Mai le Misiona
Leai ni Agelu e Manaomiaina
E alala le tusitala i Iuta, ISA.
I lena taeao o le Kerisimasi i se falemai i Kuatemala, sa le mafai ona matou valaau atu i ni agelu ia pepese. Ae sa mafai ona matou valaau ia i matou lava.
Ata na tusia e Craig Stapley
O mea faapapa, na felanulanuai ai le malama o le vaaiga o le fanau mai o Keriso, ma taumafataga na faaalia ai ni meataumafa faaMekisiko [tamales]—o le Kerisimasi lena i Kuatemala. I le avea ai o se faifeautalai faamisiona sa ou iloa ai le eseese tele o tu ma aga masani mai i o’u lava tu ma aga masani i le Iunaite Setete. Sa ou ma’i manatu i le aiga ma faapea o le a faanoanoa la’u Kerisimasi.
Na fai mai la’u soa, o Sister Anaya, o le a ma maua le olioli i le Kerisimasi e ala i le auauna atu i isi. Sa ia fautua mai faapea e ma te faaaluina le taeao e usuina ai ni pese i le falemai, ma sa ma valaauliaina isi faifeautalai e auai mai ma maua.
A o matou latalata atu i le faitotoa, sa ou matauina ai tagata o loo faatalitali i le laina e fia vaai i e pele ia i matou. Sa faanoanoa o latou foliga, o a latou seevae sulu i vae ua pefupefua, ma o latou ofu ua matafi. Sa matou faatalitali ma i latou. Ina ua mulimuli ane faatagaina i matou e ulufale atu i le fale, sa matou savavali atu i faapaologa vaaapiapi i fola sima lanu meamata ua matafi ese. O manogi o vailaau ma faama’i na lofituina ai a’u.
I se malamalama itiiti sa mafai ona ou iloa atu ai ni gasegase i luga o moega i se potu tele ma sina ea itiiti po o se taimi paganoa mo na o i latou lava. Latou te taooto ai iina, o nisi o i ai fusiga, o nisi o loo tui se fagu IV, o nisi o loo faapipii i ai ni masini e fesoasoani ia i latou ia mafai ona mānava. O nisi e oi lemu. O isi ua momoe. Sa ou mafaufau pe aisea ua matou o mai ai. O le toatele o la matou vaega toalaiti o faifeautalai na tutu i le faitotoa, e le iloa le mea e fai.
Ae sa le faapena Sister Anaya. Sa ia alu atu i moega taitasi, faafeiloai i latou na gasegase, ma fesili atu ia i latou pe o a mai, ma faamanuia atu ia i latou se Kerisimasi fiafia. O lona lototele na faamanatu mai ai ia i matou uma le mafuaaga na matou o mai ai, ma sa amata loa ona matou usuina pese o le Kerisimasi, faamālū i le amataga ae faasolo malosi a o matou faaauau pea. O nisi o gasegase na ataata, o nisi na o le taooto ai iina ma sa foliga e le’i iloa le mea o tupu, ma o nisi na hamuina a’o usuina ia pese.
O Sister Anaya, a o pese mai se tusipese i lona lima, na ia faalatalata atu i se fafine sa fusifusia atoa [lona tino] i ni fusiga. Na amata ona tagi lemu le fafine, ma sa milimili e la’u soa lona lauulu. Ma ona loimata na faapea mai le fafine, “O outou o ni agelu. O outou o ni agelu.”
O le a ou le faagaloina lava le tali a Sister Anaya. “Leai, e te le’o faafofoga i ni agelu,” sa ia tali atu ai. “O loo e faafofoga i Le Au Paia o Aso e Gata Ai.”
Ina ua soifua mai Iesu Keriso, sa faasilasila mai e se agelu Lona soifua mai ma sa vivii atu ‘au mai le lagi e toatele i le Atua (tagai i le Luka 2:8–14). Ou te mafaufau pea i na agelu i Kerisimasi uma.
Ae ou te mafaufau foi ia Sister Anaya. Ou te manatua lona uunaia o i matou e usu ni pese i le falemai, ma le auala na matou maua ai le olioli e ala i le faasalalauina atu o le olioli. Ou te manatua lona milimiliina o le lauulu o lena fafine ma’i. Ma ou te manatua ai ou te le tau manaomia le avea ma se agelu e auauna atu ai i isi. E mafai ona ou auauna atu ia te i latou o se Au Paia o Aso e Gata Ai.