O Tusitaai o le Sami Mate—O Le Faamalama i le Tusi Paia o Aso Nei
I le amataga o le 1947, na sailia ai e ni leoleo mamoe e toatolu e auai i le Bedouin Ta’amireh se manu na se ese. Sa togi e se tasi o i latou se ma’a i totonu o se ana ma faalogoina ai le nuti o se fagu ele. Ina ua latou ulu atu i le ana, sa latou vaaia ai sa i ai ni nai fagu ele lapoloa, o nisi sa i ai ni tusitaai.* I tausaga na sosoo ai, na maua ai e Bedouin ma saienitisi suesue nisi tusitaai e selau i totonu o ana e 11 i le matafaga i matuisisifo o le Sami Mate.
E talitonu le toatele o tagata atamamai, o Tusitaai o le Sami Mate o mea aupito sili ia na mauaina o le seneturi lona 20. Na maua mai tusitaai se potutusi anamua o le silia ma le 900 tusitusiga, o le tele o ia tusitusiga na tusia i le uluai gagana Eperu o le Feagaiga Tuai. E tusa ma le 225 o tusitaai na i ai kopi pito sili na tuai o le Feagaiga Tuai (sei vagana ai le tusi a Eseta), lea e silia ma le 1,000 tausaga le umi atu nai lo kopi na faaaoga i le taimi o Vaitausaga Faaogatotonu. O le tele o le vaitaimi o tusitaai e i le va o le 150 t.l.m. ma le 68 t.a., e ui lava o nisi o vaitaimi o tusitusiga e mamao i tua i le seneturi lona tolu t.l.m.
E faaopoopo atu i tusitusiga anamua faatusipaia, ua aofia ai foi i le Tusitaai o le Sami Mate le Tusitaai o le Malumalu (o loo faamatalaina ai se malumalu e fausia i Ierusalema ma le malo lelei o le feagaiga), o le Tusitaai o Taua (o loo faamatalaina ai le taua i le faaiuga o aso), ma tusitusiga e talitutusa ma tusitusiga o le Tusi Paia (e pei o le tusi a Enoka, Noa, Mekisateko, ma molimau a Iakopo, Iuta, ma Levi). E itiiti mea ua iloa e uiga ia Enoka i le Tusi Paia, ae i totonu o tusitaai, o Enoka o se tagata taua tele—o se perofeta maoae e i ai ni meaalofa faapitoa.
O le tele o tusitaai ua matua faaleagaina ona o le tuai ma le aafia i elemene, ae ua mafai ona aoina mai e tagata atamamai se oa o faamatalaga e uiga i faiga masani e faatino ai e le au tusiupu a latou tusitusiga. O galuega magafagafa ma le maeaea lelei a le au tusiupu ua faailoa mai ai se tulaga maualuga o tomai ma atamai faalematata a o latou kopiina ma tuufaasolo atu tusitusiga paia mai le tasi tupulaga i le isi. O i tatou o e alolofa ma talisapaia tusitusiga paia ua matuai nofo aitalafu i nei tusiupu mo la latou galuega magafagafa lelei.
Pe a tatou mafaufau i metotia anamua o le tuulima faasolo atu o tusitusiga, ua tatou iloa ai na tuufaasolosolo mai le Tusi Paia i se faagasologa ofoofogia ina ia taunuu mai ai i lenei seneturi. Ua tu le Tusitaai o le Sami Mate e avea o se molimau o le Feagaiga Tuai lea na tuufaasolo mai i auga seneturi i se tulaga faaaloalogia o le sa’o atoatoa. Ona o lenei mea, ua tatau ai ona tatou faafetai i perofeta, o au tusiupu, o au lomitusi, ma tagata uma o e sa nafa ma le tuufaasoloina o le Tusi Paia mai lea tupulaga i lea tupulaga.