O Le Ie Soosoo o le Kerisimasi a Tina
Jed Packer, Iuta, ISA
Ata na tusia e Bradley H. Clark
O se tasi o aafiaga aupito sili ona faigata o lo’u olaga na tupu ina ua faatoa mavae le maliu o lo ma afafine e 10 tausaga le matua mai le kanesa o le faiai. O le faaupuga “E le mafai ona tatou ō ma ave [ni mea pe a tatou feoti]” na oo mai ma le manino a o matou tilotilo solo i lona potu i se tasi o aoauli o le Aso Toonai.
Ua mou ese atu Clarissa, ae o loo i ai pea i lona potu ni toega o mea e faamanatu mai ai pea le taimi a o ola o ia i le lalolagi. Ua i ai nei ia i matou le galuega lofituina o le filifili po o le a le mea o le a fai i ana meatotino. Sa ou iloa o le aveesea o mea taitasi e le faigofie, aemaise lava mo lo’u toalua.
O le taulimaina o le tele o faamatalaga atuatuvale e faatatau i le falemai, o togafitiga [o le kanesa], ma masini leisa na itiiti ai le taimi mo i matou e faamama ma faatulaga ai.
Na oo mai ni manatuaga a o matou tapenaina mea sa ia faatulagaina i luga o le ulu o lona moega po o le fatatusi. Sa aofia uma ai se uiga faamomoiloto—mai lana palanikeke e fiafia i ai, tusi, po o asoa e oo i ana manu momi, tusiaoga, ma le lakapi. Sa tagi masusu lo’u toalua a o matou fesili atu po o le a le mea e fai i mea taitasi.
Sa o matou aoina mai le tele o tusi a Clarissa ma avatu i lana aoga maualalo mo isi tamaiti ia fiafia ai. Sa matou tuuina atu lana kapoti lavalava i se tuaoi. O nisi o ona lavalava na avatu i ona tausoga. O le taulai atu i isi na fesoasoani e faafaigofie teisi le tulaga faigata o le aveesea o ana meatotino.
I nai vaiaso mulimuli ane, a o tulalata i le Kerisimasi, sa fesili atu o’u afafine talavou e toalua i lo la tina pe mafai ona la faaaogaina nisi o ofu a Clarissa e fai ai se meaalofa faapitoa o le Kerisimasi. Sa la filifili vaega taitasi o lavalava mo se mea taua e manatua ai le aiga ma ‘oti ma le faaeteete ia sikuea e fai ma faatusa o taimi taua i lona olaga.
I ni nai aso a o lei oo i le Kerisimasi, sa o la faaali mai ai ia te au faatasi ai ma lo la taitai o Tamaitai Talavou, o le na fesoasoani ia i laua e mafaufau i le aitia lea, se ie soosoo sa la suiina. Sa ou tilotilo atu ma le maofa i sikuea taitasi o le ie, lea na faatusaina i se mea na tutupu i le olaga o Clarissa: o se sikuea mai lona toniga lakapi, o se sikuea mai le ofutino sa ma faatauina i se malaga a le aiga, o se sikuea mai le ofuvae moe na ia ofuina i le falemai. O fasi ie taitasi, sa matua taua ma matagofie, na faamanatu mai ai ia te au lo matou taimi faatasi ma ia. Sa ou fai atu i o’u afafine ua matua lelei atoatoa. Sa ou iloaina o le a fiafia i ai lo la tina.
O lena taeao o le Kerisimasi sa ou vaaia ai se meaalofa na tuuina atu mai le loto. O le a ou manatua pea foliga vaaia o lo’u toalua ina ua ia tatalaina lana meaalofa ma vaaia ai le mea na faia e lana fanau teine mo ia. I po taitasi talu mai lena taimi e na te pulupuluina lona ie soosoo o le Kerisimasi, ma toe mafaufau i manatuaga ma moemiti i le aso o le a toe faatasia ai lo matou aiga—faafetai i le Togiola ma le Toetu o Iesu Keriso.
O le a ou manatua pea foliga vaaia o lo’u toalua ina ua ia tatalaina lana meaalofa ma vaaia ai le mea na faia e lana fanau teine mo ia.