O Le Mea Tatou Te Talitonu I Ai
Ia E Alofa Atu i le Lua te Tuaoi e pei o Oe Lava ia te Oe
“A tatou ala ae i taeao uma, ia tatou naunau e tali atu i le alofa ma le agalelei i soo se [tagata] tatou te fetaui i ai i le ala.”—Peresitene Thomas S. Monson
Ina ua fesiligia e se loia Iesu po o fea o poloaiga ua sili, na mafai lava ona Ia filifili soo se poloaiga mai le tele o poloaiga mai le Feagaiga Tuai, mai le tulafono a Mose, pe mai Poloaiga e Sefulu. Nai lo lena, sa Ia aoteleina ia poloaiga uma i vaega nei e lua:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).
A o aoao mai Peresitene Thomas S. Monson i le konafesi aoao ua mavae, o le tausia o se poloaiga e tasi e fesoasoani tatou te tausia ai le isi: “E le mafai ona tatou alolofa moni i le Atua pe afai tatou te le alolofa i e o loo tatou malaga faatasi i lenei faigamalaga o le olaga. E faapena foi, e le mafai ona tatou alolofa atoatoa i o tatou uso a tagata pe afai tatou te le alolofa i le Atua, le Tama o i tatou uma. … O i tatou o fanau agaga a lo tatou Tama Faalelagi ma, ona o lena tulaga, ua avea ai i tatou uma ma uso ma tuafafine. A tatou manatua pea lenei upumoni, o le a faigofie lava ona tatou alolofa atu i fanau uma a le Atua” (“O Le Alofa—o le Ute Lea o le Talalelei,” Liahona, Me 2014, 91).
O le atinaeina o le alofa mama—FaaKeriso mo isi—o le a faaleleia ai a tatou sootaga, fesoasoani ia i tatou e auauna atu ma le naunautai, ma saunia i tatou mo le ola e faavavau (tagai i le Moronae 10:21). O le alofa mama o se meaalofa faaleagaga e mafai ona tatou tatalo ia maua ma ola ai; e “faaee mai i luga o i latou uma o e o soo moni o … Iesu Keriso” (Moronae 7:48). O le “ala e silisili” (1 Korinito 12:31) fetalaia e le Aposetolo o Paulo ma e aofia ai le agalelei, onosai, lotomaualalo, agamalu, faamoemoe, ma le agaalofa (tagai i le 1 Korinito 13).
O le olaga o le potu suesue silisili lea e atiina ae ai le alofa mama. E mafai ona taialaina e aoaoga a le Faaola ua ta’ua o le Tulafono Faaauro a tatou faatinoga: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou” (Mataio 7:12). Tatou te le atoatoa uma lava, ae tatou mananao ina ia taulimaina ma le agalelei e ui lava i o tatou faaletonu.
Mafaufau i nei aoaoga mai ia Peresitene Monson e faatatau i le tele o auala e mafai ona tatou faaalia ai le alofa i isi:
“O nisi o o tatou avanoa silisili e faaali atu ai lo tatou alolofa o le a i ai lea i totonu o puipui o o tatou lava fale.”
“Ma ona faaali atu ai lea pe a mavae, o se alofa faateleina ia te ia o le na e aoaiina” (tagai i le MF&F 121:43).
“E tatau ona fuifuilua faatasi le faamagalo atu ma le alofa. … O le tuuaia o isi e tumau ai le tiga. Ua na o le faamagalo atu e faamaloloina ai.”
“O loo faailoaina le alofa i le tele o ala iloagofie: se matafiafia, se talo atu, se faamatalaga agalelei, se faamalo.”
“O isi faailoaga atonu e le iloa tele, e pei o le faaali atu o le fiafia i gaoioiga a isi, aoao atu o se mataupu faavae i le agalelei ma le onosai, asiasi atu i se tasi e ma’i pe nofofale.”
Mai le “O Le Alofa—o le Ute lea o le Talalelei,” Liahona, Me 2014, 91–94.
Ata na tusia e David Habben