O Le Misiona Paia a Iesu Keriso: Alii o le Filemu

Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma le matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.

Ata

Faamaufaailoga a le Aualofa

Faatuatua, Aiga, Toomaga

Ata

Mary is holding the baby Jesus while Joseph sits beside her with an arm around a lamb. A dove is watching and their is a hen with her chicks in the background.

“O le Faaola o le punavai o le filemu moni,” o le saunoaga lea a Elder Quentin L. Cook o le Korama a Aposetolo e Toasefululua. “E ui lava foi i tofotofoga o le olaga, ae ona o le Togiola a le Faaola ma Lona alofa tunoa, o le a tauia ai i latou o e ola amiotonu i le filemu o le tagata lava ia.”¹ O le malamalama o Iesu Keriso o le Alii o le Filemu e mafai ai ona fesoasoani ia i tatou e maua le filemu i le loto ma faateleina ai lo tatou faatuatua ia te Ia.

Ua fetalai atu Iesu Keriso: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33). I le faasoaina atu o le molimau e uiga i lena upumoni, ua saunoa ai Linda S. Reeves, fesoasoani lua i le au peresitene aoao o le Aualofa e faapea: “Sa alofa mutimutivale le Alii ia te au ma sa fesoasoani e faamamaina au avega. Sa ia fesoasoani ia ou lagonaina se filemu sili.”²

Na aoao mai Elder Richard G. Scott o le Korama a Aposetolo e Toasefululua: “O le nofoaga lelei lava mo … le toafilemu o totonu lava o puipui o o tatou lava fale, lea tatou te faia ai mea uma tatou te mafaia e faatotonugalemu ai le Alii o Iesu Keriso.”³

Mau Faaopoopo

Isaia 9:6; Luka 2:14; Ioane 14:27; 1 Nifae 13:37; Mataupu Faavae ma Feagaiga 59:23

Mai Tusitusiga Paia

Na valoia e Isaia le soifua mai o Iesu Keriso, le Alii o le Filemu (tagai Isaia 9:6). I laueleele o Amerika, na ta’u atu e Samuelu le sa Lamana faailoga o le a oo mai faatasi ma le soifua mai o Keriso i le lima tausaga mulimuli ane (tagai Helamana 14:3, 5). A o latalata mai le aso na valoiaina, na faamata’uina e tagata le talitonu le faaumatiaina o Kerisiano uma pe afai e le tutupu nei faailoga. O le perofeta o Nifae na “tagi faatauanau atu o ia i le Alii i lena aso atoa; ma faauta, sa oo mai le siufofoga o le Alii ia te ia, ua fetalai mai: … O taeao ou te alu ai i le lalolagi” (3 Nifae 1:12–13). Na faaali mai faailoga, ma faatasi ai ma le soifua mai o Keriso, na “amata ona toe maua ai e tagata le filemu i le laueleele” (fuaiupu 23).

I Peteleema, “ua fanau [ai e Maria] lana tama ulumatua, ua ia aui ia te ia i le ie, ma faataoto ia te ia i le fale povi” (Luka 2:7).

Faamatalaga mai le Ua Fanau Mai Se Faaola, saunia e Joseph Brickey