O Fea o O’u I Ai?
O Le Auala e Iloa ai ma Atiina Ae Au Meaalofa Faaleagaga ma Taleni
Elder Mervyn B. Arnold
O Le Fitugafulu
Ua tuuina atu e le Tama Faalelagi ia te oe ni meaalofa faaleagaga ma taleni e fesoasoani ia te oe e avea ai ma tagata ua Ia finagalo e avea ai oe.
I tusitusiga paia, tatou te maua ai le tele o fesili ua mafua ai ona tatou toe mafaufau i o tatou olaga. O se tasi o fesili muamua e fesiligia i le Tusi Paia na tuusao ia Atamu ina ua maea ona ia ai i le fua faasaina. Ou te valaaulia outou e mafaufau loloto i auala e mafai ai ona faaaoga lenei fesili i o outou olaga:
“Ona lalafi ai lea o Atamu ma lana ava ai luma o Ieova le Atua i laau o le faatoaga.
“Ona valaau atu lea o Ieova le Atua ia Atamu, ua faapea atu ia te ia: O fea o i ai oe? (Kenese 3:8–9; faaopoopo le faamamafa).
E silafia e le Alii mea uma, ina ia mafai ona tatou mautinoa na Ia silafia le mea na lalafi ai Atamu ma Eva. Afai la na Ia silafia le mea sa la i ai, o le a la le mea na fesili moni ai le Alii?
O lenei fesili atonu na uunaia tele ai Atamu ma Eva e mafaufau e uiga i mea na tutupu i o laua olaga. E mafai ona tatou fesili ia i tatou lava i ni fesili faapea. Mo se faataitaiga: O fea o tatou i ai i la tatou malaga i le ala o le feagaiga i le ola e faavavau? O a meaalofa ma taleni na tuuina mai e lo tatou Tama Faalelagi ia i tatou i le muai olaga e fesoasoani ai ia i tatou i luga o lenei ala? O a isi meaalofa ma taleni e tatau ona tatou mauaina a o tatou taumafai e avea ma tagata e finagalo le Alii ia tatou avea ai?
Na saunoa mai Peresitene Iosefa F. Samita (1838–1918), “O tagata, i le avea ai o se agaga, sa pele ma fanau mai i ni matua faalelagi, ma tausia ina ia matua i le maota e faavavau o le Tama, a o le’i oo ina o mai i le fogaeleele i la le tino [faaletino].”1 O le tusi lesona o Mataupu Faavae o le Talalelei ua aoao mai i tatou e faapea “Ua silafia e le Tama i le Lagi i tatou ma mea na tatou faia ae tatou te lei o mai iinei. Ua Ia filifilia le taimi ma le nofoaga mo i tatou taitoatasi e fananau mai i ai, ina ia mafai ona tatou aoaoina lesona tatou te manaomiaina patino ma faia le mea sili ona lelei i a tatou lava taleni patino ma uiga lelei.”2
Na tuu oe e le Tama Faalelagi i le nofoaga sili ona lelei e faaaoga ai au meaalofa faaleagaga ma ati ae ai au taleni. Po o fea lava o e nofo ai ma po o a tulaga o le olaga o loo e i ai, e mafai ona e faia le filifiliga ina ia faamanuiaina, e ui lava i ou luitau. Aua lava le fiu. Taumafai pea. Aua le faavaivai. Ia manatua, o le mea e te faia i mea o loo ia te oe e fausia ai lou ituaiga tagata.
O le faataitaiga a Atamu ma Eva e mafai ona tatou maua ai le tele o le faamoemoe. Ina ua uma ona la solia le poloaiga e aua nei aai i le fua faasaina, sa tutuli ese i laua i fafo mai le faatoaga matagofie, sa fetuuina le eleele, na tutupu mai laau tuitui ma laau talatala, ma sa ao ona laua galulue ma galueaiina le eleele e tausi ai i laua lava. Sa le’i fiu i laua. Sa galulue i laua, e pei ona poloaiina ai i laua e le Alii (tagai Mose 5:1). Sa faia e lo la atalii o Kaino se filifiliga leaga tele, ae sa laua faaauau pea ona ola amiotonu ma aoao pea le la fanau.
O Le Mea na Maua e le Uso o Lo‘u Tama o Peni
E i ai se uso o lo’u tama o le sa faaauau pea ona saili e faaleleia atili ma faateleina ia meaalofa ma taleni na ia mauaina mai le Tama Faalelagi. Sei ou faasoa atu se tasi o tala mai lona olaga lea na fesoasoani ai ia te au ia iloa le auala e ati ae ai ma faalauteleina meaalofa ma taleni faaleagaga.
I se tasi aso a o faigaluega le uso o lou tama o Peni i se vili kopa [copper mine], sa ia matauina ai se fasi uamea ua pi’o o taatiatia i autafa o le auala mo nofoaafi. Na ia talosaga atu i lona pule pe mafai ona ave ma ia. Na fai mai lana pule, “Peni, e le toe aoga lena fasi uamea tuai. Ua maumau lou taimi e piki ai fua i luga.”
Na ataata le uso o lou tama o Peni ma faapea atu, “E tele atu se mea ua ou vaaia nai lo na o se fasi uamea tuai.”
Faatasi ai ma le faatagaga a lona pule, na ia aveina ai i le aiga. I lana fale faigaluega na ia faavevelaina le uamea seia oo ina matuai vevela lava. Faatasi ai ma se galuega tele, na mafai ai ona ia mamanuina ma gagauina seia oo ina sa’o.
Ina ua maalili, sa ia tusia ai se mamanu o se naifi tele i luga. Faatasi ai ma se uelo afi mumu, sa ia tipi ai le uamea i le mamanu o se naifi. Ona amata lea e le uso o lou tama o Peni ona tata ese pito talatala, ma galue ai i lea itula ma lea itula i le tipiina, oloina, polesi, ma faamamaina lena fasi uamea tuai.
Sa ia galue i lea aso ma lea aso i le mea na taua e lana pule o se fasi uamea le aoga. Na amata lemu lava ona tino mai le naifi ma avea ai o se faatufugaga matagofie ma iila.
Na pau lava le mea sa misi o se au. Na alu atu le uso o lou tama o Peni i le togavao ma maua mai ai se oti e i ai ni seu. I lana fale faigaluega na ia faamamaina ai, tipi, ma polesi le seu ‘oti. Ina ua uma ona ia faia, sa lamolemole ma matagofie. Ma le faaeteete sa ia faapipii ai le au i le naifi. O le mea na avea muamua ma se fasi uamea tuai, elea, ma pi’o ua avea nei ma se naifi matagofie lea na manumalo i nisi o taui.
O oe ma au e pei lava o lena fasi uamea tuai. E manaomia foi ona toe mamanuina, faamamaina, ma polesi i tatou ia ausia ai lo tatou gafatia atoatoa. O le iloaina, faamalosia, ma le faateleina o a tatou taleni ma meaalofa o ni vaega ia o lena faagasologa.
Na malamalama le uso o lou tama o Peni o le tele o lo tatou gafatia e le mafai ona vaaia i le pito i luga ma e tatau ona iloa ma atiina ae. Na aoaoina i tatou e le Alii ia “outou saili ma le faamaoni meaalofa silisili ona lelei” (MF&F 46:8) ma “ina ia mafai e tagata taitoatasi ona faalelei atili ana taleni, ina ia mafai e tagata taitoatasi ona maua ni isi taleni, ioe, e sautuaselau lava” (MF&F 82:18). Ae aisea e tatau ai ona tatou faia lea mea? E mafai ona tatou faaaogaina a tatou taleni ma meaalofa e auauna atu ai i isi, e pei ona faamatala mai e le fuaiupu e sosoo ai: “E saili ai e tagata taitoatasi le lelei o lē la te tuaoi, ma faia mea uma ma le manatu tasi i le mamalu o le Atua” (MF&F 82:19). O le tuuina atu o auaunaga e mamanuina ai i tatou i le ola ai i se olaga sili atu faaKeriso.
Sailia o a Tatou Taleni
Na aoao mai e Elder Richard G. Scott o le Korama a Aposetolo e Toasefululua le auala e mafai ai e tofotofoga ona mamanuina i tatou: “E masani ona saputu le o’o mai o luitau eseese ia i tatou i le taimi e tasi, i le taimi tonu lava e foliga mai ai ua matua lelei ma filemu mea uma i o tatou olaga. Afai o na tofotofoga e le o ni taunuuga o sou le usiusitai, o ni faamaoniga la ua lagona e le Alii ua e saunia e te alualu atili i luma (tagai Faataoto 3:11–12). O le mea lea Na te tuu mai ai ia te oe ni aafiaga e uuna’ia ai le alualu i luma, malamalama, ma le agaalofa [o ni meaalofa taua tele se lua] e faaleleia atili ai oe mo lou manuia e faavavau. Ina ia avatu oe mai le mea o loo e i ai nei i le mea ua Ia finagalo e te i ai, e manaomia ai se taumafaiga malosi tele, ma o lena mea e masani lava ona o mai faatasi ma le mafatia ma le tiga.”3
Faaleleia Atili a Tatou Taleni
O le faateleina o a tatou taleni e manaomia ai le galue. E lei leva atu, sa fai mai ai Elder Scott i lo’u toalua, “Devonna, e tatau ona e valiina ni ata.”
Sa lei vali ata lava ia Sister Arnold i lona olaga. Sa ao ona ia galue i ai. Sa ia ave ni lesona, sa vali i lea aso ma lea aso, ma i le mavae ai o se taimi tele ma se taumafaiga tele na ia iloa ai vali ma le matagofie. O loo ia te au se tasi o ana ata vali matagofie o se vaaiga o se vaitafe o loo tautau i luga o puipui o lo’u ofisa.
Ioe, o le mauaina o ni taleni e manaomia ai le galue, ae o le a tele lava lo tatou olioli pe a tatou faalogo atu o fetalai mai le Alii ia i tatou, “Ua lelei ia. O au meaalofa ma taleni o le a faateleina ona o lou faamaoni” (tagai i le Mataio 25:14–30).
O Au Meaalofa Faaleagaga
Na maua e lo’u toalua se taleni mo le valiina o ata. O a ni au meaalofa ma taleni? Ou te iloa na tuuina atu e lo tatou Tama Faalelagi nisi o [meaalofa] ia te outou. E faapefea ona ou iloa? “E tele meaalofa, ma e tuu atu e le Agaga o le Atua i tagata taitoatasi se meaalofa” (MF&F 46:11). O loo avanoa meaalofa ma mana o le Atua mo i tatou. O lo tatou aia tatau ma le tiutetauave le taliaina o a tatou meaalofa faaleagaga, faateleina o a tatou taleni, ma faasoa atu.
Ua lisiina e tusitusiga paia nisi o meaalofa e mafai ona tatou sailia (tagai, mo se faataitaiga, MF&F 46), ae o loo i ai moni le faitau selau o meaalofa ma taleni. Suesue i le Tusi a Mamona, ae maise lava le 3 Nifae 11–26, ma o le a outou iloa ai le tele o meaalofa ma taleni o loo avanoa mo i tatou taitoatasi. Mo se faataitaiga, i le 3 Nifae 11 tatou te faitau ai e uiga i tagata o loo faalogologo i le siufofoga o le Tama Faalelagi, ae sa le malamalama i ai i le taimi muamua:
“Ma sa latou toe faalogoina le leo i le taimi lona tolu, ma sa latou tatala atu o latou taliga e faalogo i ai; ma sa faasasaga atu latou mata i le mea na sau ai lea leo. …
“Ma sa oo ina ua latou malamalama sa latou toe tetepa ae o latou mata faasaga i le lagi; ma faauta, sa latou vaaia se Tagata [Iesu Keriso] ua afio ifo mai le lagi” (fuaiupu 5, 8).
O le manino o le faalogo ma le manino o le vaai ua na o ni faataitaiga se lua o meaalofa ma taleni faaleagaga e mafai ona outou mauaina ma faateleina pe afai tou te naunau e saili atu ma galueaiina i latou.
Ou te valaaulia outou taitoatasi e faia e pei ona sa faia e le uso o lou tama o Peni: ia vaai i le mea silisili i mea uma a o tatou sailia meaalofa ma taleni faaleagaga ma faaaoga i latou e faamanuia ai i latou o siomia ai i tatou. Ou te iloa o loo i ai i lo tatou Tama Faalelagi le tele o meaalofa ma taleni ua Ia finagalo e tuuina mai i o tatou luga, ae “e faalagolago i lo tatou ole atu mo i latou. O faamanuiaga e manaomia ai ni galuega po o se taumafaiga i la tatou vaega” (Bible Dictionary, “Tatalo”). Tau ina ia tatou iloa, galulue mo, ma faateleina meaalofa ma taleni na tuuina mai e le Atua lea na fananau faatasi mai ma i tatou, ma tau ina ia mafai ona tatou maua isi meaalofa o la’u tatalo faamaualalo lea.