Fesoasoani Atu i Isi ia Maua le Faatuatua ia Keriso
Saunia e Elder L. Tom Perry
O Le Korama a Aposetolo e Toasefululua
Mai se lauga o le faeasaite a le Ofisa o Aoga a le Ekalesia, “We Were the Greatest Generation,” na tuuina atu i le Iunivesite o Polika Iaga i le aso 6 o Mati, 2011. Mo le saunoaga atoa, alu i le cesdevotionals.lds.org.
Ou te luiina outou e fesoasoani i fanau a le Atua ia toe foi mai i lo latou faatuatuaga faa-Kerisiano ma le faavae faalelotu malosi lea e matuai taua lava mo le filemu o le mafaufau ma le fiafia moni.
O Le Pulupāsama Faamalolo, saunia e David Lindsley
Sa faanoanoa ia Pope Benedict XVI, i le faavaivaia o lotu Kerisiano i Europa, Ausetalia, ma le Iunaite Setete, e faapea, “E le o toe i ai se faamaoniga mo se manaomia o le Atua, e oo lava foi ia Keriso.” Na ia faaopoopo mai, “E foliga mai ua mate atu lotu ia na ta’ua o ekalesia faavae.”1
Ua tatou o ese mai tapuaiga na masani ai. Ua toatele atu tagata ua fai mai o latou e faaleagaga nai lo le faalelotu. Afai e talafeagai se aoaoga ma lo latou ituaiga olaga, latou te taliaina ma avea ai o se vaega o lo latou faatuatua. Afai e leai, latou te atiaeina lo latou lava faatuatua e fai e le tagata lava ia. O le faatuatua ma le faaleagaga ua tagai nei i ai o ni fua e faaaoga e tagata. Ua pulea e mea faalelalolagi ma ua suitulaga i le Atua.
I le avea ai ma Au Paia o Aso e Gata Ai, e tatau ona lagona o tatou leo e tetee atu i nei faiga matautia ua mamanuina e faaumatia ai le faatuatua o tagata. O loo lapataia pea i tatou e le Tusi a Mamona e uiga i le suitulaga o la tatou faalagolago i le Atua i mea e le tumau. I le faamatalaina o se taimi na o ese ai sa Nifae mai lo latou faatuatua, na ta’ua ai e Mamona: “Ua latou tuputupu ae i le faamaualuluga, i le faafefeteina o o latou loto, ona o a latou oa e sili ona tele; o lea sa faateleina ai lo latou mauoa i o latou lava mata, ma le fia uai atu i upu [a perofeta], ia savavali ma le tonu i luma o le Atua” (Alema 45:24).
A o e vaaia le faavaivaia o le faatuatuaga faa-Kerisiano i le lalolagi, e tatau ona sili atu ona mausali ma mautinoa lou lava faatuatua. Ua tautino mai Helamana: “Ia manatua o luga lava o le papa o lo tatou Togiola, o le Keriso lea, le Alo o le Atua, e ao ina oulua atiinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua na uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atiinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).
Ua faamanatu mai e Nifae ia i tatou:
“Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala … [ma] lena olaga ua ia Keriso. …
“… Ona o le ala sa’o o le talitonu lea ia Keriso” (2 Nifae 25:26–28).
Pe o i ai sa tatou faavae e lagolago ai sea manatu?
O Faatusa o le Taulaga a Keriso
O le mea moni sili ua faamaumauina i le talafaasolopito atoa, o le tala o le soifua mai ma le misiona a le Alii o Iesu Keriso i le lalolagi. Na valoia Lana misiona mai le aso o o tatou uluai matua. I le tusi a Mose tatou te faitau ai:
“Ma o Atamu ma Eva, lana ava, sa valaau atu i le suafa o le Alii, ma sa laua faalogoina le siufofoga o le Alii mai le ala agai i le Faatoaga o Etena, ua fetalai mai ia i laua, ae sa laua le vaai atu ia te ia; aua sa punitia ese i laua mai ona luma.
“Ma sa tuu mai e ia ia i laua poloaiga, ia la ifo atu i le Alii lo laua Atua, ma avatu uluai manu o a laua lafu, mo se taulaga i le Alii. Ma sa usiusitai Atamu i poloaiga a le Alii.
“Ma ina ua mavae aso e tele, sa oo mai se agelu a le Alii ia Atamu, ua fetalai mai: Aisea ua e osi atu ai taulaga i le Alii? Ma sa fai atu Atamu ia te ia: Ou te lē iloa, ae na poloaiina ai aʼu e le Alii.
“Ma ona fetalai mai lea o le agelu, ua faapea mai: O lenei mea o se faatusa lea o le taulaga a le Toatasi na Fanaua e le Tama, o le ua tumu i le alofa tunoa ma le upumoni.
“O le mea lea, ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau” (Mose 5:4–8).
O lea, na faavae ai taulaga i le lalolagi e avea ma sauniga o le talalelei, ina ia faatinoina ma faia i le pule o le perisitua, e fai ma faatusa o le taulaga o le a oo mai a le Atalii o le Tagata, o lē o le a tuu atu Lona soifua mo agasala a le lalolagi.
O le faatusa o le sauniga na faatulagaina ia faailoa ai ia manatu patino o le taulaga a le Alii pe a Ia afio mai i le taulotoaiga o taimi. O le taulaga mulimuli o le Paseka, mo se faataitaiga, na manaomia ai se tamai mamoe po’a o le tausaga muamua, e aunoa ma se ila po o se pona, e filifilia e avea ma taulaga. Na masaa le toto, ma sa faaeteete ina ne’i i ai se ivi e gau—o faatusa uma ia o le ala o le maliu o le Faaola.
E ofoofogia le tuuina atu o taulaga sa faaauauina i tupulaga uma mai ia Atamu seia oo lava i le taimi o le Faaola. E ui lava sa feagai le fanauga a Isaraelu ma le tele o vaitau o le liliuese, ae o le faamoemoe o le a togiola e le Alo e Toatasi Na Fanaua ia agasala a tagata, ma o Lona toto togiola o le a maua ai le tino ola pea sa tumau pea i loto o tagata e toatele.
O le tuuina atu o taulaga na faamutaina lona faatinoga aoao o se tu masani ina ua mavae le Togiola a le Faaola. Na faavae le faamanatuga e faamanatu mai ai i Ona soo na i ai o Ia i le lalolagi ma sa faatinoina Lana misiona i le lalolagi. Tatou te faitau i le Luka:
“Ona tago ai lea o ia i le areto, ua faafetai, ua tofitofi ma avatu ia te i latou, ua faapea atu, O lo’u tino lenei, ua foaiina atu mo outou: tou te faia le mea nei e fai ma faamanatuga ia te a’u.
“Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou.” (Luka 22:19–20).
Ua ou toe maofa ai foi ona o lenei faamanatu, e oo lava i le vaitau o le pogisa o le liliuese, ae sa faatinoina lava i le tele o ituaiga faiga ma auala i augatupulaga o na taimi seia oo i le taimi o le Toefuataiga o le talalelei a Iesu Keriso, ina ua toe fuatai mai le mana o le perisitua i le lalolagi e faatino ai lenei sauniga faaola paia.
I vaitau uma o le talafaasolopito faamaumauina, tatou te maua ai le faamanatu faifai pea o le misiona a lo tatou Faaola. Na afio mai o Ia i le lalolagi o sē e itulua ona tagatanuu—o le tasi o le Atua, a o le tasi o le tagata. O lenei mea na mafai ai e Ia ona faatino Lana taulaga sili faaeaina mo i tatou uma e ala i Lana Togiola. Mata o i ai i soo se faamaoniga malosi atu o Iesu o le Keriso, o le Faaola o le lalolagi, nai lo le suesue ma ola ai i Ana aoaoga faavae faaola, lea ua Ia faaalia mai i tisipenisione uma o le lalolagi? Ua Ia tuuina mai ia i tatou Lana talalelei e taialaina ai ma faatonutonu i tatou i lo tatou nonofo lē tumau ai i le lalolagi.
O Le Talalelei O Le Tali Lea
Na saunoa Peresitene Tavita O. MaKei (1873–1970) e faapea:
“O le tiutetauave o le faaali atu i le lalolagi e faapea, o le talalelei a Iesu Keriso o le a foiaina ona faafitauli, ua i ai lea i tagata ua faia le tautinoga. … Ou te talitonu foi e mafai ona foia faafitauli uma o le lalolagi e ala i le usiusitai i mataupu faavae o le talalelei a Iesu Keriso. …
“O le tali i faafitauli fita o le lalolagi o loo maua iinei i le Ekalesia a Iesu Keriso. Ua lava ala ua saunia e le gata mo manaoga o tagata taitoatasi, ae faapea foi mo le malo ma faalapotopotoga o malo. … Ou te ioe atonu e foliga mai ua tatou taunapa faapea ua sili lo tatou poto, ae e leai. O lenei tautinoga o le faatinoga o le fuafuaga a le Atua e foia ai faafitauli o le lalolagi. O outou o loo umia le perisitua, ua i ai se tiutetauave sili atu i aso nei, ona ua outou soifua nei i lenei taimi fatufatua’i i le talafaasolopito o le lalolagi, e sili atu i lo se isi lava taimi muamua i le Ekalesia. Ou te toe faapea atu. Afai tatou te faia le tautinoga e taofimau i le upumoni, ona tatau ai lea i tagata uma o le Au Paia o Aso e Gata Ai, ona ola ai i le upumoni, ina ia o mai tagata o le lalolagi e tali mai i le valaau, ma tofo i fua o le laau, o le a latou iloa ai e atoatoa ma lelei.”2
O le savali sili tatou te avatu i le lalolagi o le talalelei lea a lo tatou Alii ma le Faaola ua toefuatai mai i le lalolagi. Ua toe i ai Lana Ekalesia i le fogaeleele faatasi ai ma le mana ma le mamalu o le perisitua paia.
Ua tuuina atu ia i latou ua faauuina i le mana e galulue ai mo Ia e avea ma Ona sui e aumaia aoaoga faavae, o sauniga, mataupu faavae, ma mana e fusifusia ai i le lalolagi e faapei ona faia i le lagi. O le Ekalesia lenei a le Faaola. Na te taitaia mataupu o Lana Ekalesia e ala i Ana perofeta filifilia. Ona aoao atu lea e perofeta le talalelei i isi ma molimau atu o Iesu o lo tatou Faaola ma le Togiola. O le vaitau lenei o le tisipenisione o le atoaga o taimi, lea na tulei saunoa i ai perofeta mai lava i le amataga o taimi. O le taimi o le faataunuuina o mea uma na fetalaia e perofeta a le Alii ma faamaumauina i tusitusiga paia. O le Ekalesia a Iesu Keriso o le Au Paia o Aso e Gata Ai e le o se ekalesia fou, ae o le Ekalesia toefuataiina i le lalolagi i aso nei ma le vaitau lenei.
O outou o le tupulaga sa faasaoina e le Alii mo le taimi nei. Sa outou o a’e mai le vai o le papatisoga faatasi ma se feagaiga ma se folafolaga i le Alii, e fai ma sui o Ia e fesoasoani atu ai i tagata e tia’i ese o latou ala faalelalolagi ae foi mai i faamanuiaga ua folafola mai mo i tatou, pe afai tatou te mulimuli ia te Ia ma ola ai i Lana talalelei. E mafai ona outou fesoasoani i fanau a lo outou Tama Faalelagi e toe foi mai i lo latou faatuatuaga FaaKerisiano, ma atiina ae se faatuatua ia te Ia ma toe foi mai i Ona ala.
O Mea e Mafai Ona E Faia
E mafai ona e fesili atu, “O le a se mea e mafai ona ou faia?” I ni nai masina ua mavae na fautua mai ai lo matou peresitene o le siteki, a o lauga i le sauniga faamanatuga, i ni mea se fa e mafai ona tatou faia e toe faafoi mai ai isi i lo latou faatuatuaga FaaKerisiano:
1. Tatalo i aso taitasi.
Na saunoa mai Peresitene Thomas S. Monson: “Ia i latou o loo faafofoga mai i lo’u leo, o e o tauivi ma luitau ma faigata, pe tetele pe laiti, o le tatalo e maua ai le malosi faaleagaga. … O le tatalo o le auala lea tatou te faalatalata atu ai i le Tama i le Lagi, o lē e alofa ia i tatou. Talanoa atu ia te Ia i le tatalo ona e faalogo lea mo le tali. E tutupu mai vavega e ala i le tatalo. … Manatua e tatalo faatauanau.”3
Ia faia au tatalo i aso taitasi ma fesoasoani i isi e toe foi mai i lo latou faatuatuaga FaaKerisiano e ala i le faamalosiauina o i latou e tootutuli i o latou tulivae ma tatalo i le Atua.
2. Suesue i tusitusiga paia i aso taitasi.
Mata e i ai se isi molimau e malosi atu e uiga ia Iesu Keriso nai lo molimau ua tatou maua i le Tusi a Mamona? Mai le 239 o ona mataupu, e 233 o loo ta’ua ai le Faaola.4 Pe le ofoofogia ea lena mea?
Ia mautinoa e fai au oe lava suesuega o tusitusiga paia i aso taitasi.Ona e fesoasoani lea i isi e toe foi mai i lo latou faatuatuaga FaaKerisiano e ala i le faamalosiauina o i latou e suesue foi i tusitusiga paia i aso taitasi.
3. Ia agavaa e auai i le malumalu.
E i ai nisi o outou ua o i le malumalu, a o isi e le’i o. E lelei ona malamalama i mea e manaomia ina ia maua ai se pepa faataga o le malumalu. Ua tatou malamalama lelei i le faagasologa, lea tatou te o ai i se faamasino o Isaraelu ma faamautinoa atu ia te ia lo tatou agavaa e umia se pepa faataga o le malumalu, ona ola ai lea i tulaga faatonuina e manaomia i le umiaina o lena pepa faataga.
Ia ola i se ala o le a faaali atu ai e lau faataitaiga amiotonu le auala e agavaa ai mo faamanuiaga o le malumalu.
4. Tuu atu i aso taitasi galuega auauna atu.
Manatua upu a le Tupu o Peniamina: “Ma faauta, ua ou ta’u atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso a tagata, ua nao lo outou auauna atu lava lea i lo outou Atua” (Mosaea 2:17). E tali moni mai lava le Alii i a tatou tatalo e ala i auaunaga tatou te tuuina atu i isi.
Ia avea ma se faataitaiga o auaunaga Faa-Keriso, ma fesoasoani i isi ia toe foi mai i lo latou faatuatuaga Faa-Kerisiano e ala i le uunaia o i latou e auauna atu i isi.
Tulai Atu i se Lagona Fou o le Tautinoga
Ou te iloa o loo soifua le Atua. Ou te iloa o i tatou uma o Ana fanau ma e alofa o Ia ia te i tatou. Ou te iloa na Ia auina mai Lona Alo i le lalolagi e avea ma taulaga togiola mo tagata uma. Ou te iloa o i latou o e talia Lana talalelei ma mulimuli ia te Ia o le a olioli i le ola e faavavau, o le meaalofa sili o meaalofa uma a le Atua. Ou te iloa na taitaia e le Faaola le Toefuataiga o le talalelei i le lalolagi e ala i le galuega a le Perofeta o Iosefa Samita. Ou te iloa e na o le pau le olioli ma le fiafia tumau o le a tatou mauaina i lo tatou aafiaga i la le tino nei, o le a oo mai e ala i le mulimuli ia Iesu Keriso, usiusitai i Lana tulafono, ma tausi Ana poloaiga.
Ou te luiina outou ia tutulai atu i se lagona fou o le tautinoga. Ou te luiina outou e fesoasoani i fanau a le Atua ia toe foi mai i lo latou faatuatuaga Faa-Kerisiano ma le faavae faalelotu malosi lea e matuai taua lava mo le filemu o le mafaufau ma le fiafia moni i lenei vaitau o le olaga faataitai.
Ia faamanuia outou e le Atua i le lototetele, lototoa, naunautai ma le manao e toefuatai le faatuatua i le talalelei a lo tatou Alii ma le Faaola.
Mata e i ai se isi molimau e malosi atu e uiga ia Iesu Keriso nai lo molimau ua tatou maua i le Tusi a Mamona? Mai le 239 o ona mataupu, e 233 o loo ta’ua ai le Faaola.
Lauga a le Tupu o Peniamina, saunia e Jeremy Winborg