Kerisimasi i lalo o Apa Uamea
Erwin E. Wirkus, Idaho, ISA
Ina ua atofaina a’u e galue i Manila, Filipaina, i le taimi o le Taua Lona II a le Lalolagi, e tele ina ou feiloai atu i se vaega toaitiiti o isi fitafita o le AAG e faia se sauniga faamanatuga. I se tasi o sauniga, na ou matauina ai se tamaitai Filipino i le pito i tua o lo matou fale na faaleagaina e pomu o loo tautilotilo mai i se avanoa sa i ai muamua se faitotoa. Sa ou mafaufau pe o a matou pesepesega na tosina mai ai o ia. A o moeiini o matou mata mo le tatalo faaiu, sa aluese filemu o ia.
I se tasi o ana asiasiga na sosoo ai, na matou valaaulia ai o ia e faatasi ma i matou. O lona igoa o Aniceta Fajardo, ma sa ia taliaina ma le naunautai la matou faauōga. A o faaauau ona auai atu i a matou sauniga, sa ia aoao e uiga i le talalelei toefuataiina a Iesu Keriso.
A o latalata mai le Kerisimasi, na tonu ia i matou e faamanuia Aniceta ma lona aiga i ni meaalofa o le Kerisimasi. Na matou aoina ni apa susu, aano o manu, ma fualaau faisua; ni nai palanikeke; ma se pusa o mea faafomai, e aofia ai vaitui e togafiti ai le atalii o le tama teine a Aniceta o loo ma’i.
I le Po e sosoo ma le Kerisimasi, na matou utaina ai meaalofa ma o atu i le fale o Aniceta. Sa nofo o ia ma lana tama teine ma lana tama i lalo o ni apa uamea o loo faalagolago atu i se puipui piliki—o se toe vaega o se fale na lelea ese. Na matou mafaufau pe na mafai faapefea ona latou ola i sia malutaga itiiti i le taimi o timuga mamafa e matua lē mātū lava i lena taimi o le tausaga.
O se tasi o alii na matou o atu sa na fafatiina se lala mai se mago ma sunu’i i le eleele. Na matou maua ni tamai mea na taatitia solo e teuteu ai le lala.
Na matamata mai Aniceta ma lona aiga ma le fiafia tele ma le maofa. Ina ua latou vaaia meaalofa na matou avatua, na liua lo latou fiafia tele i loimata o le fiafia ma le talisapaia. Latou te le’i vaaia pe taumamafa i ia ituaiga o meaai mo se taimi umi, ma sa latou fetagisi tele mo se taimi na le mafai ai ona latou gagana mai.
Ona o le Po na sosoo ma le Kerisimasi, na liliu atu ai o matou mafaufau i aiga ma e pele ia i matou. Sa ou mafaufau i le feau faauaealesi na ou mauaina i aso e lua na muamua atu, na faailoa mai ai ia te au ua avea a’u ma se tama. Sa matou faasoa atu o matou lagona, ma faaiuina i a matou molimau o le Faaola ma le talalelei toefuataiina.
Sa matou faamautinoa atu i lenei aiga matagofie le alofa o le Faaola mo i latou. Sa latou maua le mafanafana i a matou upu, ma sa faamafanafanaina lena po i lagona o le filemu. Ona matou faatofa lea i a matou uo pele ma faamanuia atu le Kerisimasi ia i latou.
E lei umi ae ou siitia atu i se eria fou, ma ou te le’i toe vaaia ai Aniceta po o lona aiga. Ae i ni tausaga na mulimuli ane, sa ou susueina ai le Faasinoala a le Ekalesia i se vaega e faatatau ia Filipaina ma faitau ai ia Aniceta Pabilona Fajardo o le Filipino muamua na auai i le Ekalesia i atumotu.1 O se faamanuiaga matagofie le mafaufau i fatu na totoina i le taimi o le Kerisimasi i le 1945.
Sa matou fafatiina se lala mai se mago ma sunu’i i le eleele. Na matamata mai Aniceta ma lona aiga ma le fiafia tele ma le maofa.