O Le Kerisimasi Muamua
E alala le tusitala i Iuta, ISA.
E mafai ona e faia lenei tala ma lou aiga, uo, po o vasega o le Peraimeri. Faitau le Luka 2:1–16 ina ia fesoasoani e saunia ai oe.
Pese: “Ina Ua Alu Iosefa i Peteleema,” fuaiupu muamua (Tusipese a Tamaiti, 22).
Maria: Talosia e mafai ona vave maua se mea ta te nonofo ai. Ua umi tele le ta faigamalaga.
Iosefa: O loo i ai se fale talimalo o loo i luma atu. Faatali atu iinei ma malolo se’i o’u saili atu pe o i ai se avanoa mo i taua.
[Ua fesoasoani Iosefa e faanofo i lalo Maria ona tuitui lea o le “faitotoa.” Tali mai le Pule o le faletalimalo.]
Pule o le faletalimalo: O le a le mea e te manao ai?
Iosefa: O loo o’u sailia se nofoaga e malolo ai. E mamao le mea na ma o mai ai ma lo’u toalua, ma e ma te manaomia se nofoaga e momoe ai.
Pule o le faletalimalo: Ou te faamalie atu, ae ua tumu le faletalimalo.
Iosefa: Faamolemole, e le mafai lava ona e faia se mea e fesoasoani ai ia i maua? E le toe umi ae fanau si o’u toalua.
Pule o le faletalimalo: Ou te matea e mafai ona lua momoe i le fale o manu. Pau lava lena o le mea o loo totoe.
Iosefa: Faafetai lava. Mo le agalelei tele.
[Ua alu atu Iosefa ia Maria ma fesoasoani e faatu o ia i luga.]
Iosefa: E leai se avanoa i le faletalimalo, ae ua fai mai le pule o le faletalimalo e mafai ona ta momoe i le fale o manu.
Maria: Oka, ua ou fiafia lava ua ta maua se nofoaga mo le po.
[Ua la savavali i le fale o manu. Ua nonofo Maria ma Iosefa i lalo, ma ua faaiu ai lena vaega.]
Pese: “Ina Ua Alu Iosefa i Peteleema,” fuaiupu lua ma le tolu Tusipese a Tamaiti, 22).
[O loo leoleo e leoleo mamoe a latou mamoe. Ua oo mai le agelu, ma ua faapa’ū’ū leoleo mamoe i o latou tulivae.]
Leoleo mamoe 1: O ai oe?
Leoleo mamoe 2: Faamolemole aua nei fasia i matou.
Agelu: Aua le fefefe. Ou te aumai le tala fiafia! O le po nei na soifua mai ai le Alo o le Atua i Peteleema. O le a outou maua le pepe o taoto i se faatanoa vao.
Leoleo mamoe 1: Ia tatou o atu nei loa ma vaai i lenei tamaitiiti.
Agelu: O le viiga i le Atua i mea aupitoaluga, ma le manuia i le lalolagi, o le finagalo alofa i tagata.
Pese: “O Fetu na Pupula” (Tusipese a Tamaiti, 24).
[Ua o atu leoleo mamoe i le faletalimalo ma tu’itu’i le “faitotoa.” Ua tali atu le Pule o le faletalimalo.]
Leoleo mamoe 2: Ua matou o mai e vaai i le pepe o Keriso.
Leoleo mamoe 1: Na ta’u mai e se agelu o le a taoto o Ia i se faatanoa vao.
Leoleo mamoe 2: E te silafia le mea o i ai o Ia?
Pule o le faletalimalo: Sa fanau mai se tamaitiiti i lo’u fale o manu i le po nei. O le a ou faaali atu le auala.
[Ua mulimuli atu leoleo mamoe i le pule o le faletalimalo i le fale o manu, le mea o loo nonofo ai Iosefa ma Maria i autafa o se faatanoa vao ma le pepe o Iesu i totonu.]
Leoleo mamoe 1: E moni! O loo i ai moni lava se pepe o loo taoto i se faatanoa vao, e pei lava ona faamatala mai e le agelu.
Leoleo mamoe 2: O le Faaola moni lava lenei, o Keriso le Alii.
[Ua tootutuli leoleo mamoe ma le pule o le faletalimalo faataamilo i le faatanoa vao.]
Pese: “Po Filemu” (Viiga, nu. 116).
Ata na tusia e Julie Young