Alang sa Kalig-on sa mga Kabatan-onan
Putli nga mga Kasingkasing ug Limpyo nga mga Lawas
Ang Ginoo misugo, “Mag-andam sa inyong mga kaugalingon, … oo, limpyohi ang inyong kasingkasing … aron Ako makahimo kaninyo nga limpyo” (D&P 88:74).
Paghulagway sa litrato pinaagi ni Matthew Reier
“Kamong mga batan-on nagdako sa teritoryo sa kaaway,” miingon si Presidente Boyd K. Packer, Presidente sa Korum sa Napulog Duha ka mga Apostoles.1 Tinud-anay, ang moral nga mga sumbanan sa matinud-anong mga Santos sa Ulahing mga Adlaw giataki! Andam ba kamong makigbatok sa bisan unsang hugaw o dili putli nga panghunahuna nga mahimong isulod ni Satanas, sa Internet, ug sa kalibutan diha sa inyong ulo o kasingkasing?
Andama ang Inyong mga Kaugalingon
Sa kasagaran sa mga buntag sa wala pay alas 5:00, mga grupo sa takus nga kabatan-onan ngitngit pa nga maglinya na diha sa mga pultahan sa Templo sa Salt Lake, nga andam nga mosulod sa bunyaganan. Milakang sila gikan sa kangitngit sa kalibutan paingon sa kahayag sa templo. Human magsinina og puti, hilom silang moadto sa talagsaong bunyaganan, diin sila bunyagan alang sa mga patay. Samtang sila mokawas gikan sa lunsay, makabayaw nga tubig sa bunyaganan, kini nga mga kabatan-onan nalig-on, nasayud nga sila miapil sa usa ka mahangturong buhat alang sa uban.
Mobalik sila ngadto sa kangitngit, nagdali sa pag-eskwela—apan dili na sila pareha sa una, tungod kay sila nasangkapan sa gahum ug himaya (tan-awa sa D&P 109:22–23). Nagdala sa kahayag ug kaputli sa templo sa ilang mga kasingkasing, andam sila sa pagtukmod sa kangitngit niining “teritoryo sa kaaway” ug magpabilin nga limpyo. Kini nga talan-awon dili lang sa Templo sa Salt Lake—kini mahitabo kanunay samtang ang mga kabatan-onan sa tibuok kalibutan mobiya sa mangitngit nga teritoryo sa kaaway ug mopili sa pagpuyo nga takus ug mosulod sa kahayag sa templo.
Sama pananglit, usa ka sister ug brother gikan sa Colorado, USA, matag usa nabunyagan alang sa kapin 50 sa ilang mga katigulangan niining miaging tuig ug nakasinati sa kaputli sa templo. Ang igsoon nga lalaki miingon, “Makadawat ako og nindot, espirituhanon nga pagbati kon naa ko sa templo. Unya, kon ako mag-atubang og mga tintasyon, mahinumdom ako niana nga pagbati ug makatabang kini nako.” Sa pagpaningkamot sa pagpuyo nga takus sa pagsulod sa templo, ang igsoon babaye milista sa iyang journal kon unsay iyang buhaton ug dili buhaton kon mag-atubang siya og tintasyon. Mihimo siya og baruganan, ug gani gipakigbahin niya ang lista uban sa iyang mga ginikanan ug mga higala aron sila makatabang kaniya. Kining duha ka mga batan-on mihimo og gamhanang moral nga taming alang sa ilang mga kasingkasing, hunahuna ug mga lawas.
Limpyohi ang Inyong Kasingkasing
Uban sa limpyo nga mga lihok, kamo ba adunay limpyo nga mga tinguha?
Si David, ang salmista, nag-ampo diha sa Salmo 139:23–24: “Susiha ako, Oh Dios, ug hibaloi ang akong kasingkasing: sulayi ako, ug hibaloi ang akong mga hunahuna: ug tan-awa kong kanako aduna bay dalan sa pagkadautan.” Nagpasabut niini nga mga bersikulo, mitambag si Presidente Lorenzo Snow (1814–1901): “Ako moawhag sa [matag tawo] mosunod niining pag-ampo ni David. … Daghan ang napakyas sa pag-abut niini nga sumbanan sa kamaayo tungod kay naghimo sila sa mga butang diha sa tago … nga … mopalayo kanila gikan sa Labawng Makagagahum.”2
Ang paghangyo sa Langitnong Amahan sa paghimo og usa ka limpyo nga kasingkasing diha kaninyo usa ka buhat sa hugot nga pagtuo. Siya aduna sa tanang gahum; dangup Kaniya kanunay ug mapainubsanong mangayo alang sa Iyang balaan nga tabang nga makapadayon sa inyong mga pagbati nga putli—gani magpabilin nga putli sa sekswal nga paagi.
“Panaggawi kamo diha sa Espiritu, ug ayaw ninyo pagtumana ang mga pangibog sa unod” (Mga Taga-Galacia 5:16). Pagkadako nga gahum ang inyong maangkon kon kamo maglakaw diha sa Espiritu! Matag Dominggo samtang kamo moambit sa sakrament, kamo mosaksi nga kamo andam sa kanunay mohinumdom ni Jesukristo (tan-awa sa D&P 20:77, 79). Ang paghinumdom sa Manluluwas makahatag kaninyo og espirituhanong gahum sa pagbiya gikan sa kahugaw.
Pagmalimpyo sa Atubangan sa Dios
Ngano nga ang sekswal nga kaputli usa ka sugo? Tungod kay ang Langitnong Amahan mihatag sa mga gahum sa paglalang sulod sa kaminyoon alang sa diosnon nga katuyoan lamang. Si Elder David A. Bednar sa Korum sa Napulog Duha ka mga Apostoles miingon, “Ang atong pagbati ug paggamit niining langitnong gahum motino pag-ayo sa atong kalipay dinhi sa mortalidad ug sa atong kapalaran sa kahangturan.”3
Ang sekswal nga kasuod naghatag og mahigugmaon, emosyonal nga panaghiusa sa bana ug asawa. Hinoon, si Elder Richard G. Scott sa Korum sa Napulog Duha ka mga Apostoles mipasidaan, “Kadtong suod nga mga buhat gidili sa Ginoo gawas sa malahutayong pasalig sa kaminyoon tungod kay kini makadaot sa Iyang mga katuyoan. … Kini makahimo og grabe nga kadaot sa emosyonal ug espiritwal. Bisan tuod ang mga partisipante wala makaamgo nga nahitabo na kini karon, makahibalo ra sila unya. Ang sekswal nga imoralidad makababag sa impluwensya sa Espiritu Santo.”4
Ang sekswal nga kasuod wala ihatag aron sa pagtagbaw sa kahigal, pagkasikat, o kakuryuso. Ang ingon nga hinakog nga paggamit niining hinatag sa Dios nga gasa kanunay maoy hinungdan sa kawalay kalipay ug makapugong sa espirituhanong pagtubo.
Samtang kamo mag-andam sa inyong kaugalingon ug maglimpyo sa inyong kasingkasing, ang Ginoo makahimo ug makatabang ninyo nga malimpyo. Kon kamo mobati nga sad-an o naulaw, tinguhaa ang gahum sa Pag-ula. Pinaagi lamang sa maulaong sakripisyo ni Jesukristo nga kita malimpyohan. Paghinulsol ug pag-ampo nga tinuoray alang sa kapasayloan. Adto sa inyong bishop o presidente sa branch kon gikinahanglan. Malimpyo ba kamo ug magpabiling limpyo sa mahugaw nga kalibutan? Oo, makahimo kamo! Kamo nasayud sa kamatuoran ug dunay suporta sa Espiritu Santo, mga ginikanan, mga lider, ug sa buhi nga propeta. Samtang kamo motan-aw ngadto ni Jesukristo, kamo mahimong magpabiling limpyo sa Iyang atubangan.