Faamalolosia o le Autalavou e ala i Gaoioiga Faagaeetia
E manaomia ni manatu mo se gaoioiga a le autalavou? Asiasi i le lds.org/youth/activities mo le silia ma le 160 manatu.
I le avea ai ma se tasi o matua po o se taitai o le autalavou, e te manao e faamalosia lau fanau ma le autalavou i lau uarota po o le paranesi. O loo latou tuputupu ae i se taimi o loo ua agai ese atu ai tulaga faatonuina o le lalolagi mai i tulaga faatonuina o le talalelei. E masani ona latou lagonaina le tuua toatasi i a latou taumafaiga e ola ai i le talalelei. O le mea e lelei ai, e mafai ona latou maua le malosi e ala i le auai i gaoioiga anoa ma isi talavou.
O Gaoioiga e Mafai Ona Faamalosia ma Laveai le Autalavou
O gaoioiga faamanuiaina e maua ai e le autalavou se tulaga lelei e aoao ma ola ai i le talalelei. Latou te fesoasoani i le autalavou e saunia mo a latou matafaioi i le lumanai, atiina ae ai a latou taleni ma mea e fiafia ai, aoao tomai faaletaitai ma atiina ae ni faauoga a o latou fesootai ma isi alii talavou ma tamaitai talavou. O gaoioiga e mafai ona maua ai avanoa mo le autalavou e faatino ai auaunaga anoa mo isi i le nuu. O gaoioiga o le a mafai foi ona fesoasoani ia te oe e fausia sootaga lelei faafaufautua ma le autalavou.
O tagata ua le toaaga mai ma i latou e le auai i lo tatou faatuatuaga e mafai foi ona fiafia i siosiomaga malie ma masani ai o gaoioiga a le autalavou. “O gaoioiga o le a saunia se tasi o o tatou ala e sili ona lelei e aapa atu ai ma laveai mai isi,” o le tala lea a David L. Beck, peresitene aoao o Alii Talavou. “E toatele le autalavou e ono le taliaina muamua se valaaulia e o mai i se sauniga faamanatuga pe faalogo i faifeautalai, ae o le a fiafia e faatasi ma i tatou i se gaoioiga malie. E toatele tagata liliu mai i le Ekalesia na lipoti mai o le latou taimi muamua lava i le talalelei na oo mai ina ua valaaulia i latou e se uo i se gaoioiga a le autalavou.”
O se tasi o vaega taua i gaoioiga faamanuiaina o le faaaofiaga lea i le autalavou. I lalo o lau taitaiga, o le autalavou e mafai ona faia se matafaioi taua i le fuafuaina; e leai se tasi na te silafia mea latou te fiafia i ai, o sini, manaoga, ma fesili e sili atu nai lo latou. Pe a taulamua le korama ma peresitene o vasega i le fuafuaina ma faataunuu gaoioiga e faavae i manaoga o le autalavou i le uarota po o le paranesi, o le autalavou e sili atu ona saofagā ma fiafia ma o le a iu lava ina sili atu ona aafiaga.
O Gaoioiga Eseese
I le lds.org/youth/activities, o le a e maua ai le silia ma le 160 o manatu mo gaoioiga e musuia le autalavou ao latou fuafuaina. O loo fautuaina mai foi e le saite ni auala e fesoasoani ia te oe e iloa ai manaoga o alii talavou ma tamaitai talavou, faatasi ai ma meafaigaluega mo le fuafuaina ma fesootaiga e fesoasoani ai i taitai talavou ma taitai matutua e faatino o latou manatu. E mafai foi ona e auina atu ou lava manatu mo gaoioiga i le saite.
Na fautua mai e le saite gaoioiga mo le auauna atu i isi, faasoa atu le talalelei, atiina ae o le soifua maloloina faaletino, faatinoina musika ma le faatufugaga, sauniuni mo matafaioi i le lumanai, faia galuega o le malumalu ma talafaasolopito o aiga, ma isi mea. Ao agai ina matutua le autalavou ma feagai ma tiutetauave sili atu, latou te manaomia se vaega lautele o tomai ma aafiaga e faatotogaina ai i latou e avea ma o latou tagata silisili i luga o le ala i le faaeaga. “Ina ia saunia mo le galuega ua i le Tama Faalelagi mo i latou,” o le tala lea a Elder Paul B. Pieper o le Fitugafulu, “e manaomia e o tatou talavou ni aafiaga o le a fesoasoani ia i latou e tuputupu a’e faaleagaga, faaletino, faalemafaufau, ma faaagafesootai. O le eseese o vaega o gaoioiga i le uepisaite o le a faamalosia ai le tele o avanoa ua tatau ona tatou saunia mo o tatou tagata talavou.”
O gaoioiga a le saite o le a faaleleia atili ai le aoaoina o le talalelei e ala i le faafesootaiina o gaoioiga i mataupu faavae o loo aoaoina e le autalavou i lesona o Aso Sa ma le Tiute i le Atua ma le Alualu i Luma o le Tagata Lava Ia.
A o galulue faatasi talavou, taitai, ma aiga e fuafua ma faatino ia gaoioiga e valaaulia ai talavou uma e o mai ia Keriso, o le a atili saunia le tupulaga faia’e e faataunuu le galuega a le Alii i le lalolagi.
Tamoega Malie e 5K
Fai se tamoega po o se savaliga e 5K mo le autalavou ma le alalafaga.
Uiga faaalia i siva
Talanoa ma faataitai ni uiga talafeagai i siva.
O tomai e mafai ona tatou faaaoga e auauna atu ai
Aoao ni tomai fou ona faaaogaina lea e auauna atu ai i isi.
Faaaliga taleni
Fuafua se faaaliga taleni a le uarota po o le autalavou.
Faletatala a faifeautalai
Fuafua, saunia, ma faalauiloa atu se faletatala a faifeautalai, gaoioiga faaaganuu, po o se isi gaoioiga i le faletatalo i le lotoifale.