O Lesona mai le Vao Paia
Mai se lauga o le faigalotu a le OAE, “Tu i le Vao Paia,” na tuuina atu i Kalefonia, ISA, i le aso 6 o Me, 2012. Mo le lauga atoa, asiasi i le cesdevotionals.lds.org.
Ou te uunaia outou e tutu i taimi uma i le Vao Paia i o outou mafaufau ma loto ma ola faamaoni i le upumoni lea sa amata ona faaali mai e le Atua iina.
I le 1993, i le fa o tausaga talu ona maea le valaauina o au o se Fitugafulu, sa faatonuina ai au ma lo’u aiga e auauna atu i le Misiona a Niu Ioka Rochester. O le misiona lena e aofia ai le aai o Palamaira (lea sa nonofo ai Iosefa Samita ma lona aiga i le tele o le vaitau o le 1820) ma Feiete (lea sa faavaeina ai le Ekalesia ia Aperila 1830).
O se laueleele mataina e tumu i mauga folasi; ma vaomatua, vaituloto ma vaitafe manino; ma tagata agalelei ma fiafia. O se nofoaga foi e paia ona o mea na tutupu ai iina.
I se vaomatua o laau uumi o beeches, oaks, maples, ma isi laau e tu pe tusa ma le kuata maila i sisifo o le fale o le aiga o Iosefa ma Lusi Maki Samita e lata i Palamaira, sa vaai ai le taulealea e 14 tausaga le matua o Iosefa Samita i se faaaliga i le Atua le Tama ma Lona Alo, o Iesu Keriso. O lenei faaaliga paia, o le tali i le tatalo a Iosefa i le fia iloa o le mea moni e uiga i mea tau lotu, na amata mai ai le Toefuataiga o le talalelei i lenei tisipenisione mulimuli. Na avea ai foi lena togavao o se nofoaga paia i le talafaasolopito o le Ekalesia—o se nofoaga tatou te faamamaluina i le igoa o le Vao Paia.
Sa matou fiafia ai ma lo’u aiga i lena togavao o laau ma lagona ai lona paia. Sa faatele ona matou o i ai. O masina taitasi e taunuu mai ai faifeautalai fou ma pe a tuua ai foi e i latou o le a maea a latou misiona, matou te aveina i latou iina.
A o ou savali ma le faaaloalo i le Vao Paia pe saofai foi ma mafaufau i luga o nofoa uumi o loo i ai, e masani ona ou tomanatu i le tele o tala faatusipaia e aofia ai laau, lala, aa, fatu, fua, ma le vaomatua. O se tagata e matau ma le totoa e mafai ona aoaoina ni lesona taua mai le olaga faanatura o meaola o loo ola ai iina. Ou te fia faasoa puupuu atu ni lesona se fa o na mau lesona.1
1. O laau e ola ae i taimi uma e agai atu i le malamalama.
Ata na pueina e Royce Bair
I le Vao Paia, o laau o loo ola i le matavao o le uluai togavao, faapea ma laau o loo tutu i le tele o auala savali i totonu, e tutupu agai i fafo ina ia aloese mai le maluia i uluulu o laau e i luga ae o i latou, ma tutupu i luga ia maua ai le tele o le susulu o le la e mafai ona maua. O o latou ogalaau ma lala pipio ua gata le tutupu e faatusatusa atu i laau tuaoi o loo ola toetoe lava a sasa’o lelei. O laau, e pei lava o le tele o mea ola uma, e manaomia le malamalama ina ia ola ma manuia ai. Latou te faia mea uma i lo latou malosi atoa e mitiia ai le tele o le sulu o le la e faaleleia ai le gaosiga o meaai a le laau—o le faagasologa lea o le liuaina o le malosiaga o le malamalama i le malosiaga tau vailaau.
O le malamalama o se elemene e sili atu foi le taua i le tulaga faaleagaga nai lo le natura. E mafua lenei mea ona o le malamalama e taua i lo tatou tuputupu ae faaleagaga ma le iloaina o o tatou gafatia atoa i le avea ai o ni atalii ma ni afafine o le Atua.
O le pogisa o le faafeagai o le malamalama ma e faatusa i malosiaga o le lalolagi lea o loo saili mai e vavae ese i tatou mai le Atua ma ia faalavefau i Lana fuafuaga paia mo o tatou olaga. E masani lava o le po, po o nofoaga pogisa e faaaoga ai e au a le tiapolo a latou faatosinaga e sili ona malolosi. O le solia o le tulafono o le ola mama, o faatinoga o le gaoi, solia o le Upu o le Poto, ma isi amioga ua faasaina e lo tatou Tama Faalelagi e masani lava ona faia faalilolilo i le pogisa. E tusa lava foi pe tatou te filifili e fai ni mea sese i le matilatila o le ao, e leai se isi mea tatou te lagonaina ua na o lagona o le pogisa.
O le mea e lelei ai, o le Agaga o Keriso “na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa, o e e faalogo i le siufofoga o le Agaga.
“Ma o tagata uma taitoatasi o e e faalogo i le siufofoga o le Agaga, e o mai i le Atua, le Tamā lava. (MF&F 84:46–47).
O lenei fuaitau ua faamatalaina matagofie ai le agai atu i luga o fanau a le Atua, le natura masani ua tuuina mai e le Atua lea tatou te mauaina uma—pe afai tatou te le taomiaina—e agai atu ai i le malamalama ma o le faia o lea mea, e agai atu ai i le Atua ma Lona Alo ma avea atili ai e pei o i Laua. Na fetalai Keriso e uiga ia te Ia lava, “O a’u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12).
Ou te uunaia outou ina ia aloese mai le pogisa o le agasala i ona ituaiga amioleaga uma ae ia faatumuina o outou olaga i le Agaga, upumoni, ma le malamalama o lo tatou Faaola, o Iesu Keriso. E mafai ona outou faia lenei mea e ala i le sailia o ni uo tauagafau, musika ma faatufugaga musuia, poto mai tusi e sili ona lelei (aemaise lava o tusitusiga paia), taimi e tatalo faamaoni ai, taimi paganoa i mea o le natura, talanoaga ma gaoioiga lelei, ma se olaga e faaogatotonu ia Keriso ma Ana aoaoga o le alofa ma le auauna atu.
2. E manaomia e laau mea faafeagai ina ia ausia ai le fuataga o lo latou foafoaga.
O ni manatu faaalia eseese e uiga i le puleaina o le vaomatua na tuliloaina lava i le aluga o tausaga i le tausiga o le Vao Paia. Sa i ai se taimi sa filifilia ai se fasi laueleele faataitai mo se faataitaiga sa ta’ua o le faavalavala le ola [o laau]. Na faailoa e i latou e vaaia le vaomatua ia laau iti na latou manatu sa sili ona lapopoa ma malolosi, ona latou tatuuina lea ma tetele ia laau e faalēola lelei ma pupuvao sa fealumi faatasi ai. O le talitonuga sa i ai e faapea, o le aveeseina o le tele o le tauvaga mo le suavai, susulu o le la, ma meaai mai le eleele, o laau na filifilia o le a saoloto e ola ma tutupu i ni auala sili ona maoae.
Ina ua mavae ni nai tausaga sa manino mai e ese le mea na tupu. O le taimi lava e saoloto ai mai le tauvaga, o laau filifilia ua amata ona faamalieina. Nai lo le tutupu fālō i luga i le malamalama, sa tuai lava lo latou tutupu agai i luga, e tulioso mai lala maualalo o le a i’u ina leai se aoga pe a maluia, ma oo ai ina lapopoa. E leai ma se laau o le fasi laueleele faataitai e faatusalia le tetele po o le malolosi i laau na tuu e ola i le faiga masani ma na tatau ona tauva ma manumalo i mea faafeagai ina ia ola ma manuia ai.
O se tasi o aoaoga faavae autu o le Tusi a Mamona e faapea, e tatau ona i ai “le faafeagai o mea uma” (2 Nifae 2:11). O se lalolagi e i ai mea faafeagai e tuuina mai ai ni filifiliga i le va o le lelei ma le leaga, ina ia mafai ona faagaoioi ai le faitalia. Peitai, e tutusa lava foi le taua o le mataupu faavae e faapea, e tatau lava ona i ai le faafeagai ina ia tupu ai le tuputupu ae faaleagaga. O le malamalama ma le taliaina o lenei mataupu faavae o le ki lea i le taliaina ma le fiafia i le olaga. E taua tele foi i le lagonaina o aafiaga o le tuputupu ae ma le atiina ae patino faaletagata lava ia.
E i ai se taimi, o le a tatou fetaiai uma ai ma mea faafeagai ma faigata. O nisi o le a oo mai ona o se taunuuga o le i ai iinei i le olaga faitino i se lalolagi agasala. E ono aofia ai malosiaga o le natura, gasegase ma faama’i, faaosoosoga, tuuatoatasi, po o le le atoatoa faaletino pe faalemafaufau. O nisi taimi e oo mai ai mea faafeagai ma faigata ona o a tatou lava filifiliga e le taialaina. E tatau ona tatou matua loto faafetai i lo tatou Faaola, e ana le Togiola lea ua saunia ai se ala mo i tatou e faaleleia ai mea uma ua nutimomoia.
Ou te mafanafana tele i fetalaiga a le Alii ia Iosefa Samita i le falepuipui o Liperate i se taimi sa toetoe lava a le mafai ai e Iosefa ona tauaveina ana avega: “Ia e iloa, lo’u atalii e, o nei mea uma e te maua ai le poto masani, ma o le a avea mo ou lelei” (MF&F 122:7).
O nisi o laau i le Vao Paia ua faaalia ai o le faafeagai e mafai ona aoga mo lo tatou manuia ma i lo tatou tulaga aupito maualuga e masani lava ona tele ni mea e tatau ona maua mai ai. O nei laau e ao ona toe faaleleia mai ituaiga eseese o mea faafeagai po o faigata—le emo o se uila, o se matagi malosi e to faata’uta’u, o se faaputuga mamafa o le kiona po o le aisa, o le solivae ma le faatautala o tagata faatamala, ma o nisi foi taimi o le osofaiga a se laau tuaoi. Mai nei tulaga le manuia ua tutupu mai ai nisi o laau o le togavao e sili ona malolosi ma sili ona mananaia i le vaai.
3. E sili atu le ola lelei o laau i vaomatua, ae le o le ola toatasi.
I le natura o se mea e matua ese lava le vaaia o se laau e tū na o ia. Toetoe o taimi uma e ola ae ai laau i togalaau, ma i le aluga o le taimi, e avea ai togalaau ma ni vaomatua. Ae peitai, o le Vao Paia, e sili atu nai lo na o se vaega o laau. O se siosiomaga faigata tele o meaola faanatura e aofia ai le tele o ituaiga o laauiti ma meaola.
E i ai se fesootaiga manino i ituaiga eseese uma o fugalaau e tuputupu a’e i le vao, pupuvao, pupulaau, laau, pulouaitu, limu, manufelelei, isumu, lapiti, oti, ma isi lava foafoaga o i ai iina. O nei ituaiga o meaola e fegalegaleai faatasi ma faalagolago le tasi i le isi mo meaai, malutaga, ma se siosiomaga e galulue faatasi ma fegalegaleai ai lea latou te mafai ai uma ona oo i le taamilosaga o o latou olaga.
O le fuafuaga a le Atua mo o tatou olaga ua matauina ai foi se fesootaiga faapena mo i tatou. E tatau ona tatou galulue faatasi mo lo tatou faaolataga, ae le o le fai toatasi. Ua fausia e le Ekalesia ia falelotu, ae le o ni lua o paa.
Mai le amataga o le Toefuataiga, o le poloaiga lava mo i tatou ia faapotopoto i nuu, lea e mafai ai ona tatou aoao ia ola fealofani ma lagolago i e le tasi le isi e ala i le faamamaluina o a tatou feagaiga o le papatisoga (tagai i le Mosaea 18:8–10). I le avea ai ma fanau a le Atua, tatou te le toe manuia na o i tatou e pei o se laau e tū na o ia. O laau malolosi e manaomia se siosiomaga o meaola faanatura; o tagata malolosi e manaomia e le tasi le isi.
O le mea e faafetai ai, o loo i ai ia i tatou uma lava se faamemelo mo fegalegaleaiga, mafutaga, ma ni uo faatuatuaina. I le avea ai ma nisi o le aiga e faavavau a le Atua, tatou te momoo uma mo le faamalieina ma le saogalemu lea e tuuina mai e mafutaga vavalalata ma tumau. E ui e le masalomia lava le aumaia e saite o upega o agafesootai se ituaiga o fegalegaleaiga, ae e le suitulaga na mea i fesootaiga faamaoni, lotomatala, ma faafesaga’i lea e tatau ona tupu ina ia mafai ona faavaeina ai ni mafutaga moni ma tumau.
E mautinoa lava o le faalesu’esu’e muamua ma sili ona lelei mo le aoaoina o le galulue faatasi ma isi, o le aiga. O le aiga tatou te aoao ai lesona o le auauna atu, lē manatu faapito, faamagalo atu, ma le onosai lea e taua i le fausiaina o mafutaga tumau ma isi.
O le mea e faafiafiaina ai, o le faatulagaina musuia o le Ekalesia ua tuuina mai ai foi faatulagaga e mafai ona tatou atiae ai faaleagafesootai. I valaauga, fonotaga, vasega, korama, aufono, gaoioiga a le Ekalesia, ma le tele o isi avanoa mo fegalegaleaiga, tatou te atiina ae ai uiga faaalia ma tomai faaagafesootai lea e fesoasoani e saunia ai i tatou mo faatulagaga faaagafesootai o le a i ai i le lagi.
A o saunoa atu e faatatau i lenei faatulagaga maualuga atu, na saunoa mai le Perofeta o Iosefa Samita, “Ma o lea lava mafutaga ua i ai ia te i tatou iinei o le a i ai ia te i tatou iina, ae o le a nao na faatasia ma le mamalu e faavavau, o se mamalu e lē o ia i tatou i le taimi nei” (MF&F 130:2).
4. O laau e maua mai o latou malosiaga mai niuterene (meaai) na fatufatuina e tupulaga o laau na muamua atu.
Sa i ai se vaitaimi sa tonu ai ia i latou sa tausia le Vao Paia e tatau ona teu ma tetele le togavao. Sa oo loa ina faatulagaina galuega fesoasoani e aveese ai laau na pauu ma lala na gaui, pupuvao, faapea foi i ogalaau ma laulaau mamago. O lenei faiga, sa le’i umi ae amata ona mouese ai le lauusiusi o le togavao. Sa tuai le tutupu o laau, laiti ni laau fou na tatupu ae, sa amata ona leai nisi o ituaiga o fugalaau ma laauiti o le vao, ma sa faaitiitia le numera o manufelelei ma meaola taaloa.
Mulimuli ane, e tusa ai ma se fautuaga ia tuu ai pea le togavao i lona tulaga faalenatura i le mafai e gata ai, sa tuua ai laau pauu ma lala gaui e pala ma toe faaoaina ai le eleele. Na tuu ai lava laulaau i le mea na toulu ai. Sa talosagaina tagata asiasi ia tausisi i auala sa faailogaina ina ia faaitiitia ai le faalavelaveina o le togavao ma faaitiitia ai le solia o le eleele i totonu o le togavao. I totonu o ni nai tausaga, ae amata ona toe uluola ma toe faafouina e le togavao ia lava i se tulaga ofoofogia. O le taimi nei ua lauusiusi i se tulaga e toetoe lava a atoatoa, o ona laauiti lanulauava ma le anoano o meaola ma laauiti o le natura.
O lesona e ao ona aoaoina mai lenei aafiaga e pele i lo’u loto. Mo le fitu o tausaga o avea pea ma o’u faamanuiaga le galue o se tusitalafaasolopito ma tusitalafaamaumau o le Ekalesia. Aisea e taua ai le tausia o faamaumauga ma le aoina mai, faasaosaoina, ma le faasoaiina atu o talafaasolopito o le Ekalesia a Iesu Keriso? Aisea e taua tele ai ia te i tatou ona manatuaina pea ma utu mai le malosi mai tupulaga ua mavae? (Tagai MF&F 21:1; 69:3, 8.)
Ou te fautua atu e le mafai ona [tatou] ola atoatoa i le taimi nei—e itiiti foi mea e fuafua mo o tatou taunuuga i le lumanai—e aunoa ma le faavae o le tuanai. O le malamalama i le sootaga o le tuanai i le taimi nei ma le lumanai e fesoasoani ai tatou te atili talisapaia atoatoa ai le faauigaga a le Alii o le upumoni e pei ona faaali atu ia Iosefa Samita: “Ma o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai” (MF&F 93:24).
O le iloa ua tatou maua e uiga i lo tatou tuanai ona o faamaumauga sa tausia ma e uiga i lo tatou lumanai ona o tusitusiga paia ma aoaoga a perofeta soifua ua tatou maua ai le talaaga lea e mafai ai ona faaaoga ma le atamai lo tatou faitalia.
E taua mo i tatou ona iloa lelei le talafaasolopito o la tatou Ekalesia, ae maise lava i ona tala faavae. O nei tala—o le Uluai Faaaliga a Iosefa Samita, o le oo mai o le Tusi a Mamona, o le asiasiga faaagelu a Ioane le Papatiso, Peteru, Iakopo, Ioane, Elia, Elaia, ma isi—o loo i ai upumoni faavae ia e faavae ai le Toefuataiga.
O le mea e faanoanoa ai, i lenei tupulaga o tekinolosi lea ua anoanoa’i ai faamatalaga—o nisi o ia faamatalaga e faitioina ai mea na tutupu ma tagata i le talafaasolopito o le Ekalesia—o nisi Au Paia o Aso e Gata Ai ua maluelue o latou faatuatua ma amata ai ona fesiligia talitonuga ua loa ona i ai. I na tagata le mautonu, e faailoa atu lo’u alofa ma le agaga malamalama ma le mautinoa afai latou te tausia pea mataupu faavae o le talalelei ma tulitulimatagauina pea ma le agaga tatalo a latou suesuega o le talafaasolopito o le Ekalesia—ia matuai lava le suesue ina ia maua ai se malamalamaaga atili nai lo na o se fasi malamalama po o se malamalama le atoatoa—o le a faamautu e le Agaga Paia lo latou faatuatua i mea taua na tutupu i le talafaasolopito o le Ekalesia e ala i le fetalai atu o le filemu i o latou mafaufau. O lenei auala e mafai ai ona latou maua le to’a i o latou tautinoga e faatatau i le talafaasolopito o le Ekalesia toefuataiina.
Faaiuga
A o ma auauna atu i le ma misiona e latalata i Palamaira, o nisi taimi ou te alu ai na o a’u i le Vao Paia ma ou tu ai ma le migao i talaane o la’u “laau molimau” e sili ona ou fiafia i ai—o se tasi o laau e tolu sa ola pea i le togalaau i le taimi o le Uluai Faaaliga. Sa masani ona ou vaai faalemafaufau e faapea, ana mafai ona tautala lena laau, na te tauina mai ia te au le mea sa ia molimauina i lena aso o le tautotogo i le 1820. Ae o le mea moni sa ou le manaomiaina lena laau e ta’u maia ia te a’u—ua uma ona ou iloa.
E ala i aafiaga ma lagona faaleagaga mai lava i lo’u talavou ma faaauau ai e oo mai i lenei lava itula, ou te iloa ai o loo soifua le Atua, lo tatou Tama. Ou te iloa foi, o Lona Alo o Iesu Keriso, o le Faaola ma le Togiola o tagata uma. Ou te iloa o nei Tamalii faamamaluina e toalua sa faaali mai ia Iosefa Samita.
O nei upumoni mamalu na amata mai i le Vao Paia. Ou te uunaia outou ia tutu i taimi uma i o outou mafaufau ma i o outou loto i lena nofoaga paia ma ola ai faamaoni i upumoni na amata faaali mai e le Atua iina.