Sauniuni mo Avanoa o le Olaga
Manao i se lumanai maoae? Ia aotauina!
Pito i tua na saunia e Hemera/Thinkstock, FU‘A NA SAUNIA E Kelly-anne leyman/istock/thinkstock
Pe a amata ona faulalai au meaaoga ma e te le iloa pe aoga atoa le taumafaiga, ia manatua le fautuaga lenei mai le Au Peresitene Sili. O a latou upu o le poto e mafai ona fesoasoani ia te oe e te tumau ai e faia au meaaoga faatasi ai ma sina uunaiga faaopoopo.
Talu ai ona o le aoaoina e i ai sona aafiaga tele i lou lumanai ma “o se vaega taua o le fuafuaga a le Tama Faalelagi e fesoasoani ia te oe ia avea atili ai e faapei o Ia” (Mo le Malosi o le Autalavou [2011], 9), o le a e iloa ai e taua taumafaiga uma.
Peresitene Thomas S. Monson
Aoaoga Faalelagi
“O nisi o lesona i le olaga e aoaoina mai ou matua, a o isi e aoao i le aoga po o le lotu. Peitai, e i ai lava, ni taimi faapitoa e te iloa ai po o faia e lo tatou Tama Faalelagi le aoaoga ma o oe o Lana tamaitiiti aoga.”
“O Se Faamamalu i le Atua, E Faamamaluina Foi e le Atua, Liahona, Ian. 1996, 58.
O Le Vasa o le Olaga
“O le olaga o se vasa e faalotomaulalo ai le faamaualuga, e lāina ai le tagata fe’alofa’i i tiute ae faaalia ai le taitai. Ina ia e folau saogalemu ai ma taunuu i le uafu faamoemoeina, e te manaomia le uu i ou lima o au tomatau ma tuu i ai faamatalaga aupito lata mai. E manaomia ona e aoao e ala i aafiaga o isi, tu atu ma le mausali mo mataupu faavae, ia faalautele mea e te fiafia i ai, ia malamalama i aia tatau a isi e folau i le vasa lava e tasi, ma ia faatuatuaina i le faataunuuina o ou tiute.
“O au taumafaiga i le aoga o le a i ai se aafiaga iloga mo ou avanoa pe a uma au aoga. A o e tauivi mo ni maka lelei o au vasega, aua nei galo ai le taua o le matua aoao e mafaufau.”
“Great Expectations” (faigalotu a le Iunivesite a Polika Iaga, 11 Ian., 2009), 4; speeches.byu.edu.
O Sauniuniga e Tupu ai Faatinoga
“O sauniuniga mo avanoa ma tiutetauave o le olaga, sa lei sili atu lava le taua. Ua tatou ola i se lalolagi fesuisuiai. O tauvaga malolosi o se vaega lea o le olaga. O le matafaioi o le tane, tama, tama matua, tausi aiga, ma lē puipuia le aiga ua matua’i eseese mai le mea sa i ai le augatupulaga ua mavae. O sauniuniga ua le na o se mataupu o le atonu po o le masalo. O se poloaiga. O le fuaitau tuai o le ‘e sili le fiafia i lou leiloa o le mea o tupu’ ua loa ona le toe i ai. O sauniuniga e tupu ai faatinoga.”
“Tiute o Valaauga,” Liahona, Iulai 1996, 51.
Peresitene Henry B. Eyring
O Se Uiga Faaalia e Aoao
“I le avea ai ma se atalii o le Atua, o lou taunuuga, pe afai e te galue malosi ma le faamaoni, o le avea faapei o Ia. O lona uiga o le a leai se mea moni o le a le mafai ona e aoao i ai, aua Na te silafia upumoni uma.
“O le toatele o tagata e taofi le aoaoina ona o le fefefe. Ua latou fefefe e le mafai ona latou aoao. E le tatau ona ia te oe lena fefe pe afai e te faamaoni. Atonu o le a faaletonu lau aoga aloaia mo nisi mafuaaga, ae ou te manao ia e iloa ma le mautinoa mausali e mafai ona e aoaoina soo se mea e finagalo le Atua e te aoaoina. O tagata aoaoina maoae e talitonu i lena mea. Latou te maua le uiga e mafai ona latou aoao.”
“Do What They Think You Can’t Do,” New Era, Oct. 1989, 6.
E Silafia Oe e le Alii
“O lou olaga o loo vaavaaia mai ma le faaeteete, faapena foi a’u. E silafia e le Alii mea uma na te manaomia oe e te faia ma mea e manaomia ona e iloa e faia ai. E mafai ona e faamoemoe ma le to’a ua Ia saunia ni avanoa mo oe e aoao ai. O le a e le iloaina atoatoa na avanoa, e pei ona ou lei iloaina. Ae a e faamuamuaina mea faaleagaga i lou olaga, o le a faamanuiaina oe ia e lagonaina le taitaiina atu o oe i ni aoaoga faapitoa, ma o le a uunaia foi oe e te galue malosi atu.”
“Real-Life Education,” New Era, Apr. 2009, 6.
Peresitene Dieter F. Uchtdorf
Poloaiina e Aoao
“Mo tagata o le Ekalesia, o aoaoga e le na o se manatu lelei—o se poloaiga. E tatau ona tatou aoao ‘o mea o i le lagi ma o i le lalolagi, ma o i lalo o le lalolagi; o mea sa i ai, o mea o i ai, o mea ua vave ona oo mai; o mea o loo i le atunuu, o mea o i isi atunuu’ [tagai i le MF&F 88:79–80].”
“O Mataupu Faavae e Lua mo Soo Se Tamaoaiga,” Liahona, Nov. 2009, 58.
Tumau i le Onosai
“Ina ua 10 tausaga lo’u matua, na avea lo’u aiga ma tagata sulufai i se laueleele fou. O a’u o se tamaitiiti aoga lelei i le aoga—o lona uiga, seia oo ina matou taunuu atu i Siamani Sisifo. …
“Ona o le tele o mataupu aoaoina e fou ma e uiga ese ia te au, sa ou pau i tua. Mo le taimi muamua i lo’u olaga, sa amata ai ona ou mafaufau pe sa le lava lo’u atamai mo le aoga.
“O le mea na laki ai sa i ai se faiaoga na aoaoina au ina ia onosai. Sa ia aoaoina au o le galue tumau ma faifai pea—finafinau ma le onosai—o le a fesoasoani ia te au e aoao ai.
“I le aluga o taimi, na manino atili mataupu faigata—e oo lava i le gagana Peretania. Sa amata ona ou iloaina lemu afai ou te tumau ai pea au lava, e mafai ona ou aoaoina. E lei vave ona oo mai, ae o le onosai, na oo mai ai.”
“Fa’aauau i le Onosai,” Liahona, Me 2010, 56.