Mensahe sa Visiting Teaching
Ang Balaan nga Misyon ni Jesukristo: Kahayag sa Kalibutan
Mainampoong tun-i kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Samtang kita makasabut nga si Jesukristo mao ang Kahayag sa Kalibutan, atong mapalambo ang atong pagtuo Kaniya ug mahimong kahayag ngadto sa uban. Si Kristo mipamatuod sa Iyang tahas isip “tinuod nga kahayag nga nagdan-ag sa matag tawo nga moanhi sa kalibutan” (D&P 93:2) ug mihangyo nga atong “ipakita ang [Iyang] kahayag aron kini moiwag sa kalibutan” (3 Nephi 18:24).
Ang atong mga propeta nagpamatuod usab sa Kahayag ni Kristo. Si Presidente Henry B. Eyring, Unang Magtatambag sa Unang Kapangulohan, miingon: “Matag higayon nga kamo mopili sa pagsulay sa pagpakabuhi sama sa Manluluwas, inyong mapalig-on ang inyong pagpamatuod. Moabut ang panahon nga kamo makahibalo sa inyong kaugalingon nga Siya ang Kahayag sa Kalibutan. … Kamo ang mopaaninag ngadto sa uban nianang Kahayag ni Kristo sa inyong kinabuhi.”1
Si Elder Quentin L. Cook sa Korum sa Napulog Duha ka mga Apostoles miingon kabahin sa atong pagkahimong kahayag sa kalibutan: “Kinahanglan natong panalipdan ang atong mga pamilya ug maanaa gayud sa atubangan uban sa tanang maayong mga tawo sa pagbuhat sa bisan unsang butang kutob sa atong mahimo aron sa pagpreserbar sa kahayag, paglaum, ug moralidad sa atong mga komunidad.”2
Gikan sa mga Kasulatan
Gikan sa Atong Kasaysayan
Ang mga babaye nga Santos sa Ulahing mga Adlaw kaaron nagpadayon sa pagpakita sa ilang kahayag.
Sa ika-80 nga andana sa taas nga building sa Hong Kong, China, usa ka single nga sister nga may kakulangan sa pisikal—ang bugtong Santos sa Ulahing mga Adlaw sa iyang pamilya—nagmugna og panimalay nga kadangpan diin siya ug ang mga bisita makabati sa impluwensya sa Espiritu. Iyang gibutang sa duol ang iyang mga kasulatan, mga manwal sa Relief Society, ug hymnbook. Moadto siya sa templo sa pagpahigayon sa mga ordinansa alang sa iyang mga katigulangan.3
Sa Brazil ang usa ka matarung nga inahan mipadako sa iyang mga anak diha sa kahayag sa ebanghelyo. Ang mga kanta sa primary mao ang madungog diha sa palibut sa iyang pula nga beka nga balay, ug mga litrato sa templo, mga propeta sa Dios, ug sa Manluluwas nga gikan sa Liahona mipuno sa mga bongbong. Siya ug ang iyang bana misakripisyo aron mabugkos didto sa templo aron ang ilang mga anak matawo sa pakigsaad. Ang kanunay niyang pag-ampo mao nga ang Ginoo motabang kaniya sa pagpadako sa iyang mga anak diha sa kahayag, kamatuoran, ug kalig-on sa ebanghelyo.4