O Mealilo e Sefulu o le Lauiloa Moni
O le tusitala e nofo i Uosigitone, ISA.
O fea e mafai ona ou maua ai le mealilo i le lauiloa? I le Feagaiga Fou?
“O matou e numera tasi!” o le alaga atu lea a le fai lape i le taaloga lakapi a le aoga maualuga. Sa ou faamemelo i ona nifo sasa’o ma le ataata manaia. Sa ou matauina a o ia ata ma talanoa i teineiti ma faateteine i tamaiti.
“Ai se manaia o le avea ma ia, o lo’u mafaufau lea, ma tomanatu i lo’u lava tuua toatasi. O le galuega a lou tama e manaomia ai ona matou siitia ese i le ta’i tolu i le lima tausaga uma, o lea sa faigata ai ia te au ma lo’u uso ona fausia ni faigauo tumau.
Sa i ai le fai lape se tulaga o le ofu le talafeagai ma alu i pati inu. O le matauina o ia, sa amata ona ou tiga i le fia lauiloa lea sa ou manatu sa suitalaga ai o ia. Sa ou matuai manao lava i ni uo ma o lea sa ou mafaufau ai pe tatau ona ou tuuina i lalo ou tulaga faatonuina mo sina taimi puupuu lava ina ia avea ai faapei o ia.
A o ma tietie atu ma lo’u uso i le fale, sa ou nofoai i le alofa mo a’u lava, ma sa ou tatalo i lo’u loto i le Tama Faalelagi. Sa ou fesili atu ia te Ia e ta’u mai ia te au le mea lilo o le a na aveesea lo’u tuuatoatasi ma le le mautinoa. E ui lava e lei avea au ma se tagata o le Ekalesia i lena taimi, sa ou maua se faatuatua malosi i le Atua.
Sa vave ona oo i lo’u mafaufau le manatu, “Tuu lou mafaufau e uiga ia te oe lava.”
“O le mea lilo lena?” Sa ou mafaufau faanoanoa lava. “E faapefea ona mafai e lena mea ona fesoasoani ia te au ina ia lauiloa?”
Mulimuli ane i lena vaiaso, sa ou faitau e uiga i le alofa mama mai le 1 Korinito 13. Na fesoasoani ou te malamalama ai sa taumafai le Tama Faalelagi e aoao mai au ia ou maua le alofa mama i isi nai lo le taulai atu i le auala sa latou faia mai ia te au. Sa ou aveina uiga o le alofa mama sa lisiina iina ma faatinoina. Ina ua ou faia lenei mea, sa ou iloaina le suia o lo’u aafiaga i le aoga atoa. O nisi nei o mea taua sa ou aoaoina.
O Le Alofa Mama e Loa ona Tali-tiga
Sa ou taumafai ia sili atu lo’u onosai i tagata i le aoga. Sa ula mai ia te au se tasi tamaitiiti i le taimi o le vasega faamalositino, ae sa ou taumafai e faafeiloai lona loto eleelea ma le agalelei ma ataata. Na iu lava ina ia le toe taufaalili mai ia te au. E oo atu i le faaiuga o le tausaga, ua avea i maua ma se uo lelei.
O Le Alofa Mama E Agalelei
Ou te faamemelo lava i se teine i la’u vasega o le sa faauo atu i tagata uma, tusa lava pe lauiloa pe le lauiloa i latou. Sa amata ona ou mulimuli i ana faataitaiga ma vaavaai mo avanoa e faaali atu ai le agalelei i isi.
O Le Alofa Mama e Le Losilosivale
O ma’ua ma lou uso sa lotoleaga i taleni o se tagata taalo pasiketipolo i le matou aoga, ma sa masani ona matou fai atu faamatalaga tau faamanu’a e uiga ia te ia. Sa ou filifili loa e amata ona ou faamalo atu i ana manumalo nai lo lena. Sa ou amata foi ona atiina ae au lava taleni. Ina ua ou faia nei mea, sa le toe i ai la’u avega oona, ma sa sili atu ona ou fiafia.
O Le Alofa Mama e Le Faafefeteina
I nisi taimi sa ou manatu ou te lelei atu nai lo isi tagata ona sa ou ola ai i tulaga maualuga faatonuina. Ina ua ou mafaufau e uiga i le Faaola, o le agamalu ma le alofa i tagata uma, sa ou filifili e suia ou uiga. A o ou taumafai e lotomaualalo ma agalelei, na amata e tagata ona faia se taumafaiga e avea ai ma a’u uo.
O Le Alofa Mama E Le Amio Mataga
Ou te alofa i le Alii ma sa i ai tulaga maualuluga faatulagaina lelei. Sa ou filifili loa o le fetuutuunai o nei tulaga faatonuina o le a ou maua ai le le fiafia.
O Le Alofa Mama E Le Fa’aitaitagofie
E faa tasi, na faia ai e se faiaoga se faamatalaga sa ootia ai o’u lagona. Nai lo le tali atu, sa ou fesili i ai pe o faigata lona aso. Sa ia tautino mai e sa’o ona faatoese mai lea. O na faamatalaga na oo mai ona o ona faafitauli faaletagata lava ia ma sa leai lava se mea e aafia ai fua au.
O Le Alofa Mama e Fiafia i le Faamaoni
O se tasi o mea na aoaoina ai au e au uo o le Au Paia o Aso e Gata Ai faapea o le faitatala ma le faasalalauina o mea pepelo e leaga. Sa ou taumafai e aloese ai mai le faitatala ma suia le mataupu i soo se taimi e amata ai e se tasi ona fai mai ni mea le lelei.
O Le Alofa Mama E Talitonu i Mea Uma, Faamoemoe i Mea Uma
Sa amata ona ou vaaia le lelei i tagata ma ia mautinoa. Ina ua ou faia lenei suiga i uiga, na amata e tagata na siomia ai a’u ona lagona le faagaeetia. O lea mea na latou mananao ai e faifai mea soo faatasi ma au.
O Le Alofa Mama E Lavātia Mea Uma
Ina ua ma’i tigaina lo’u uso ma aveesea ai lona gafatia e savali pei na masani lava, o le toatele o ana uo na lafoaia o ia ona e malie lana savali. Sa ou vaaia lona loto nutimomoia, ma sa ou iloaina le taua o le tumau o le faamaoni o tagata i taimi faigata.
E Le Uma le Alofa
Ina ua ou faatinoina le alofa mama i a’u fegalegaleaiga, sa ou atiina ae le tele o faigauo moni ma tumau. Sa mou atu lo’u lagona tuua toatasi, ma sa ou iloaina o le lauiloa e le mafaatusalia i le oa moni o faauoga ma le faaaloalo lea e oo mai i le ola ai i mataupu faavae o le talalelei.
Ou te faafetai mo se Tama oi le Lagi o le na faaaluina se taimi e aoao ai i se tausaga lua i le aoga maualuga le mea lilo o le mauaina o ni faauoga o le a tumau.
Pito i tua na saunia e akiyoko/iStock/Thinkstock; kalafi pepa lenei na saunia e darksite/iStock/Thinkstock