabut nga ang atong mga lawas sagrado nga mga templo usab.
Basaha uban sa inyong mga anak ang ikatrese nga artikulo sa hugot nga pagtuo ug hisguti ang importansya nga kanunayng limpyo atong hunahuna. Paglista og mga libro, salida sa sine, ug kanta nga mopuno sa inyong hunahuna og maayong mga butang. Mahimong dungan mo nga magbasa, magtan-aw, o manganta niini.