Ang Regalo sa Birthday sa Akong Bishop

Mariana Cruz, Rio de Janeiro, Brazil

Sa akong birthday sa usa ka Dominggo sa buntag, ang akong bana ug ako nangandam sa pagsimba sa dihang mibagting ang telepono. Gitubag nako, ug ang bishop miingon, “Nasayud ko nga karon ang imong birthday, mahimo bang magkita ta sa akong opisina sulod sa 30 minutos? Ganahon kong makig-istorya nimo.”

Nakuryoso, nagdali-dali ko og adto sa simbahan.

Sa iyang opisina, si bishop miingon kanako, “Sister Cruz, ako adunay regalo sa birthday alang nimo. Ang Ginoo nagtawag kanimo nga moserbisyo isip presidente sa Young Women. Imo bang dawaton kini nga calling?” Nakulbaan ko og maayo, apan akong gidawat ang calling. Gipaluyohan ug gi-set apart ko nianang adlawa.

Sa dihang miuli ko human sa simba, milingkod ko sa akong higdaanan. Nakaamgo ko sa gibug-aton sa responsibilidad. Mihilak ko ug mibati nga dili angay sa buhat. Dako kaayo ang responsibilidad sa paggiya sa mga batan-ong mga babaye! Nabunyagan ko sa dihang 22 anyos ko ug wala pa gayud makatambong sa mga kalihokan sa Young Women sukad. Sa unsang paagi nahimo kong presidente sa Young Women?

Gibuhat nako ang bugtong butang nga akong nasayran nga buhaton—miluhod ug mihangyo ko sa Langitnong Amahan alang sa giya niining bag-o nga calling. Nianang higayona ako adunay kasinatian nga dili gayud nako makalimtan. Samtang naghunahuna ko sa matag batan-ong babaye, nakasabut ko nga ang matag usa nila anak nga babaye sa Langitnong Amahan. Ang matag usa nagkinahanglan og usa ka presidente kinsa mohigugma kanila ug motabang kanila nga makasabut nga ang Dios nahigugma kanila. Sa akong hunahuna akong nakita ang mga ngalan sa tanang dili kaayo aktibo nga mga batan-ong babaye (kinsa wala pa gayud nako mahimamat), ug nakasabut ko nga sila usab mga anak nga babaye sa Langitnong Amahan ug nagkinahanglan sa akong atensyon. Nabati nako ang potensyal sa matag usa.

Ang mosunod nga mga bulan dili sayon. Naningkamot ko nga maila-ila ang matag batan-ong babaye ug masabtan ang ilang panginahanglan. Kauban sa aktibo nga mga batan-ong babaye, ang among kapangulohan mitabang niadtong dili kaayo aktibo nga mahibalik sa pagkaaktibo. Akong nasaksihan ang kamot sa Ginoo nga naglihok sa daghang paagi.

Sa dihang na-release ko sa akong calling, nabalaka ko basin kulang pa ang akong paningkamot. Sa pag-abut sa balay, miluhod ug mihangyo ko sa Langitnong Amahan kon ang akong pagserbisyo madawat ba. Nakadawat ko og tam-is nga pagbati nga Siya nalipay.

Naghunahuna ko niadtong birthday nako nga mahimong dili unta nako dawaton ang calling tungod sa uban pa nakong mga responsibilidad. Apan ako unta ang maalkansi kon wala pa nako dawata ang calling. Mawala unta nako ang oportunidad sa pagkat-on sa pagpaubos, pag-angkon og panabut, pagpalambo og pailub, ug mahimong instrumento sa kamot sa Ginoo. Apan labaw sa tanan mapakyas unta nako ang Ginoo sa Iyang pagsalig kanako, ug mapakyas unta ko sa pagkat-on nga ang oportunidad sa pagserbisyo usa ka gasa.