Magpabiling Mabinantayon
Paghulagway gikan sa iStockphoto/Thinkstock
Duna koy daghang mga pagmahay sa milabayng upat ka tuig sa akong kinabuhi. Nagtubo ko sa Simbahan, ug daghang mga sakop sa pamilya ug mga higala nagpakita og maayong mga ehemplo alang nako. Bisan pa niini nga mga panalangin, wala kaayo ako magbantay, nga nakaingon og sunod-sunod nga mga problema sa akong kinabuhi.
Nagsugod kini sa dihang nag-edad ko og 13 ug naadik sa media. Walay hunong akong motan-aw og TV ug ingon og ako mamatay kon dili makadula og mga video game. Ang akong pagkaadik sa media miresulta og laing problema: wala akoy maayo nga mga higala tungod kay ako wala maningkamot sa pagpakighigala sa mga batang lalaki sa akong korum. Sa pagpaningkmaot sa pagpangita og mga higala, nangita ko sa sayop nga mga lugar ug nahimong kabahin sa usa ka online chat nga grupo. Niini nga grupo ang pipila ka mga tawo mibutang og pornograpiya. Tungod sa kahuyang nga miabut gikan sa akong ubang mga problema, dali akong nalingla sa pornograpiya.
Akong gisulayan sa pagpangatarungan ang akong kinaiya pinaagi sa paghimo og mga pasumangil: wala kini makadaot sa uban; dili kini ingon ana ka sayop. Wala ko ganahing motan-aw og pornograpiya gikan sa unang higayon nga ako nakakita niini, apan ako naadik niini. Gusto ko nga mahimong usa ka maayong miyembro sa Simbahan, apan nakahimo ko og sunod-sunod nga mga sayop ug wala mokorihir niini sa husto nga paagi sulod sa dugayng panahon.
Miabut og usa ug tunga sa tuig una ako makigkita sa akong bishop. Mitabang siya nako nga mabuntog ang tinguha nga motan-aw sa pornograpiya. Sa kadugayan nagsugod ako sa pagpakighigala sa mga tawo sa akong ward, stake, ug sa klase sa seminary. 17 anyos na ako karon, ug bag-o lang nga mibati nga gawasnon. Pipila pa lang ka bulan ang milabay nga akong nabuntog ang akong pagkaadik sa media, nag-ampo nga matinud-anon matag adlaw, ug kanunayng nagbasa sa mga kasulatan.
Ayaw itugot nga bisan hain niini nga mga problema magpabilin sa inyong kasingkasing. Ako mopamatuod nga ang Ginoo mopasaylo niadtong kinsa nakasala. Apan dili kaayo kamo masakitan kon kamo dili na kinahanglang maghinulsol sama nako. Manghangyo ko ninyo luwasa ang inyong kaugalingon gikan sa kasakit kutob sa mahimo pinaagi sa pagkat-on sa mga sangputanan sa sala nga kamo mahadlok ug maglikay niini. Ako mosulti niini tungod kay ang sala makapatay sa kalag, ug kon kamo makasala, kamo mobati og kasakit. Ang yawa nasilag nato, nagtinguha sa atong mga kasakit, ug adunay gahum sa pag-impluwensya nato kon kita motugot kaniya. Apan ako mopamatuod nga kita makakaplag og grasya, gugma nga putli, kamabination, ug kasiguroan sa Pag-ula ni Jesukristo.