O Le Tulaga Moni o le Kerisimasi

Saunia e Bishop Gary E. Stevenson

Epikopo Pulefaamalumalu

A aunoa ma le soifua mai o le Faaola ma le Togiola, semanu e leai se tasi e Faatoga mo i tatou, leai se Fautua i le Tama, ma e leai se Puluvaga e mafai ai ona tatou toe foi atu i le afioaga o lo tatou Tama Faalelagi alofa ma nonofo faatasi o ni aiga e faavavau.

A o tamaitiiti lo’u tamā, sa ola ae o ia i se tamai taulaga i Iuta tutotonu e lata ane i le Vaituloto o Iuta. I aso a o lei i ai ni paionia, sa tulimanu ma fagogota tagata Initia Amerika i lea eria. Na lauiloa nisi o nofoaga faapitoa i autafa o le vaituloto mo i latou na sailia ni uluaū.

I se gaoioiga a tamā ma atalii ina ua lima tausaga o lo’u tama, sa malaga ai lana uarota i le Vaituloto o Iuta e saili ni uluaū. Ina ua mavae le aso sa faaaluina e le vaega e saili ai, sa fesili ai lo’u tamāmatua i lo’u tamā pe sa ia maua ni uluaū.

“Leai, ou te lei maua lava se mea,” na tali mai ai lo’u tama. Ona ia tago lea i lana taga ma faapea mai, “Ae sa ou maua lenei ma’a manaia ua foliga e pei lava o se laau Kerisimasi.”

Sa maua moni lava e lo’u tama se uluaū, ae na te lei iloaina. Sa ia u’uina le mea moni lea i lona lima, ae na te lei iloaina.

O Le Iloaina o le Togiola

Mo le toatele o tagata i le taimi nei, o la latou vaai i le tagata e moni ma sili ona taua—o Iesu Keriso, le Faaola o le lalolagi—ua faanenefuina i mea e le moni.

Talu ai nei sa ou vaaia ai se polokalama o le televise e uiga ia Iesu Keriso lea na fesiligia ai pe moni lava na soifua mai o Ia i le Taupou o Maria. E oo lava i polofesa maoae mai faalapotopotoga faaaloalogiaina o le aoaoina na taumatemate lava pe faamata e moni lenei mea.

I le tali atu i na tagata masalosalo, na saunoa ai Peresitene Ezra Taft Benson e faapea (1899–1994): “O i latou e taua i latou lava o tagata atamamai na saili e faatalitonu i tatou o le soifua paia mai o Keriso e pei ona folafolaina i le Feagaiga Fou sa le’i paia lava ma o Maria sa le o se taupou i le taimi na soifua mai ai Iesu. O le a latou taumafai e faatalitonu i tatou o Iosefa, le tamā fai o Iesu, o Lona tama faaletino, ma o le mea lena ua avea ai Iesu ma tagata soifua i uiga uma ma foliga vaaia. E vaaia lo latou agalelei i a latou viiga ia te Ia pe a latou fai mai o Ia o se faiaoga maoae o le amio mama, masalo o le faiaoga silisiliese. Ae o le faamoemoega moni o a latou taumafaiga o le teenaina lea o le tulaga o le alo paia o Iesu, aua o luga o lena aoaoga faavae ua taoto uma ai isi talitonuga uma faa-Kerisiano.”¹

Ua ou faasee i luga o se kiona fai, ma ua ou teuteuina ni laau Kerisimasi fai i aisa fai. O nisi taimi e mafai ona faigata ona u’uina se mea moni lava, ae maise lava i taimi ua mafai ai e tekinolosi ona faafoliga moni mai ni mea. E faapefea la ona tatou iloa po o a mea e moni? E faapefea ona tatou mauaina se molimau o le moni aiai o Iesu Keriso?

Tatou te maua se molimau o mea e moni pe a tatou faitau i afioga a le Atua o loo i totonu o tusitusiga paia—i aso uma anamua ma aso nei. Tatou te aoao i le moni aiai o le Faaola pe a tatou faalogologo ma faitau i molimau a perofeta ma aposetolo soifua. Tatou te maua le upumoni pe a tatou tatalo “ma le loto faamaoni, ma le manatu moni i ai, ma le faatuatua ia Keriso” (Moronae 10:4). Tatou te iloa “le ala sa’o” pe a tatou “talitonu ia Keriso, ma lē teena o ia” ma pe a tatou “ifo i lalo i ona luma, ma tapuai atu ia te ia ma lo [tatou] manatu atoa, mafaufau atoa, ma le malosi atoa, ma lo [tatou] agaga atoa” (2 Nifae 25:29).

O Valoaga o le Soifua Mai o Keriso

Ua taatele i tusitusiga paia lena valoaga o le soifua mai o Keriso—le uluai Kerisimasi. Atonu e galo ia i tatou pe a tatou faitau i nei valoaga faaletusitusiga paia, e moni lava o nei mea o valoaga. Ua latou ofoina mai ni faamatalaga auiliili sili e uiga i mea o le a tutupu ae sa le i tutupu i lena taimi.

I le valu selau tausaga a o le’i soifua mai Keriso, na faapea mai ai Isaia, “Aua ua fanau mai mo i tatou le tama, ua foaiina mai mo i tatou le atalii: e i lona ua le malo, e igoa foi o ia, o le Silisili Ese, o le Faipule, O le Atua malosi, O le Tama o le Faavavau, O le Alii o le Filemu” (Isaia 9:6).

I le ono selau tausaga a o lei soifua mai le Faaola, na faamatalaina ai e Nifae se faaaliga na ia maua e uiga i le tina o le Alo o le Atua:

“Ma sa oo ina ou vaai ma iloa atu le … aai o Nasareta; ma i totonu o le aai o Nasareta sa ou vaaia ai se taupou, ma sa matua silisili ona lalelei ma paepae o ia. …

“Ma sa fetalai mai [le agelu] ia te aʼu: Faauta, o le taupou ua e vaai atu i ai o le tina lea o le Alo o le Atua. …

“Ma sa ou vaai ma toe iloa atu le taupou, ua sapasapaia e ia se tamameamea i ona lima.

“Ma sa fetalai mai le agelu ia te aʼu: Faauta i le Tamai Mamoe a le Atua” (1 Nifae 11:13, 18, 20–21).

I le selau luasefulu fa tausaga a o lei soifua mai le Faaola, na faapea mai ai le Tupu o Peniamina:

“Faauta, e oo mai le taimi, ma ua le o toe mamao atu, ma le mana, le Alii Mamana Aoao … o le a afio mai ai i lalo mai le lagi i totonu o le fanauga a tagata, ma o le a mau o ia i se fale apitaga omea, ma o le a afio atu i totonu o tagata, ma fai vavega tetele. …

“Ma o le a ta’ua o ia o Iesu Keriso, o le Alo o le Atua, o le Tama o le lagi ma le lalolagi, o le Foafoa o mea uma mai le amataga; ma o lona tinā o le a ta’ua o Maria” (Mosaea 3:5, 8).

I le valusefulu-tolu tausaga a o lei soifua mai Keriso, na faapea mai ai Alema, “Ma faauta, o le a fanau mai [le Alo o le Atua] ia Maria, i Ierusalema, le laueleele lea o o tatou tua’ā, ona o ia o se taupou, o se ipu pele ma filifilia” (Alema 7:10).

Ma i le toe ono tausaga a o lei oo i le uluai Kerisimasi, na folafola mai ai e Samuelu le sa Lamana e faapea:

“Ma faauta, o le mea lenei ou te tuu atu ia te outou mo se faailoga i le taimi o lona afio mai; aua faauta, o le a i ai malamalama tetele i le lagi, e oo ina leai se pogisa i le po ae lei afio mai o ia. …

“Ma faauta, o le a i ai se fetu fou e oso mai, o se ituaiga o fetu tou te lei vaai lava i ai” (Helamana 14:3, 5).

Sa tulimatai atu ma le naunautai tagata Iutaia i lenei mea maoae na tupu. Sa o latou iloa o le a afio mai le Mesia, ma sa latou faamoemoe e afio mai o Ia i le mamalu, faasaoloto i latou faaletino, faatuina se malo faalelalolagi, ma pule e avea ma o latou Tupu.

O ai o le a muai silafia le soifua mai o le Mesia? Pe le o le aufono a Iutaia po o isi o i ai tofiga o le pule ma faatosinaga?

Ua ta’u mai e le Tusi Paia ia i tatou o leoleo mamoe maualalalo e momoe i luga o le eleele lea na folafola atu i ai e se agelu le “tala lelei e olioli tele” (Luka 2:10) ma o le Au Makoi mai se mea mamao na vaaia “lona fetu i sasae, ua [o mai] e ifo ia te ia” (Mataio 2:2). O tagata sa umia le pule ma faatosinaga, o e na faatauasoina la latou vaai i manatu o lenei lalolagi, sa le’i i ai faatasi ma le Faaola i Lona soifua mai po o le taimi o Lana galuega. Sa i ai i o latou luma le mea moni ae sa [latou] te le iloaina pe taliaina.

Avea Atili e Faapei o Keriso

Na saunoa mai Peresitene Benson e faapea o se tasi o mea silisili e uiga i le taimi o le Kerisimasi o le faateleina lea o lo tatou nofouta i mea a le Atua:

“E afua ai ona tatou manatunatu i lo tatou sootaga ma lo tatou Tama ma le maualuga o lo tatou tuuto atu i le Atua.

“E uunaia i tatou ia sili atu ona alofa mutimutivale ma foai atu, ia sili atu ona manatu i isi, ia sili atu ona limafoai ma faamaoni, ia sili atu ona faatumulia i le faamoemoe ma le alofa mama ma le alofa—o uiga faa-Keriso uma. E leitioa pa’i mai le agaga o le Kerisimasi i loto o tagata i le lalolagi atoa. … Ae mo sina taimi itiiti, e liliu atu ai se taulaiga ma se tuuto faateleina i lo tatou Faaola, o Iesu Keriso.”²

I lenei Kerisimasi, a o faatumulia ai o tatou loto i le agaga o le vaitau, ia tatou faia se mea e faailoa atu ai o tatou lagona i se auala faaletino, ma faaali atu ua tatou malamalama o le pepe na soifua mai i Peteleema o le Togiola moni lava lea. Na tuuina mai e Peresitene Howard W. Hunter (1907–95) ni fautuaga aoga e fesoasoani ai ia tatou faia lena mea:

“I lenei Kerisimasi, ia toefaaleleia ni feeseeseaiga. Saili se uo ua galo atu. Aveese le masalosalo ma ia sui i le faatuatuaina. Tusi se tusi. Tuu atu se tali filemu. Faamalosiau i le autalavou. Faaali atu lo outou faamaoni i upu ma galuega. Ia tausia se folafolaga. Faagalo se taimi na faatiga mai ai se tasi. Faamagalo atu i se fili. Faatoese atu. Taumafai ia malamalama. Iloilo mea e te moomia mai i isi. Mafaufau muamua i se isi tagata. Ia agalelei. Ia agamalu. Ia ata teisi atu. Faailoa atu lou loto faafetai. Talileleia se tagata ese. Faafiafia le loto o se tamaitiiti. Ia olioli i le matagofie ma mea ofoofogia o le lalolagi. Ta’u atu lou alofa ma toe saga tau atu pea.”³

A aunoa ma Keriso, e leai se Kerisimasi. A aunoa ma Keriso, e le mafai ona atoa le olioli. A na leai Lona soifua mai ma Lana Togiola, semanu e leai se Tasi e Faatoga mo i tatou, leai se Fautua i le Tama, ma leai se Puluvaga lea ua mafai ai ona tatou toe foi atu i le afioaga o lo tatou Tama Faalelagi alofa ma nonofo faatasi o ni aiga e faavavau.

Ou te faamanatuina faatasi ma outou le matagofie ma le ofoofogia o le moni o le soifua mai ma le misiona a le Alo o le Atua, ma ou te tuuina atu la’u molimau o Iesu Keriso o lo tatou Faaola ma le Togiola—o le Mesia na folafolaina.