Grasya ug ang Pag-ula ni Jesukristo
Kita makadawat og kalig-on sa pagbuhat og labaw pa kay sa atong mahunahuna.
Mga paghulagway sa litrato pinaagi ni Welden C. Andersen
Sa ting-init niadtong 2012, si Palakiko C. bag-o lang nakagradwar sa high school sa Hawaii, USA, ug naghandom nga makaeskwela sa Brigham Young University ug makamisyon. Si Palakiko daghan na og nahimo aron mangandam alang sa iyang misyon—nakakuyog na siya sa full-time nga mga misyonaryo tibuok adlaw katulo ka higayon, ug siya kanunay mokuyog nila sa pagbisita ug sa pagtudlo sa ebanghelyo ngadto sa mga pamilya.
Usa ka gabii si Palakiko ug ang mga misyonaryo nagsugod sa pagtudlo og part-member nga pamilya uban sa lima ka anak, nag-edad og 8 hangtud sa 14, kinsa wala pa mabunyagi.
“Kami mibisita kanila sulod sa unom ka semana,” miingon Palakiko. “Matag semana, akong nakita nga mitubo ang ilang hugot nga pagtuo samtang kami nagtudlo nila sa doktrina nga mga baruganan nga makatabang nila nga makadawat og kinabuhing dayon.”
Sa wala madugay tanang lima ka anak midawat sa imbitasyon nga magpabunyag ug mihangyo ni Palakiko nga siya ang mobunyag. Madasigon siyang miuyon. Ang pagbunyag nila usa ka pribelihiyo ug usa ka dungog. Apan alang kang Palakiko, dihay mas lisud nga hagit: gihangyo usab siya nila nga mohatag og pakigpulong mahitungod sa Espiritu Santo sa tulumanon sa bunyag.
Mas gikuyawan si Palakiko. “Unsaon nako paghatag og pakigpulong sa adlaw nga ilang mahinumduman sa tibuok nilang kinabuhi?” Nangutana siya. “Unsa man ang akong isulti?”
Bisan pa sa iyang kabalaka, nasayud si Palakiko nga kinahanglan niya kining buhaton, ug siya misugod sa pag-andam sa iyang pakigpulong nianang adlawa.
“Akong gibuhat ang tanan aron sa pagsiguro nga ang tanan mamaayo ra,” siya miingon. Nag-ampo siya, nagbasa sa mga kasulatan alang sa giya ug kahupayan, ug militok sa pag-ampo sa bunyag sa iyang hunahuna. Sa adlaw sa tulumanon, ang bunyag maayo ra. Ug samtang siya mihatag sa iyang pakigpulong ug nag-focus sa pagpaningkamot nga makabaton sa Espiritu, siya mibati nga gigiyahan unsay isulti.
“Walay lain nga panahon sa akong kinabuhi nga mas gibati nako ang Espiritu kay sa niana nga pakigpulong, miingon si Palakiko. Nalipay ko nga nahimong instrumento sa mga kamot sa Ginoo.”
Si Palakiko nakahimo sa pagbuhat unsay iyang kinahanglan nga buhaton tungod kay siya nalig-on pinaagi sa grasya, o sa makaabag nga gahum, sa Pag-ula sa Manluluwas.
Unsa ang Makaabag nga Gahum ni Jesukristo?
Tungod kay kitang tanan makasala, kita kinahanglan nga makat-on ug mogamit sa mga baruganan sa paghinulsol, usa ka mahinungdanong bahin sa ebanghelyo ni Jesukristo. Kon wala ang sakripisyo sa Manluluwas, walay usa nato ang makabuntog sa sala ug makabalik sa presensya sa atong Amahan.
Ang pagtabang nato nga makabuntog sa sala usa ka aspeto sa grasya sa Manluluwas. Apan adunay lain. Ang grasya gihulagway isip “balaan nga panabang o kalig-on … gihatag pinaagi sa kalooy ug gugma sa Dios.”1 Pinaagi sa grasya ni Jesukristo, kita malig-on sa “pagbuhat ug pagbinuotan ug sa pagserbisyo lapas sa atong kaugalingong mga tinguha ug natural nga kapasidad.”2 Sumala sa gipasabut ni Elder David A. Bednar sa Korum sa Napulog Duha ka mga Apostoles, “Ang pulong grasya gigamit kanunay diha sa mga kasulatan nga nagpasabut sa makalig-on o makaabag nga gahum.”3
Gipanalanginan si Palakiko pinaagi sa grasya sa Manluluwas sa pagtuman sa usa ka butang nga iyang gibati nga dili niya mahimo sa iyang kaugalingon. Kanang sama nga gahum makatabang natong tanan sa ginagmay ug sa dinagko nga mga paagi.
Unsaon Nato nga Makaangkon sa Grasya sa Manluluwas?
Kon kita nagkinahanglan og giya o suporta o kalig-on, ang Dios makatabang nato. Apan depende usab kini nato. Kinahanglan kitang mangayo sa Iyang tabang ug magpakatakus niini.
Sama sa giingon ni Elder Richard G. Scott sa Korum sa Napulog Duha ka mga Apostoles, “Kon kita mosunod sa mga sugo sa Ginoo ug moserbisyo sa Iyang mga anak sa dili hinakog nga paagi, ang natural nga sangputanan mao ang gahum sa Dios—gahum sa pagbuhat og mas daghan kay sa mabuhat nato sa atong kaugalingon. Ang atong mga panabut, mga talento, atong mga abilidad mapalapdan tungod kay makadawat kita og kusog ug gahum gikan sa Ginoo.”4
Kini nga sumbanan makita sa kinabuhi ni Jasmine B. sa Washington, USA, kinsa nakadawat og tabang sa pagsagubang sa usa ka sakit. Sa wala pa masakit, usa siya ka himsog nga batan-ong babaye kinsa nagmalampuson sa iyang track team sa high school ug ganahan nga momata og sayo alang sa seminary.
Dayon nagsugod siya sa pagkasakit. Dali kaayo siyang migaan og 15 ka libras, ug bisag unsapa ka taas ang iyang pagkatulog, nagkaanam gyud kalisud ang pagbangon alang sa seminary. Dili siya makadagan og maayo sama kaniadto ug gigutom, giuhaw, ug huyang sa tanang higayon.
Milabay ang sobra sa usa ka bulan una siya nagsugod sa pag-ampo alang sa panabang. “Dugay kaayo kong milihok,” miingon siya, “tungod kay ang paghunahuna sa pag-ampo alang sa tabang mao ang buhat sa pagtahan, pag-angkon nga aduna akoy diperensya. Nakapahadlok kini nako.”
Apan tungod kay siya nagpaubos sa iyang kaugalingon sa pagtinguha sa tabang sa Ginoo, misugod pag-abut ang mga tubag. Miadto siya sa doktor, kinsa nakadiskobre nga siya adunay type 1 diabetes, nga nagpasabut nga ang iyang lawas dili makahimo og insulin sa pagproseso og asukar. Ang diabetes adunay tibuok kinabuhi nga sangputanan ug kinahanglan gayud nga mamonitor pag-ayo. Bisan og ang mga doktor naghimo og plano sa pagtabang niya sa pagdumala sa iyang kondisyon, nagsugod siya sa pagkabalaka nga dili na siya makapadayon sa pagdagan.
“Wala gayud ako mohunong sa pag-ampo samtang ako naningkamot sa pagsabut sa akong bag-ong kinabuhi ug sa pagkontrol sa akong sakit,” miingon siya. “Nag-ampo ko alang sa kalig-on ug pagsabut ug nga ako makadawat niini nga pagsulay. Dili unta ako makalahutay niadtong malisud nga mga adlaw kon wala pa ang pag-ampo.”
Naningkamot pag-ayo si Jasmine. Sulod sa duha ka semana sa pagkadayagnos, nagpraktis na siya og balik sa pagdagan, ug sa ulahing bahin nianang tuiga maayo ang iyang resulta sa mga kompetisyon. “Nagtuo ko nga ang Langitnong Amahan mipanalangin nako og lig-on, himsog nga lawas tungod kay naningkamot ko nga mahimong lig-on sa ebanghelyo, miingon siya. “Ang pagka-dunay diabetes dili mao ang katapusan sa kalibutan. Uban sa Iyang tabang, nasayud ko nga makalahutay ko niini.”
Pinaagi sa grasya sa Dios ug pinaagi sa iyang pagsalig diha Kaniya, si Jasmine nakahimo sa pagsugakod sa iyang sakit ug adunay maanindot nga mga kalampusan sa iyang kinabuhi.
Ang Grasya Maangkon sa Tanan
Kining sama nga gahum sa paglig-on, ang grasya ni Kristo, maangkon natong tanan. Matag higayon nga kamo mobati nga nag-inusara o nabug-atan o nawad-an sa kadasig, hinumdumi nga ang grasya ni Ginoong Jesukristo inyong maangkon.
Sama sa gipasabut ni Elder Craig A. Cardon sa Seventy, “Kon kita mobansay og hugot nga pagtuo diha ni Ginoong Jesukristo, ang gahum sa Iyang Pag-ula molig-on nato sa higayon sa atong panginahanglan [tan-awa sa Jacob 4:7], ug ang Iyang matubsanon nga gahum nagbalaan nato samtang kita ‘[mosalikway] sa kinaiyanhon nga pagkatawo’ [Mosiah 3:19]. Makahatag kini og paglaum ngadto sa tanan, ilabi na niadtong kinsa mobati nga ang pagbalik-balik sa tawhanong mga kahuyang lapas pa sa pagkaandam sa Manluluwas sa pagtabang ug pagluwas.”5