Aumaia o le Peraimeri i le Fale
O Le Ola ai i le Talalelei ua Faamanuiaina ai Lo’u Aiga
Aoao atili e uiga i le autu o le Peraimeri o lenei masina!
O a nisi o faamanuiaga ua tuuina mai e le Tama Faalelagi ia te oe? O nisi faamanuiaga e faigofie ona iloa, e pei o le lalolagi matagofie sa foafoaina e le Tama Faalelagi po o se uso fou po o se tuafafine i lou aiga. Ae o nisi taimi e tatau ona tatou gauai atu i le matauina ai faamanuiaga a le Tama Faalelagi. I le tala lenei e uiga ia Nifae, tagai pe mafai ona e maua faamanuiaga o Nifae ma lona aiga na tuuina atu ona sa latou ola ai i le talalelei. (E mafai foi ona e faitauina le tala i le 2 Nifae 5.)
Na lapataia e le Alii Nifae e ave lona nuu i le vao, ina ia le faatigaina e sā Lamanā i latou. Sa usiusitai Nifae. Sa ia faapotopotoina lona aiga ma i latou uma o e na talitonu i le afioga a le Atua. Sa latou malaga i le vao mo aso e tele. Na iu lava ina latou faatulagaina se tolauapiga ma amata loa ona galulue. Sa latou totoina ni fatu, ma o a latou faaeleeleaga sa lelei le tuputupu ae. Sa latou tausia le tele o manu. Sa latou fausia fale ma se malumalu, lea e mafai ona latou tapuai ai i le Atua. Na aoao atu e Nifae tagata mai tusitusiga paia, ma sa latou tausia poloaiga.
Na tusia e Nifae o lona nuu sa “ola e tusa ma le ala o le fiafia” (2 Nifae 5:27). O lona uiga sa latou ola i se auala sa fesoasoani ia i latou ia fiafia. Pe a tatou ola i le talalelei, o le a tatou maua faamanuiaga e mafai ona fesoasoani ina ia tatou fiafia.
O Le Malumalu o Nifae, saunia e Michael T. Malm; ata na tusia e Thomas Child