OK ba ang … ? Makahimo ba ko sa … ?
Si Heidi McConkie nagpuyo sa Delaware, USA.
Ania ang unsay inyong mahimo aron masayud kon sa unsang paagi ang mga sumbanan sa Alang sa Kalig-on sa mga Kabatan-onan magamit sa inyong sitwasyon.
Si Brooke P. sa California, USA, mibati nga ang iyang determinasyon mihuyang—mas sayon nga makighiusa sa iyang mga kauban sa team. Ang ubang mga babaye namugos niya nga magsinina sama kanila sa mga praktis ug mga dula.
Si Brooke nakahukom na nga siya magtarung sa pagsinina, apan wala siya masayud unsay gipasabut niana sa pagdula sa iyang sport. OK ra ba nga magsinina sama sa iyang mga kauban sa team atol lang sa kalihokan sa sports?
“Nakahukom ko nga mag-research, miingon si Brooke. “Akong gitan-aw ang Alang sa Kalig-on sa mga Kabatan-onan, ang mga kasulatan, mga pakigpulong sa Simbahan—tanan nga akong makuha. Walay makahulagway sa akong tukma nga sitwasyon ug naghatag nako og piho nga tambag. Apan nasayud ko nga ang Langitnong Amahan nakaila nako ug nga Siya nasayud kon unsa ang tarung nga pagsinina.”
Busa milihok pag-usab si Brooke. “Nakahukom ko nga moluhod ug mag-ampo,” miingon siya. Samtang siya nag-ampo, iyang gipahayag ang iyang tinguha sa pagsunod sa mga sugo ug dayon nangutana kon OK ra ba nga magsinina sama sa iyang mga kauban sa team alang sa ilang mga praktis ug mga dula.
Human sa iyang pag-ampo, mibati si Brooke nga siya kinahanglan dili mousab sa iyang mga pagpili sa pagsinina aron sa pagtagbaw sa iyang mga kaedad. Bisan og ang iyang desisyon dili popular, si Brooke nakakaplag og pagsalig ug kalinaw sa pagkahibalo nga ang iyang pagpili makapahimuot sa Langitnong Amahan.
Imong Istorya
Tingali wala kamo makasugat sa problema ni Brooke, apan tingali kamo nag-atubang og sama nga problema. Naningkamot kamo sa pagbuhat sa labing maayo sa pagsunod sa sumbanan sa ebanghelyo—ang pagsinina og tarung, paggamit og makapabayaw nga mga pinulongan, pagtan-aw sa maanindot nga salida, pagsunod sa Pulong sa Kaalam, …
Dayon dunay kalit nga nahitabo! Dunay mihimo nga malisud ang inyong kinabuhi, ug sa kalit lang “katugbang sa tanan nga mga butang” (2 Nephi 2:11) labaw pa kaysa gikutlo kanunay nga pulong gikan sa mga kasulatan. Inyong mga higala—o bisan gani sa inyong kaugalingong mga sakop sa pamilya—mopugos ninyo nga magsinina o magsulti o maglihok nga lahi gikan sa unsay inyong gibati nga matarung. Gusto kamong mopili og maayo nga mga pagpili sa ebanghelyo, apan nagsugod sa pagkalibug: Unsa may kahulugan sa pagsunod sa mga sumbanan diha sa inyong kinabuhi? Sama ni Brooke, inyong madiskobrehan sa inyong kaugalingon ang mga tubag niini nga mga pangutana pinaagi sa pagtuon, pag-ampo ug personal nga pagpadayag.
Inyong mga Pangutana
Inyong matag adlaw nga kinabuhi puno sa mga pangutana: Unsay akong isul-ob sa eskwelahan? Unsa ang akong kan-on sa paniudto? Kinsa ang akong kuyugan? Pipila ka mga pangutana adunay yano ra kaayo nga mga tubag. Usapon ba nako kining piraso sa chewing gum nga akong nakit-an sa daplin sa dalan? Dili. Tingali dili ka magduhaduha mahitungod niana. Pipila sa inyong mga pangutana, ilabi na mahitungod sa mga sumbanan, mahimong lisud tubagon: Unsa nga musika ang angay nga paminawon? Unsaon nako sa pagbalaan sa Adlaw nga Igpapahulay? Maayo gani, dili kinahanglan nga kamo lang ang motubag sa tanang mga pangutana. Ang atong buhing mga propeta milatid sa mga sumbanan sa ebanghelyo, ug kamo makatuon sa ilang mga pagtulun-an diha sa Alang sa Kalig-on sa mga Kabatan-onan.
Human kamo makatuon sa mga sumbanan, tingali dili gyud kamo makahibalo sa eksakto kon unsaon sa paggamit niini sa matag sitwasyon, ug normal ra kana. Kamo anaa sa maayong grupo kon kamo adunay pipila ka wala matubag nga mga pangutana kon unsa ang piho nga mga sumbanan alang sa inyong sitwasyon.
Hunahunaa lang ang istorya sa Basahon ni Mormon diin ang Ginoo misugo kang Nephi sa paghimo og barko. Si Nephi wala nasayud diha-diha dayon kon unsaon sa pagsunod sa sugo sa Ginoo, apan iyang gipili nga mosulay. Ug siya wala magduhaduha sa pagtinguha og tabang; siya nangutana, “Asa ako paingon nga ako makakita og oro nga tunawon, nga ako unta makabuhat og mga himan sa paghimo og barko?” (1 Nephi 17:9). Misugod siya pinaagi sa paghulagway unsa ang unang lakang—paghimo og mga hiraminta—ug dayon sa pagpangutana sa Ginoo sa pagtabang kaniya nga masayud unsaon sa pagbuhat niana. Ang Ginoo mitubag sa mga pangutana ni Nephi (ug hinay-hinay iyang nakompleto ang barko), ug kon kamo naninguha sa pagsunod sa mga sugo, Siya makatubag usab sa inyong mga pangutana.
Inyong mga Tubag
Kon kamo adunay mga pangutana kon unsaon sa pagsunod sa usa ka piho nga sumbanan o pagtuman sa usa ka piho nga sugo, una basaha ang mga kasulatan, Alang sa Kalig-on sa mga Kabatan-onan, Matinud-anon sa Tinuhoan, ang mga tambag sa mga propeta, ug pag-ampo. Mahimo ninyong tan-awon ang importante nga mga kasulatan nga gilista diha sa mga booklet o mga pakigpulong sa kinatibuk-ang komperensya—ug gani mahimong ilakip ang dugang mga kasulatan sa inyong pagsiksik. Samtang kamo magtinguha og kahibalo pinaagi sa pagtuon sa ebanghelyo, ang Espiritu Santo “modan-ag sa [inyong] mga salabutan” (Alma 32:28).
Makaduol usab kamo sa mga sakop sa pamilya, mga higala ug mga lider sa Simbahan alang sa suporta. Sila makagiya kaninyo sa makatabang nga mga kapanguhaan, makahatag og suporta ug pag-awhag, ug gani mopakigbahin og personal nga mga kasinatian kabahin sa susama nga mga isyu ug sa unsang paagi sila mibuntog sa ilang mga hagit.
Usahay bisan human sa pag-ampo, sa pagbasa pag-usab sa Alang sa Kalig-on sa mga Kabatan-onan, pagtuon sa mga kasulatan, ug pagtinguha og tambag, mahimong bation gihapon ninyo nga ingon og kamo naglatagaw sa walay kasiguroan kabahin sa piho nga mga sumbanan. Bisan og kamo nakadawat og talagsaong tambag, ang paggamit niini sa inyong mga kahimtang usahay mabati nga daw naningkamot sa pagpangita sa dalan pinaagi sa paggamit og globe imbis mapa sa dalan. Sa ubang panahon kamo kinahanglan nga mohimo og dali nga mga desisyon nga walay panahon sa pagtuon niini sulod sa dugay nga panahon.
Bisan asa niini, hinumdumi nga ang pag-ampo usa ka gamhanan nga kapanguhaan. Dili kana mao ang katapusang solusyon; ang pag-ampo mao ang dapit nga sugdan ninyo ang pagpangita sa kahibalo ug usa ka makatabang nga hiraminta nga anaa na. Ang Langitnong Amahan nakahibalo ninyo sa personal—sa inyong mga gasa, sa inyong mga hagit, sa inyong mga kalig-on, ug sa inyong mga pakigbisog. Busa kon kamo wala masayud unsaon sa pagsunod sa mga sumbanan sa Simbahan sa usa ka piho nga sitwasyon, ayaw kahadlok. Siya nasayud! Sayon ra nga malit-ag sa pagpaningkamot aron mohaum sa ebanghelyo ang inyong kinabuhi; apan hinoon, Siya mopakita kaninyo unsaon nga ang inyong kinabuhi mohaum sa ebanghelyo. Kon kamo mag-ampo pinaagi sa hugot nga pagtuo, Siya motudlo kaninyo, mohatag ninyo og mga tubag “sa takna gayud” (D&P 100:6) nga kinahanglan ninyo kini. Kana nga oportunidad alang sa personal nga pagpadayag mao ang usa sa atong talagsaong mga panalangin tungod kay kita nabunyagan ug nakadawat sa gasa sa Espiritu Santo.
Ang Inyong Ehemplo
Samtang kamo magsunod sa mga sumbanan sa Dios, kamo mahimong usa ka kahayag ngadto sa uban sa inyong palibut. Kamo makaawhag kanila sa pagsunod sa mga sugo. Ug kon sila maglibug mahitungod kon unsaon sa pagsunod, makatudlo kamo kanila niini nga mga sumbanan alang sa pagpangita og mga tubag sa ilang personal nga mga pangutana.
Samtang kamo naningkamot sa paghimo og maayong ehemplo, ayaw ka surprisa kon usahay ang uban—bisan niadtong kinsa usab naningkamot sa pagsunod sa ebanghelyo—dili kanunay mohimo sa samang pagpili nga inyong gihimo. Kon gibati ninyo nga nasagmuyo, hinumdumi lang nga usa ka tawo, tingali si Mama o si Papa, kausa mitudlo kaninyo sa tubag bisan sa labing sukaranan nga mga pangutana—sama sa Usapon ba nako kini nga chewing gum nga akong nakit-an sa daplin sa dalan? Mao nga paningkamot nga magmapailubon sa inyong kaugalingon ug sa uban samtang kitang tanan naningkamot sa pagpangita sa mga tubag sa lisud nga mga pangutana, ang matang nga dili kanunay moabut uban sa oo o dili nga tubag. Unsaon man nako pagsunod niini nga sumbanan sa akong kinabuhi? Ibutang sa hunahuna nga kitang tanan dili hingpit nga mga tawo nga nagkat-on sa matag adlaw sa pagpuyo sa usa ka hingpit nga ebanghelyo ug naningkamot nga mahimong hingpit ang atong mga kaugalingon. Usa kini ka nagpadayon nga proseso.
Ug kamo mahimong moangkon og aktibong bahin niana nga proseso! Aktibong magtinguha sa mga tubag sa inyong personal nga mga pangutana ug mag-awhag sa uban sa pagbuhat sa ingon. Samtang kamo nagbuhat sa ingon, hinumdumi kanunay nga bisan sa mga pagpili sa uban, kamo makapili sa pagsunod sa mga sugo sa Langitnong Amahan.