Mensahe sa Unang Kapangulohan
Ang Pagserbisyo ug Kinabuhing Dayon
Ang Manluluwas mao ang atong ehemplo sa dili hinakog nga pagserbisyo. Gihalad ang iyang hingpit nga kinabuhi sa pagserbisyo sa Langitnong Amahan ug sa tanang anak sa Iyang Amahan. Ang hiniusang katuyoan sa Amahan ug Anak mao ang paghatag kanatong tanan sa gasa sa pagka-imortal ug sa panalangin sa kinabuhing dayon (tan-awa sa Moises 1:39).
Aron mahimong takus alang sa kinabuhing dayon, kita kinahanglang mausab pinaagi sa Pag-ula ni Jesukristo—matawo pag-usab ug malimpyohan sa sala. Ang gagmayng mga bata nga wala pay otso anyos, hinoon, walay sala ug matubos pinaagi sa Pag-ula (tan-awa sa Mosiah 3:16, 21; Moroni 8:10–12).
Alang kanatong tanan kinsa miabut na sa edad sa pagkamay-tulubagon, adunay nindot nga plano nga nagtugot kanato nga malimpyohan sa sala ug maandam alang sa kinabuhing dayon. Kana nga pagpangandam nagsugod sa bunyag pinaagi sa awtoridad sa priesthood ug sa pagdawat sa Espiritu Santo. Dayon kita kinahanglang mohinumdom kanunay sa Manluluwas ug mosunod sa mga sugo nga Iyang gihatag kanato.
Si Haring Benjamin misulti sa iyang mga katawhan diha sa Basahon ni Mormon sa kalipay nga moabut gikan sa pagbati sa kapasayloan sa sala pinaagi sa Pag-ula ni Jesukristo. Dayon siya mitudlo kanila nga aron magpabilin nga mapasaylo ang ilang mga sala, kinahanglang motudlo sila sa ilang mga anak sa pagserbisyo sa usag usa ug sila kinahanglang magmanggihatagon kutob sa ilang mahimo aron matubag ang temporal ug espiritwal nga mga panginahanglan niadtong naglibut kanila. (Tan-awa sa Mosiah 4:11–16.)
Siya mitudlo usab, “Ug tan-awa, ako mosulti kaninyo niini nga mga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).
Si Jesus nagpangadto-ngadto sa pagtudlo sa Iyang ebanghelyo ug paghimo og maayo (tan-awa sa Mga Buhat 10:38). Iyang giayo ang masakiton. Iyang gibanhaw ang mga patay. Gamit sa Iyang gahum Iyang gipakaon ang liboan ka mga tawo nga gipanggutom ug walay pagkaon (tan-awa sa Mateo 14:14–21; Juan 6:2–13). Human sa Iyang Pagkabanhaw Siya mihatag og pagkaon ngadto sa pipila sa Iyang mga Apostoles sa dihang sila miadto sa baybayon sa Dagat sa Galilea (tan-awa sa Juan 21:12–13). Sa Amerika, Iyang giayo ang masakiton ug gipanalanginan ang mga bata tagsa-tagsa (tan-awa sa 3 Nephi 17:7–9, 21).
Si Santiago ang Apostol mitudlo nato kon sa unsang paagi ang tinguha sa pagserbisyo sa uban naggikan sa atong pagpasalamat sa nabuhat sa Ginoo alang kanato:
“Apan siya nga nagatutok ngadto sa hingpit nga kasugoan nga nagahatag sa kagawasan, ug nagapadayon siya sa pagtutok niini, sanglit dili man siya tigpaminaw ra nga nagakalimot, kondili tigbuhat nga nagabuhat, siya malipay diha sa iyang pagbuhat. …
“Ang relihiyon nga putli ug dili bulingon sa atubangan sa Dios nga atong Amahan mao kini, ang pagduaw sa mga ilo ug mga babayeng balo sa ilang mga pagkaguol, ug ang pag-amping sa kaugalingon nga dili mahugawan sa kalibutan” (Santiago 1:25, 27).
Usa sa kasiguradoan nga kamo malimpyohan mao ang nagkadugang nga tinguha sa pagserbisyo sa uban alang sa Manluluwas. Ang home teaching ug visiting teaching nahimong dugang kalipay ug dili buluhaton. Makaplagan ninyo ang inyong kaugalingon nga mas moboluntaryo diha sa lokal nga eskwelahan o sa pagtabang sa pag-atiman sa mga kabus diha sa inyong komunidad. Bisan tuod og gamay lang nga kwarta ang inyong mahatag niadtong nanginahanglan, naghandum kamo nga aduna pay daghan aron makahatag kamo og mas daghan pa (tan-awa sa Mosiah 4:24). Inyong makaplagan ang inyong kaugalingon nga mas naghinam-hinam sa pagserbisyo sa inyong mga anak ug sa pagpakita kanila kon unsaon sa pagserbisyo sa uban.
Samtang ang inyong mga kinaiya nausab, kamo mobati og tinguha nga mas moserbisyo nga dili magpaabut nga maila. Ako nakaila og mga disipulo sa Manluluwas kinsa mihatag og dakong mga gasa sa kwarta ug pagserbisyo uban sa usa ka determinasyon nga walay masayud gawas lang sa Dios ug ilang mga anak. Ang Dios miila sa ilang pagserbisyo pinaagi sa pagpanalangin kanila niini nga kinabuhi, ug Siya mopanalangin kanila sa kinabuhing dayon nga moabut (tan-awa sa Mateo 6:1–4; 3 Nephi 13:1–4).
Samtang kamo nagtuman sa sugo sa pagserbisyo sa uban (tan-awa sa Mateo 22:39), kamo mibati og kausaban sa inyong garbo. Gikorihian sa Manluluwas ang Iyang mga Apostoles sa dihang sila naglalis kon kinsa ang pinakamaayo kanila. Siya miingon:
“Ayaw usab kamo pagpatawag nga mga agalon: kay kamo adunay usa lamang ka Agalon, nga mao si Kristo.
“Ang labing dako kaninyo ma-inyo siyang sulugoon” (Mateo 23:10–11).
Ang Manluluwas nagtudlo nato kon unsaon nga makat-on sa pagserbisyo sa uban. Siya hingpit nga miserbisyo, ug kita kinahanglang magkat-on sa pagserbisyo sama sa Iyang pagkat-on—grasya ug dugang pa nga grasya (tan-awa sa D&P 93:12–13). Pinaagi sa atong pagserbisyo, kita mas mahisama Kaniya. Kita mag-ampo uban sa tibuok kusog sa atong mga kasingkasing sa paghigugma sa atong mga kaaway sama nga Siya nahigugma kanila (tan-awa sa Mateo 5:43–44; Moroni 7:48). Dayon kita tingali sa katapusan mahimong takus sa kinabuhing dayon uban Kaniya ug sa atong Langitnong Amahan.
Mosaad ko nga kita mas maayong makaserbisyo samtang kita nagsunod sa mga pagtulun-an ug ehemplo sa Manluluwas.
Pagtudlo Niini nga Mensahe
Si Elder M. Russell Ballard sa Korum sa Napulog Duha ka mga Apostoles miawhag kanato sa pag-ampo alang sa mga oportunidad sa pagserbisyo: “Sa inyong pag-ampo sa buntag matag adlaw, pangayo sa Langitnong Amahan nga giyahan kamo nga makakita og oportunidad sa pagserbisyo sa usa sa Iyang bililhong mga anak. Dayon lakaw tibuok adlaw … mangita og tawo nga katabangan” (“Magmatinguhaong Moapil,” Liahona, Nob. 2012, 31). Ikonsiderar ang pagdapit niadtong inyong gitudloan sa paghimo og tumong sa pag-ampo matag buntag alang sa mga oportunidad sa pagserbisyo ug dayon sa pagpangita niini tibuok adlaw.