O La’u Meaalofa o le Kerisimasi
E alala le tusitala i Iuta, ISA.
O le a se mea o le a ou avatu i le Faaola i lenei tausaga?
Ata na tusia e Ben Simonsen
O lo’u nofoaga masani i le vasega o le seminare a le tausaga iva sa i le laina pito i tua, lea sa mafai ai ona ou talanoa ma tausua ai ma a’u uo. Na pau le mea na ou lesitala ai mo le seminare ona sa i ai se avanoa i lau faatulagaga o mataupu. Na faia le seminare i le taimi o le aso aoga i le mea sa ou nofo ai, ma sa fautuaina e se faufautua o le aoga ia ou avea talu ai o a’u o se Au Paia o Aso e Gata Ai. Sa ou iloaina le igoa o le faiaoga, ae sa pau lena o mea uma sa ou aoaoina mai le vasega.
Ona lē aoga lea o la’u uo i se tasi o aso, o lea sa ou oo ai i se faafitauli: sa leai se tasi ou te tausua i ai. O le a faapefea nei la ona ou faaaluina le taimi? Ma le le to’a, sa ou faia ai le isi filifiliga e tasi—sa ou faalogo. O le taimi muamua lea faatoa ou gauai atu ai i le faiaoga.
A o ou toe tepa i tua, ou te le manatua se upu na ia fai maia i lena aso, ae ou te manatua le faafiafiaina. Na toe foi mai la’u uo i le aso na sosoo ai, ae nai lo le tausua solo, sa ou faalogo ma sa toe gauai atu i le lesona.
Na iu lava ina ou siitia ese mai le pito i tua o le potu ma nofo i le laina pito i luma, lea sa mafai ona ou gauai atili atu ai. Sa leai se vasega na uma ou te le’i lagona ai se naunau malosi i le lesona po o i tamaiti aoga na faasoa mai a latou molimau.
Sa ou fiafia tele i le seminare lea na ou toe lesitala ai i le tausaga na sosoo ai. Sa papatisoina a’u i le valu o ou tausaga ae ou te le’i alu moni lava i le lotu. Ae sa suia se mea i se tasi o aso ia Tesema a o lei faia le malologa o le Kerisimasi. Na valaaulia i matou e le faiaoga e o atu i le pito i luma o le potu ma ta’u atu po o le a se meaalofa o le a matou tuuina atu ia Keriso i lena tausaga.
“E leai se tasi o le a faia lenei mea,” sa ou mafaufau ai. Ae o le mea na ou te’i ai, sa taitasi ma savavali atu tamaiti aoga i luma o le vasega. O nisi na maligi loimata, o isi na faasoa mai ni sini sa latou faatutuina, ma o nisi sa faamatalaina ni tala. Sa ou maofa ai.
Sa alu le taimi. Sa na o a’u lava le tagata e lei alu. Sa faafuasei ona ou tu i luga. Sa ou matua leiloaina lava po o le se tala e fai atu. I se leo gatete, sa ou fai atu ai, “O lenei tausaga mo le aso soifua o Keriso, o le a amata ona ou toe alu i le lotu.”
Mai lena lava aso, sa amata ai ona ou alu i le lotu e avea ma a’u meaalofa i le Faaola. O le vaega na ese ai, o au le tagata na mauaina le meaalofa. O le toe foi i le lotu na suia ai lo’u olaga, ma na amata uma lava i le aso na ou tuu ai le talanoa umi ae faalogo ma faataga le Agaga e pa’i mai i lo’u loto.
O loo fetalai mai pea le Agaga ia te au. Pau lava le mea e ao ona ou faia o le tu e faalogo—ona mulimuli ai lea.