Savali a le Au Peresitene Sili
Faatumulia le Lalolagi i le Alofa o Keriso
Saunia e Peresitene Dieter F. Uchtdorf
Fesoasoani Lua i le Au Peresitene Sili
Pe a tatou mafaufau i le Kerisimasi, e tele lava ina tatou mafaufau i le foai atu ma le mauaina o meaalofa. O meaalofa e mafai ona avea ma se vaega o se tu masani faapelepele, ae e mafai foi ona aveesea maia le mamalu faigofie o le vaitau ma faalavelave ai ia i tatou mai le faamanatuina o le soifua mai o lo tatou Faaola i se ala anoa.
Ou te iloa mai aafiaga faaletagata lava ia o Kerisimasi e sili ona manatuaina, o Kerisimasi ia e sili ona faatauvaa. O meaalofa o i le vaitaimi o ou tamaitiiti e mautinoa lava le faatauvaa e faatusatusa i tulaga o nei vaitaimi. O nisi taimi sa ou maua ai se ofutino fonofono po o se pea totigilima po o ni totini. Ou te manatua se tasi o Kerisimasi faapitoa lea na aumai ai e lou uso ia te au se naifi laau na ia vaneina.
E le manaomia ni meaalofa taugata ina ia anoa ai Kerisimasi. Ua toe faamanatu mai ia te au se tala na faamatalaina e Elder Glen L. Rudd, o le sa auauna atu o se uso o le Au Fitugafulu mai le 1987 i le 1992. I se tasi aso a o lei oo i le Kerisimasi i le tele o tausaga ua mavae, a o ia puleaina se faleteuoloa a epikopo, sa ia iloa mai se taitai faalelotu se aiga lē tagolima lea faatoa masii mai i le aai. Ina ua ia alu e asiasi i lo latou tamai falemautotogi, sa ia iloa ai se tina talavou nofofua ma sana fanau e toafa e i lalo ifo o le 10 tausaga.
Na matuai lē tagolima lava le aiga ma sa le mafai e le tina ona faatau ni meaai mama po o ni meaalofa mo lana fanau mo lena Kerisimasi—na le mafai foi ona ia faataua se laau. Sa talanoa Uso Rudd ma le aiga ma iloa ai e matuai fiafia lava teineiti e toatolu i se pepe meataalo po o se manu e faatumu i momi. Ina ua ia fesili atu i le atalii e ono tausaga le matua po o le a se mea e manao ai, na tali mai le tamaitiiti fiaai, “Ou te fia manao i se ipu polesi.”
Na folafola atu e Uso Rudd i le tamaitiiti se polesi ma atonu ma se isi mea. Ona ia alu lea i le faleteuoloa a epikopo ma ao mai ni meaai ma isi sapalai e tali ai manaoga vave o le aiga.
O lena lava taeao na tuu atu ai ia te ia e se tagata o le Au Paia o Aso e Gata Ai limafoai se 50 tala “mo se tasi o mafatia.” O le faaaogaina o lena foai, na faatopetope atu ai e Uso Rudd le toatolu o lana lava fanau ma o e fai le faatau o le Kerisimasi—na filifili e lana fanau ni meataalo mo tamaiti lē tagolima.
Ina ua uma ona utaina i le taavale meaai, lavalava, meaalofa, o se laau Kerisimasi, ma nisi o mea teuteu, na agai atu le taavale a le au Rudds i le falemautotogi a le aiga. O iina sa latou fesoasoani ai i le tina ma lana fanau e faatu le laau. Ona latou tuuina lea o meaalofa i lalo o le [laau] ma avatu i le tamaitiiti laitiiti se pepa polesi telē.
Sa tagi le tina, sa olioli le fanau, ma sa latou usuina uma se pese o le Kerisimasi. I lena po a o faapotopoto le aiga o Rudd mo le ‘aiga o le afiafi, na latou avatu le faafetai na mafai ona latou aumaia sina fiafia o le Kerisimasi i se isi aiga ma fesoasoani i se tamaitiiti laitiiti e maua se ipu polesi.1
O Keriso ma le Agaga o le Foai Atu
Mafaufau i le auala faigofie ae mamalu na filifili e lo tatou Tama Faalelagi e faamamalu ai le soifua mai o Lona Alo. I lena po paia, na lei faaali mai ai agelu i tagata mauoa ae i leoleo mamoe. Sa lei soifua mai le pepe o Keriso i se maota tautupu ae i se faatanoa vao. Sa aui o Ia i se ie ae le o se ie silika.
O le faigofie o lena uluai Kerisimasi na muai faailoa mai ai le soifuaga o le Faaola. E ui na Ia foafoaina le lalolagi, savalia malo o le malualii ma le mamalu, ma tu i le itu taumatau o le Tama, ae sa Ia afio mai i le lalolagi o se tamaitiiti tuulafoaiina. O Lona soifuaga o se faatusa o le tamalii tauagafau, ma sa Ia savali faatasi ma e matitiva, mamai, faanoanoa, ma mafatia i avega.
E ui o Ia o se tupu, ae sa Ia lei popole mo mamalu po o oa a tagata. O Lona soifuaga, o Ana fetalaiga, ma Ana galuega i aso uma o ni faamanatu o le mamalu faigofie ma o’oo’o.
O Iesu le Keriso, o le na silafia atoatoa le auala e foai atu ai, na faatulagaina mo i tatou le mamanu mo le foai atu. Mo i latou ua mafatia o latou loto i le tuuatoatasi ma le faanoanoa, Na te aumaia le agaalofa ma le faamafanafanaga. Mo i latou o o latou tino ma mafaufau ua mafatia i ma’i ma puapuaga, Na te aumaia le alofa ma le faamalologa. Mo i latou o o latou agaga ua mamafatu i le agasala, Na te ofoina mai le faamoemoe, faamagaloga, ma le togiola.
Pe ana i ai le Faaola ma i tatou i le taimi nei, semanu tatou te mauaina o Ia i le mea sa i ai o Ia i taimi uma—o auauna atu i e agamalu, faanoanoa, lotomaualalo, atuatuvale, ma e loto maualalo. I le taimi o lenei vaitau o le Kerisimasi ma aso uma, tau ina ia tatou foai atu ia te Ia e ala i le alofa atu e pei ona Ia alofa mai. Tau ina ia tatou manatua le mamalu faamaualalo o Lona soifua mai, o meaalofa, ma le soifuaga. Ma tau ina ia tatou faatumulia le lalolagi i le malamalama o Lona alofa ma le mana faamalolo e ala i faatinoga faigofie o le agalelei, alofa mama, ma le agaalofa.
Ata o fetu na pueina e Alexandrum79/iStock/Thinkstock; o le palapala na pueina e Stockbyte; o pesini na pueina e seregam/iStock/Thinkstock; o le polesi na pueina e Lisaison/iStock/Thinkstock; o sipuni na pueina e Okea/iStock/Thinkstock