Talaaga OtootoTalavou Matutua
Tuufaatasiga o Aganuu i Toronto
E alala le tusitala i Iuta, ISA.
E faapei le avea ai ma se talavou matua i Ontario, Kanata? Sa faasoa mai e se tasi talavou matua ana aganuu ma lona faatuatuaga.
O le i ai i le ogatotonu o Toronto, Kanata, ua ofoina mai ai e le Maketi o Kensington se vaaiga o aganuu a atunuu eseese o le lalolagi. O magaala vaapiapi o loo laina ma tutu ai tulaga, faleoloa, ma faleaiga e faaalia ai taumafa mai le tele lava o aganuu—Salvadorian, Mekisiko, Peru, ma Farani, e amata ai. I soo se tulimanu, e mafai ona e maua ai ato o fualaau aina lanu feilafi ma fualaau faisua, laulau o pai eseese paanunununu ma mafanafana matagofie, ma mamanu o laei masani o atunuu eseese.
O aganuu ua soosooina e Toronto na fauina mai i tagata fai mai, tagatanuu, tagata sulufai, ma tamaiti aoga. O Jonathan Porter, o se talavou matua e 25 tausaga o loo ola ai i Toronto, na fai mai, “o le auauna atu i talaane o tagata o le ekalesia mai le tele o tulaga eseese i la’u uarota e fesoasoani ai ia te au e iloa le eseesega i le va o aganuu o loo siomia ai au—e aofia ai la’u lava aganuu a Kanata—ma le aganuu faaletalalelei. E manaia le vaaia o faalauiloa e aganuu taitasi uiga mama lea e aoao mai e le talalelei e amiotonu. E saunia e lena mea fesootaiga e faavae i luga o le Agaga Paia, lea e fesoasoani i tagata ia malamalama le tasi i le isi ma faateleina ai a latou lava aganuu.”
Ua vaaia foi e Ionatana aafiaga o le talalelei i matafaioi a taitai: “E ui lava o taitai e masani ona eseese ituaiga sitaili o taitaiga e faavae i a latou aganuu, e le afaina lea. O i latou uma ua valaauina e le Atua e ala i faaaliga mai le pule o le perisitua, ma ua faamanuiaina i latou.”
Mo Ionatana, o le inisitituti ua ofoina mai se mea na ia faatauaina: “O le tuputupu ae i Toronto, ou te lei maua tele ni tupulaga o e auai i le Ekalesia, o lea na ou lagonaina ai le saogalemu ma le taliaina i le inisitituti. Ua tuufaatasia i tatou e ala i lo tatou alofa i le talalelei. O isi tagata ua matauina le ala tatou te ola ai, vaai i o tatou tulaga faatonuina, ma iloa tatou te tulaga ese.”
O le aafiaga o Ionatana na aoaoina ai o ia i le taua o le alofa, “o le alofa mama o Keriso” (Moronae 7:47). “E matuai eseese lava le autalavou matutua i le inisitituti, e le o se mea e masani ai ona alofa le tasi i le isi,” o lana tala lea. “Ua ou aoaoina o le alofa o lona uiga o le auauna atu i isi, e oo lava i auala laiti, ma alofa ia i latou e tusa lava po o fea latou te o mai ai.”
O lenei alofa ma eseesega ua faamanuiaina ai le galuega faafaifeautalai. “O le toatele o tagata iinei o āuga tupulaga muamua—po o le lua—o tagata liliu mai. O nisi taimi e auai tagata i le Ekalesia iinei ma toe foi atu i o latou atunuu ma faasoa atu le talalelei i o latou aiga ma aumaia ai le malosi i a latou aganuu. Ia te au, o le talatuu lena o le Ekalesia i Toronto.”
ATA PUE NA SAUNIA E KEVAN ASHWORTH