O Auala e Saunia ai mo le Afio Mai Faalua

Saunia e Elder Dallin H. Oaks

O Le Korama a Aposetolo e Toasefululua

Mai se saunoaga i le konafesi aoao ia Aperila 2004.

“O le olaga lenei o le taimi lea mo tagata e saunia ai e feiloai ma le Atua” (Alema 34:32). Ua tatou saunia ea?

Ae faapefea pe afai o taeao le aso e afio mai ai o Ia? Afai tatou te iloa o taeao tatou te feiloai ai ma le Alii—e ala i lo tatou oti faafuasei, po o Lona afio faafuase’i mai—o le a se mea tatou te faia i le aso? O a ni mea sese o le a tatou ta’uta’u atu? O a ni amioga masani o le a tatou taofia? O a ni o tatou toatuga o le a faaleleia? O a ni faamagaloga o le a tatou tuuina atu? O a ni molimau o le a tatou faia?

Afai o le a tatou faia na mea i lena taimi, aisea e le fai ai loa i le taimi nei? Aisea e le sailia ai le filemu a o mafai ona maua?

O le amioleaga sa masani ona faasa ma ufiufi e pei o se ma’isua, ua faatagaina nei ma faaagiagia solo e pei o se fu’a. O faavae ma olo sili ona taua mo le puipuiga o malo, ua fesiligiaina pe osofa’ia foi. Ua lafoa’ia e malo o latou tupuaga faalelotu. Ua faatuatuana’i tiutetauave o faaipoipoga ma aiga, fai mai ua fai ma faalavelave i le faamalieina o le loto. O tifaga ma mekasini ma televise ia e mamanuina ai o tatou uiga, ua tumu i tala ma ata e faaali mai ai fanau a le Atua ua pei o ni manu feai, po o le faaalia mai ai foi o tagata lelei ua pei o ni tagata faatauvaa o loo tulitulimatagauina nisi mea e sili atu nai lo le fiafia o le tagata lava ia. Ma ua toatele naua i tatou ua taliaina nei mea o ni faafiafiaga.

O le lelei, o le mea moni, ma le matagofie, ua suia nei i le lē lelei, o le “po o le a lava,” ma le faamaualuga e leai se aoga. E le o se mea e ofo ai, ua anoanoai tagata ua saisaitia i ponokalafi, o le tatuiina o vaega o le tino e pei o ni tagata faapaupau, sailia ma le manatu faapito e le tagata lava ia o mea e faamalie ai lona loto, o amioga le faamaoni, o ofu faatosina, o gagana masoā, ma feusuaiga mataga faatautala.

O nei mea uma ua inosia i le silafaga a lo tatou Tama Faalelagi, o le e alofa i Ana fanau uma, ma faasaina amioga uma e taofia ai soo se tasi mai le toe foi atu i Lona afioaga.

O le a le tulaga o i ai a tatou lava sauniuniga faaletagata lava ia mo le ola e faavavau? O le nuu o le Atua o tagata lava ia o le feagaiga mai lava i le amataga, e aofia ai folafolaga paia sa tatou osia i le vai o le papatisoga, i le mauaina o le perisitua paia, ma i totonu o malumalu o le Atua. Pe o tatou ea o ni fai folafolaga e le o faataunuuina a tatou folafolaga, ma ē e talitonu e le o ola i o tatou talitonuga?

Pe o tatou mulimuli ea i le poloaiga a le Alii, “Ia outou tutu ai i nofoaga paia, ma aua le masi’iese, seia oo mai le aso o le Alii; aua faauta, e vave lava ona oo mai”? (MF&F 87:8).

Ua siomia i tatou i luitau i soo se itu (tagai 2 Korinito 4:8–9). Ae faatasi ai ma le faatuatua i le Atua, tatou te talitonuina ai faamanuiaga ua Ia folafola mai ia i latou e tausia Ana poloaiga. Ua i ai lo tatou faatuatua i le lumanai, ma o loo tatou sauniuni mo lena lumanai.

Faamatalaga mai le O Le Afio Mai Faalua, saunia e Harry Anderson

“O le mea lea,” ua fetalai mai ai le Faaola, “ia faamaoni, ma tatalo i taimi uma, ma teuteu ma faamumu a oulua lamepa, ma ia i ai le suauu ia te oulua, ina ia mafai ona oulua saunia i le afio mai o le Faatoafaiavā—

“Aua faauta, e moni, e moni, Ou te fai atu ia te oulua, e vave ona Ou alu atu” (MF&F 33:17–18).