Unsaon sa Pagpili og Maayong mga Higala
Gikan sa usa ka debosyonal nga pakigpulong sa Brigham Young University nga gihatag niadtong Nobyembre 6, 2005.
Paghulagway sa litrato pinaagi ni Cody Bell
Sa usa ka survey nga gihimo sa pinili nga mga ward ug stake sa Simbahan, kita nakakat-on og usa ka labing importante nga kamatuoran. Kadtong mga tawo kansang mga higala naminyo sa templo sa kasagaran naminyo sa templo, samtang kadtong mga tawo kansang mga higala wala maminyo sa templo sa kasagaran wala maminyo sa templo. Ang impluwensya sa usa ka higala nakita nga mas dominante nga butang kay sa awhag sa ginikanan, mga panudlo sa klasehanan, o gilay-on sa usa ka templo.
May kalagmitan kita nga mahimong sama niadtong atong gidayeg. Sama sa asoy sa classic ni Nathaniel Hawthorne “The Great Stone Face”, atong sundon ang mga linihokan, ang mga kinaiya, gani ang mga pamatasan niadtong kinsa atong gidayeg—ug sila sa kasagaran ang atong mga higala. Pakig-uban niadtong kinsa, sama kaninyo, nagplano dili sa temporaryong kasayon, mabaw nga mga tumong, o walay klaro nga ambisyon apan para niadtong mga butang nga labing mahinungdanon—gani may mahangturong mga tumong.
Kinulit diha sa silangang bong-bong sa Stanford University Memorial Church mao ang kamatuoran: “ang tanang dili mahangturon mubo [ra] kaayo, [ug] ang tanan nga may kinutuban gamay [ra] kaayo.”1
Labaw pa sa hugpong sa inyong kahigalaan, ako moawhag ninyo sa pagpakighigala sa inyong Langitnong Amahan. Siya andam nga motubag sa pag-ampo sa inyong kasingkasing. Ingon nga Amahan sa inyong espiritu ug milalang ninyo diha sa Iyang kaugalingon nga hitsura, nga nasayud sa katapusan gikan sa sinugdanan, ang Iyang kaalam dili mapakyas ug ang Iyang tambag kanunay eksakto. Pakighigala Kaniya.
Adunay laing importanti nga kinahanglan nimong mahigala, ug mao kana ang bishop sa inyong ward. Siya gitawag sa Dios pinaagi sa pagpanagna ug sa pagpandong sa mga kamot niadtong kinsa adunay pagtugot. Duna siyay katungod sa langitnong panabang sa paghatag kaninyo og mga tambag ug giya. Pakighigala kaniya.
Pilia ang inyong mga higala uban sa pagpaniguro.